ന്യൂഡൽഹി : ആഗോള ബന്ധങ്ങൾ ശക്തിപ്പെടുത്തുന്നതിന് പ്രവാസികളുടെ സമർപ്പണം പ്രശംസനീയമെന്ന് പ്രധാനമന്ത്രി നരേന്ദ്രമോദി. പ്രവാസികൾ നമ്മുടെ സമ്പന്നമായ പൈതൃകം സംരക്ഷിക്കുകയും വ്യത്യസ്‌ത മേഖലകളിൽ മികവ് പുലർത്തുകയും ചെയ്യുന്നുവെന്നും അദ്ദേഹം അഭിപ്രായപ്പെട്ടു. പ്രവാസി ഭാരതീയ ദിവസില്‍ ആശംസകള്‍ അറിയിക്കുകയായിരുന്നു നരേന്ദ്രമോദി (Pravasi Bharatiya diwas).
ലോകമെമ്പാടും, ഇന്ത്യയുടെ ആത്മാവിനെ ഉൾക്കൊള്ളുന്നതിനും അതിന്‍റെ വേരുകളുമായി ബന്ധപ്പെട്ടിരിക്കുന്നതിനും പ്രവാസികളെ അദ്ദേഹം പ്രത്യേകം അഭിനന്ദിച്ചു. എക്‌സിൽ പ്രധാനമന്ത്രി കുറിച്ചത് ഇങ്ങനെ - "പ്രവാസി ഭാരതീയ ദിവസ് ആശംസകൾ. ലോകമെമ്പാടുമുള്ള ഇന്ത്യൻ പ്രവാസികളുടെ സംഭാവനകളും നേട്ടങ്ങളും ആഘോഷിക്കാനുള്ള ദിവസമാണിത്. നമ്മുടെ സമ്പന്നമായ പൈതൃകം സംരക്ഷിക്കുന്നതിനും ആഗോള ബന്ധങ്ങൾ ശക്തിപ്പെടുത്തുന്നതിനുമുള്ള അവരുടെ സമർപ്പണം പ്രശംസനീയമാണ്. ലോകമെമ്പാടുമുള്ള ഇന്ത്യക്കാർ, ഏകത്വത്തിന്‍റെയും നാനാത്വത്തിന്‍റെയും ബോധം വളർത്തുന്നു".
പ്രവാസി ഭാരതീയ ദിവസിൽ വിദേശകാര്യ മന്ത്രി എസ് ജയ്‌ശങ്കറും ഔദ്യോഗിക സോഷ്യൽ മീഡിയ അക്കൗണ്ടിലൂടെ ആശംസകൾ അറിയിച്ചു. "പ്രവാസി ഭാരതീയ ദിവസിൽ, ലോകമെമ്പാടുമുള്ള ഇന്ത്യൻ പ്രവാസികൾക്ക് ആശംസകൾ. നിങ്ങളുടെ നേട്ടങ്ങളിൽ ഞങ്ങൾ വളരെയധികം അഭിമാനിക്കുന്നു. നിങ്ങളുടെ മികച്ച സംഭാവനകൾ ഇന്ത്യയുടെ ആഗോള നിലവാരം ഉയർത്തുന്നതിൽ നിർണായക പങ്ക് വഹിച്ചിട്ടുണ്ട്.
കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനും പ്രവാസി ഭാരതീയ ദിവസിൽ ആശംസയറിയിക്കാൻ മറന്നില്ല. ലോകത്തുടനീളം നമ്മുടെ സമ്പന്നമായ സംസ്‌കാരത്തിന്‍റെയും മൂല്യങ്ങളുടെയും അംബാസഡർമാരായി സ്വാധീനം ചെലുത്താൻ പ്രവാസികൾക്ക് സാധിച്ചു. അവരുടെ കഴിവും കഠിനാധ്വാനവും അവർ താമസിക്കുന്ന രാജ്യങ്ങളെ സമ്പന്നമാക്കുന്നതിനോടൊപ്പം തന്നെ ഇന്ത്യയുടെ ആഗോള പ്രാധാന്യം വളർത്തുന്നതിൽ പ്രധാന ശക്തിയാകാൻ കൂടി അവർക്ക് സാധിച്ചു.
Also Read:'ഇന്ത്യയുടെ വളര്‍ച്ചയില്‍ ക്രിസ്ത്യന്‍ സമൂഹത്തിന്‍റെ പങ്ക് നിര്‍ണായകം'; പ്രധാനമന്ത്രി നരേന്ദ്ര മോദി
'വസുധൈവ കുടുംബകം എന്ന ഇന്ത്യൻ സംസ്‌കാരം ലോകമെമ്പാടും ശക്തിപ്പെടുത്തുന്ന സഹോദരങ്ങൾക്ക് പ്രവാസി ഭാരതീയ ദിവസ് ആശംസകൾ. രാജ്യത്തിന്‍റെ വികസനത്തിനായി തുടർന്നും പ്രധാന പങ്കുവഹിക്കാന്‍ സാധിക്കട്ടെ' - ലോക്‌സഭ സ്‌പീക്കർ ഓം ബിർള കുറിച്ചു.
എല്ലാവർഷവും ജനുവരി 9നാണ് പ്രവാസി ഭാരതീയ ദിവസ് ആഘോഷിക്കുന്നത്. മഹാത്മാഗാന്ധി 1915 ജനുവരി 9 ന് സൗത്ത് ആഫ്രിക്കയിൽ നിന്നും ഇന്ത്യയിൽ തിരിച്ചെത്തിയ ദിവസമാണ് പ്രവാസി ദിവസ് ആയി ആചരിക്കുന്നത്.
