വാഷിങ്ടൺ: പ്രധാനമന്ത്രി നരേന്ദ്ര മോദി ജൂൺ 22ന് അമേരിക്കയിൽ ഔദ്യോഗിക സന്ദർശനം നടത്തും. യുഎസും ഇന്ത്യയും തമ്മിലുള്ള വളരെ ആഴമേറിയ പങ്കാളിത്തം ഉറപ്പിക്കാനുള്ള അവസരമാണ് പ്രധാനമന്ത്രി നരേന്ദ്ര മോദിയുടെ യുഎസ് സന്ദർശനമെന്ന് വൈറ്റ് ഹൗസ്. സ്വതന്ത്രവും സമൃദ്ധവും സുരക്ഷിതവുമായ ഇൻഡോ - പസഫിക്കിനുള്ള യുഎസ് - ഇന്ത്യ പങ്കിട്ട പ്രതിബദ്ധതയും പ്രതിരോധം, ഊർജം, ബഹിരാകാശം എന്നിവയുൾപ്പെടെ തന്ത്രപ്രധാനമായ സാങ്കേതിക പങ്കാളിത്തം വിലയിരുത്താനും ഈ സന്ദർശനം ശക്തിപ്പെടുത്തും. വൈറ്റ് ഹൗസ് പ്രസ് സെക്രട്ടറി പറഞ്ഞു.
യുഎസ് സന്ദർശനത്തിനെത്തുന്ന പ്രധാനമന്ത്രി മോദിയെ സ്വീകരിക്കാന്‍ തങ്ങൾ വളരെ ആകാംക്ഷയോടെ കാത്തിരിക്കുകയാണെന്ന് യുഎസ് സ്റ്റേറ്റ് ഡിപ്പാർട്ട്മെന്‍റ് പ്രിൻസിപ്പൽ ഡെപ്യൂട്ടി വക്താവ് വേദാന്ത് പട്ടേൽ പറഞ്ഞു. സുരക്ഷ സഹകരണം, സാമ്പത്തിക ബന്ധങ്ങൾ, വ്യാപാരം തുടങ്ങി നിരവധി വിഷയങ്ങളിൽ ഇന്ത്യയുമായുള്ള യുഎസിന്‍റെ സഹകരണം കൂടുതൽ ആഴത്തിലാക്കാനാണ് തങ്ങൾ ആഗ്രഹിക്കുന്നതെന്നും വേദാന്ത് പട്ടേൽ കൂട്ടിച്ചേർത്തു. പ്രസിഡന്‍റ് ജോ ബൈഡന്‍റെയും പ്രഥമ വനിത ജിൽ ബൈഡന്‍റെയും ക്ഷണത്തെ തുടർന്നാണ് പ്രധാനമന്ത്രി മോദിയുടെ യുഎസ് സന്ദർശനം.
സന്ദർശന വേളയിൽ പ്രധാനമന്ത്രി മോദിക്ക് അമേരിക്കൻ പ്രസിഡന്‍റ് ജോ ബൈഡനും പ്രഥമ വനിത ജിൽ ബൈഡനും ചേർന്ന് വൈറ്റ് ഹൗസിൽ വിരുന്നൊരുക്കും. ബുധനാഴ്‌ച വാർത്താക്കുറിപ്പിലൂടെയാണ് വിദേശകാര്യ മന്ത്രാലയം ഇക്കാര്യം അറിയിച്ചത്. ജൂൺ 22ന് രാജ്യം സന്ദർശിക്കുന്ന വേളയിൽ ജനപ്രതിനിധി സഭയുടെയും സെനറ്റിന്‍റെയും സംയുക്ത യോഗത്തെ അഭിസംബോധന ചെയ്യാൻ യുണൈറ്റഡ് സ്റ്റേറ്റ്സ് കോൺഗ്രസ് പ്രധാനമന്ത്രി മോദിയെ ക്ഷണിച്ചിട്ടുണ്ടെന്ന് യുഎസ് കോൺഗ്രസ് പുറത്തിറക്കിയ പ്രസ്‌താവനയിൽ പറയുന്നു.
ഇന്ത്യയുടെ ഭാവിയെക്കുറിച്ചുള്ള കാഴ്‌ചപ്പാട് പങ്കിടാനും തങ്ങളുടെ രാജ്യങ്ങൾ അഭിമുഖീകരിക്കുന്ന ആഗോള വെല്ലുവിളികളെക്കുറിച്ച് സംസാരിക്കാനും മോദിക്ക് അവസരം ലഭിക്കുമെന്ന് വൈറ്റ് ഹൗസ് സ്‌പീക്കർ കെവിൻ മക്കാർത്തി, സെനറ്റ് ഭൂരിപക്ഷ നേതാവ് ചക്ക് ഷൂമർ, സെനറ്റ് റിപ്പബ്ലിക്കൻ നേതാവ് മിച്ച് മക്കോണൽ, ഹൗസ് ഡെമോക്രാറ്റിക് നേതാവ് ഹക്കീം ജെഫ്രീസ് എന്നിവർ പ്രധാനമന്ത്രിക്ക് അയച്ച കത്തിൽ പറഞ്ഞു. പ്രധാനമന്ത്രി മോദിയുടെ സന്ദർശനം അമേരിക്കയും ഇന്ത്യയും തമ്മിലുള്ള ആഴമേറിയതും അടുത്തതുമായ പങ്കാളിത്തം ശക്തിപ്പെടുത്താനുള്ള അവസരമാകും.
അമേരിക്കക്കാരും ഇന്ത്യക്കാരും തമ്മിൽ ഊഷ്‌മളമായ ബന്ധം ഉറപ്പിക്കുന്നതിനും സഹായിക്കുമെന്ന് വൈറ്റ് ഹൗസ് പ്രസ് സെക്രട്ടറി കരീൻ ജീൻ പിയറി പറഞ്ഞു. ജൂൺ 22ന് നടക്കാനിരിക്കുന്ന ഔദ്യോഗിക സംസ്ഥാന സന്ദർശനത്തിനായി പ്രധാനമന്ത്രി മോദിയെ സ്വാഗതം ചെയ്യാൻ പ്രസിഡന്‍റും പ്രഥമ വനിതയും കാത്തിരിക്കുകയാണെന്നും പിയറി കൂട്ടിച്ചേർത്തു.
കേന്ദ്ര ധനമന്ത്രിയുടെ യുഎസ് സന്ദർശനം : കേന്ദ്ര ധനമന്ത്രി നിർമല സീതാരാമൻ കഴിഞ്ഞ ഏപ്രിലിൽ യുഎസ് സന്ദർശനം നടത്തിയിരുന്നു. ലോക ബാങ്ക്, അന്താരാഷ്ട്ര നാണയ നിധി എന്നിവയുടെ 2023ലെ സ്‌പ്രിങ് മീറ്റിങ്ങുകൾ, മറ്റ് ജി 20 മീറ്റിങ്ങുകൾ എന്നിവയിൽ പങ്കെടുത്തു. ജി20 അംഗങ്ങൾ, 13 ക്ഷണിക്കപ്പെട്ട രാജ്യങ്ങൾ, വിവിധ അന്താരാഷ്ട്ര, പ്രാദേശിക സംഘടനകൾ എന്നിവയിൽ നിന്നുള്ള 350 പ്രതിനിധികൾ തുടങ്ങിയവരും യോഗത്തിൽ പങ്കെടുത്തു.
വിവിധ തരത്തിലുള്ള ആഗോള പ്രശ്‌നങ്ങൾ യോഗത്തില്‍ ചര്‍ച്ച വിഷയമായിരുന്നു. ഭക്ഷ്യ-ഊർജ്ജ അരക്ഷിതാവസ്ഥ പരിഹരിക്കുക, ആഗോള കടബാധ്യതകൾ കൈകാര്യം ചെയ്യുക, കാലാവസ്ഥ പ്രവർത്തനത്തിനുള്ള ധനസമാഹരണം, ബഹുമുഖ വികസന ബാങ്കുകളെ ശക്തിപ്പെടുത്തുക, അന്താരാഷ്ട്ര നികുതി, സാമ്പത്തിക മേഖല വിഷയങ്ങളിലെ പുരോഗതി ത്വരിതപ്പെടുത്തൽ തുടങ്ങിയ വിഷയങ്ങളിൽ ശ്രദ്ധ കേന്ദ്രീകരിച്ചുകൊണ്ടായിരുന്നു യോഗം.
