ന്യൂഡൽഹി: 13 -ാമത് ബ്രിക്‌സ് ഉച്ചകോടി ഇന്ന് (വ്യാഴാഴ്‌ച). വെർച്വൽ ഫോർമാറ്റിൽ നടത്തുന്ന ഉച്ചകോടിയിൽ പ്രധാനമന്ത്രി നരേന്ദ്ര മോദി അധ്യക്ഷത വഹിക്കുമെന്ന് വിദേശകാര്യ മന്ത്രാലയം അറിയിച്ചു. ബ്രസീൽ പ്രസിഡന്‍റ് ജെയർ ബോൾസനാരോ, ദക്ഷിണാഫ്രിക്കൻ പ്രസിഡന്‍റ് സിറിൽ റാമഫോസ, റഷ്യൻ പ്രസിഡന്‍റ് വ്‌ളാഡിമിർ പുടിൻ, ചൈനീസ് പ്രസിഡന്‍റ് ഷി ജിൻപിങ് എന്നിവരും യോഗത്തിൽ പങ്കെടുക്കും.
ഇന്ത്യയുടെ നേതൃത്വത്തിൽ ബ്രിക്‌സ്@15
‘ബ്രിക്‌സ്@15: തുടർച്ച, ഏകീകരണം, സമവായം എന്നിവയ്ക്കുള്ള ഇൻട്രാ-ബ്രിക്‌സ് സഹകരണം’ എന്നതാണ് ഉച്ചകോടിയുടെ പ്രമേയം. താലിബാന്‍റെ അഫ്‌ഗാൻ മുന്നേറ്റത്തിനു ശേഷമുള്ള സാഹചര്യവും മേഖലയിൽ നിന്ന് ഉയരുന്ന തീവ്രവാദ ഭീഷണിയെ കുറിച്ചും യോഗത്തിൽ ചർച്ച ചെയ്യും.
ഇത് രണ്ടാം തവണയാണ് പ്രധാനമന്ത്രി മോദി ബ്രിക്‌സ് (ബ്രസീൽ, റഷ്യ, ഇന്ത്യ, ചൈന, ദക്ഷിണാഫ്രിക്ക) ഉച്ചകോടിയുടെ അധ്യക്ഷനാകുന്നത്. നേരത്തേ 2016 -ൽ അദ്ദേഹം ഗോവ ഉച്ചകോടിയുടെ അധ്യക്ഷനായിരുന്നു. ബ്രിക്‌സിന്‍റെ പതിനഞ്ചാം വാർഷികത്തോടനുബന്ധിച്ചാണ് ഇന്ത്യ ആതിഥേയത്വം വഹിക്കുന്നതെന്നതും പ്രത്യേകതയാണ്. അവസാനത്തെ ബ്രിക്‌സ് ഉച്ചകോടിക്ക് ആതിഥേയത്വം വഹിച്ചത് റഷ്യയായിരുന്നു.
ഇന്ത്യയുടെ ദേശീയ സുരക്ഷാ ഉപദേഷ്‌ടാവ് അജിത് ഡോവൽ, പുതിയ വികസന ബാങ്ക് പ്രസിഡന്‍റ് മാർക്കോസ് ട്രോയ്ജോ എന്നിവരും യോഗത്തിൽ പങ്കെടുക്കും. ബ്രിക്‌സ് ബിസിനസ് കൗൺസിലിന്‍റെ പ്രോ ടെമ്പർ ചെയർമാൻ ഓങ്കാർ കൻവർ, ബ്രിക്‌സ് വനിതാ ബിസിനസ് അലയൻസ് പ്രോ ടെമ്പർ ചെയർ ഡോ. സംഗിത റെഡ്ഡി എന്നിവർ ഉച്ചകോടിക്കിടെ ഈ വർഷം പിന്തുടരുന്ന ഫലങ്ങളെക്കുറിച്ചുള്ള റിപ്പോർട്ടുകൾ അതത് മേഖലകൾക്ക് കീഴിലെ നേതാക്കൾക്ക് സമർപ്പിക്കും.
ALSO READ: ട്രെയിനുകൾ വൈകിയോടിയാൽ റെയിവേ യാത്രക്കാരന് നഷ്‌ടപരിഹാരം നൽകണമെന്ന് സുപ്രീം കോടതി
ഇന്ത്യ അധ്യക്ഷ കാലയളവിൽ നാല് മുൻഗണനാ മേഖലകൾ രൂപപ്പെടുത്തിയിട്ടുണ്ട്. ബഹുമുഖ സംവിധാനത്തിന്‍റെ പരിഷ്‌കരണം, ഭീകരവാദത്തിനെതിരായ പ്രതിരോധം, സുസ്ഥിര വികസന ലക്ഷ്യങ്ങൾ കൈവരിക്കുന്നതിനും ഡിജിറ്റൽ, സാങ്കേതിക ടൂളുകൾ ഉപയോഗിക്കുന്നതിനും ജനങ്ങൾ തമ്മിലുള്ള കൈമാറ്റങ്ങൾ മെച്ചപ്പെടുത്തുക ഇവയാണ് ഈ മേഖലകൾ.
ഇതിന് പുറമെ കൊവിഡ് മഹാമാരിയുടെ ആഘാതത്തെക്കുറിച്ചും മറ്റ് ആഗോള, പ്രാദേശിക പ്രശ്‌നങ്ങളെക്കുറിച്ചും നേതാക്കൾ അഭിപ്രായങ്ങൾ കൈമാറും.
