ഗാന്ധിനഗര്‍ : ഗുജറാത്തിലെ വഡോദരയില്‍ 58 കാരി മരിച്ചത് എച്ച് 3എന്‍ 2 വൈറസ് ബാധിച്ചിട്ടെന്ന് സംശയം. നിലവില്‍ വഡോദരയിലും സമീപ പ്രദേശങ്ങളിലും എച്ച് 3എന്‍ 2 വൈറസ് സ്ഥിരീകരിച്ച സാഹചര്യത്തിലാണ്, 58കാരി മരിച്ചത് ഇതുമൂലമാണെന്ന് വിലയിരുത്തുന്നത്. എന്നാല്‍ ഇതുസംബന്ധിച്ച് ഔദ്യോഗിക സ്ഥിരീകരണം ഉണ്ടായിട്ടില്ല.
രണ്ട് ദിവസം മുമ്പാണ് 58കാരിയെ ചികിത്സയ്ക്കാ‌യി എസ്‌എസ്‌ജി ആശുപത്രിയില്‍ പ്രവേശിപ്പിച്ചത്. എന്നാല്‍ ചികിത്സയില്‍ തുടരവേ രക്തസമ്മര്‍ദം ഉണ്ടാവുകയും വെന്‍റിലേറ്ററിലേക്ക് മാറ്റുകയും ചെയ്‌തിരുന്നു. തുടര്‍ന്ന് മരണം സംഭവിക്കുകയായിരുന്നു. ഇവര്‍ക്ക് എച്ച് 3എന്‍ 2 വൈറസ് ലക്ഷണങ്ങളുണ്ടായിരുന്നുവെന്നാണ് ആശുപത്രി അധികൃതര്‍ പറയുന്നത്.
ഇവരില്‍ നിന്ന് ശേഖരിച്ച സാമ്പിള്‍ പരിശോധനയ്‌ക്കായി പൂനെയിലെ ലാബിലേക്ക് അയച്ചിട്ടുണ്ട്. സംസ്ഥാനത്ത് നേരത്തെ രണ്ടുപേര്‍ വൈറസ് ബാധിച്ച് മരിച്ചിരുന്നു. കഴിഞ്ഞ 24 മണിക്കൂറിനുള്ളില്‍ നടത്തിയ പരിശോധനയില്‍ 3 പേര്‍ക്ക് വൈറസ് ബാധ സ്ഥിരീകരിച്ചു. 36 പേരെയാണ് പരിശോധനയ്ക്ക് വിധേയമാക്കിയത്. വൈറസ് സ്ഥിരീകരിച്ച ഇരുവരെയും ഐസൊലേഷനില്‍ പ്രവേശിപ്പിച്ചു.
എച്ച് 3എന്‍ 2 : രാജ്യത്ത് വിവിധയിടങ്ങളിലായി എച്ച് 3എന്‍ 2 സ്ഥിരീകരിച്ചത് ജനങ്ങളെ ആശങ്കയിലാക്കിയിരിക്കുകയാണ്. ഇന്‍ഫ്ലുവന്‍സ വൈറസ് ഉപവകഭേദമാണ് എച്ച് 3എന്‍ 2. പനി, ജലദോഷം, തൊണ്ട വേദന, ചുമ കഫക്കെട്ട്, ശ്വാസ തടസം,ശരീര വേദന തുടങ്ങിയവയാണ് എച്ച് 3എന്‍ 2 ന്‍റെ ലക്ഷണങ്ങള്‍. ഈ വര്‍ഷം ആദ്യം മുതല്‍ മാര്‍ച്ച് വരെ കര്‍ണാടകയില്‍ 16 പേര്‍ക്കും കേരളത്തില്‍ 10 പേര്‍ക്കും എച്ച് 3എന്‍ 2 സ്ഥിരീകരിച്ചിട്ടുണ്ട്.
also read: എച്ച് 3 എൻ 2 വൈറസ്: പുതിയ ആശങ്ക; രാജ്യത്ത് 2 മരണം
കര്‍ണാടകയിലും ഹരിയാനയിലും എച്ച് 3എന്‍ 2 ബാധിച്ച് രണ്ട് പേര്‍ മരിച്ചിരുന്നു. കൊവിഡിന്‍റെ മറ്റ് വകഭേദങ്ങളേക്കാള്‍ ഏറ്റവും അപകടകാരിയായ ഉപവകഭേദമാണ് എച്ച് 3എന്‍ 2 എന്നാണ് ഐസിഎംആര്‍ (ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച്) റിപ്പോര്‍ട്ടുകള്‍ വ്യക്തമാക്കുന്നത്. ഏറ്റവും കൂടുതല്‍ അപകടകാരിയായ ഇവയ്‌ക്ക് വേഗത്തില്‍ ഒരാളില്‍ നിന്ന് മറ്റൊരാളിലേക്ക് പടരാന്‍ സാധിക്കും. ഇന്ത്യയില്‍ ഇതുവരെയും 90 എച്ച് 3 എന്‍ 2 കേസുകളാണ് റിപ്പോര്‍ട്ട് ചെയ്‌തിട്ടുള്ളത്.
also read: എച്ച് 3 എന്‍ 2 വൈറസ്: നിലവില്‍ സ്ഥിരീകരിച്ചത് 2 കേസുകള്‍, ആശങ്ക വേണ്ടെന്ന് ആരോഗ്യമന്ത്രി
എച്ച് 3എന്‍ 2 പ്രതിരോധിക്കേണ്ടത് : ഒരാളില്‍ എച്ച് 3എന്‍ 2 ലക്ഷണങ്ങള്‍ കണ്ടാലുടന്‍ തന്നെ വൈദ്യ സഹായം തേടണം. ഇത്തരം ആളുകള്‍ക്ക് ധാരാളം വെള്ളം കുടിക്കേണ്ടതുണ്ടെന്നാണ് വിദഗ്‌ധര്‍ പറയുന്നത്. വൈറസ് ബാധിതരായ ആളുകള്‍ക്ക് പൂര്‍ണ വിശ്രമം ആവശ്യമാണ്. പനി കുറയ്ക്കു‌ന്നതിനും ശരീര വേദന ഇല്ലാതാക്കുന്നതിനുമുള്ള മരുന്നുകള്‍ കഴിക്കാവുന്നതാണ്.
രോഗം വരാതിരിക്കാന്‍ ശ്രദ്ധിക്കാം: പ്രതിരോധത്തിനായി പ്രധാനമായും ഉപയോഗിക്കേണ്ടത് മാസ്‌കാണ്. തിരക്കേറിയ സ്ഥലങ്ങളില്‍ പോകുമ്പോള്‍ നിര്‍ബന്ധമായും മാസ്‌ക് ധരിക്കണം. മൂക്ക് വായ എന്നിവിടങ്ങളില്‍ തൊടുന്നത് പരമാവധി ഒഴിവാക്കുക. കൈകള്‍ ഇടയ്‌ക്കിടെ സോപ്പ് ഉപയോഗിച്ച് കഴുകുക. ചുമയ്‌ക്കുമ്പോഴും തുമ്മുമ്പോഴും വായ ടവല്‍ ഉപയോഗിച്ച് മൂടുക. 17982921.
