നിർമല സീതാരാമൻ, തുടർച്ചയായി അഞ്ച് തവണ ബജറ്റ് അവതരിപ്പിക്കുന്ന ആറാം ധനമന്ത്രി

ദൈർഘ്യമേറിയ കേന്ദ്ര ബജറ്റ് അവതരണം, 'പേപ്പര്‍ലെസ് ബജറ്റ്' എന്നീ റെക്കോഡും ധനമന്ത്രി നിര്‍മല സീതാരാമന്‍റെ പേരില്‍ തന്നെയാണ്

ന്യൂഡല്‍ഹി: മൊറാർജി ദേശായി, മൻമോഹൻ സിങ്, യശ്വന്ത് സിൻഹ, അരുൺ ജെയ്‌റ്റ്‌ലി, പി ചിദംബരം... സ്വതന്ത്ര ഇന്ത്യയിലെ പ്രഗല്‍ഭരായ ധനമന്ത്രിമാരുടെ പട്ടികയിലേക്ക് നിർമല സീതാരാമനും. ഇന്ന് (ഫെബ്രുവരി ഒന്ന്) പാർലമെന്‍റില്‍ രണ്ടാം മോദി സർക്കാരിന്‍റെ ബജറ്റ് അവതരിപ്പിച്ചപ്പോഴാണ് നിർമല സീതാരാമൻ ഈ പട്ടികയിലെത്തിയത്. ഇന്ത്യയുടെ ധനമന്ത്രിയായ ശേഷം 2019 മുതലാണ് നിർമല തുടർച്ചയായി ബജറ്റ് അവതരിപ്പിച്ചു തുടങ്ങിയത്.

ദേശീയ ചിഹ്നം പതിച്ച ബജറ്റ്: 2014-15 മുതല്‍ 2018-19 വരെയുള്ള സമയത്താണ് അരുൺ ജെയ്‌റ്റ്‌ലി തുടർച്ചയായി അഞ്ച് ബജറ്റുകൾ അവതരിപ്പിച്ചത്. ഫെബ്രുവരി മാസത്തിലെ അവസാന പ്രവൃത്തി ദിവസം ബജറ്റ് അവതരിപ്പിച്ചുവന്ന രീതി മാറ്റി ഫെബ്രുവരി ഒന്നിന് ബജറ്റ് അവതരിപ്പിക്കുന്ന രീതി കൊണ്ടുവന്നത് 2017ല്‍ അരുൺ ജെയ്‌റ്റ്‌ലിയാണ്. 2019ല്‍ ബജറ്റ് അവതരിപ്പിച്ചപ്പോൾ ഇന്ദിര ഗാന്ധിക്ക് ശേഷം ബജറ്റ് അവതരിപ്പിക്കുന്ന രണ്ടാമത്തെ വനിത എന്ന റെക്കോഡ് നിർമല സീതാരാമൻ സ്വന്തമാക്കിയിരുന്നു. അതേവർഷം തന്നെയാണ് പരമ്പരാഗതമായി ബ്രീഫ് കേസില്‍ ബജറ്റുമായി എത്തുന്ന രീതി മാറ്റി ദേശീയ ചിഹ്നം പതിച്ച ചുവന്ന തുണിയില്‍ ബജറ്റ് കൊണ്ടുവന്ന് അവതരിപ്പിക്കുന്നത് നിർമല സീതാരാമൻ തുടങ്ങിയതും.

പി ചിദംബരം 2003-05 മുതല്‍ 2008-09 വരെയും യശ്വന്ത് സിൻഹ 1998ലും പിന്നീട് അതിന് തുടർച്ചായി 1999-2000 മുതല്‍ 2002-03 വരെയും തുടർച്ചയായി ബജറ്റ് അവതരിപ്പിച്ചു. യശ്വന്ത് സിൻഹയാണ് വൈകിട്ട് അഞ്ചിനുള്ള ബജറ്റ് അവതരണ സമയം മാറ്റി രാവിലെ 11 മുതലാക്കി മാറ്റിയത്. മൻമോഹൻ സിങ് 1991 മുതല്‍ 1996 വരെയുള്ള സമയത്താണ് തുടർച്ചായായി അഞ്ച് ബജറ്റുകൾ അവതരിപ്പിച്ചത്.

റെക്കോഡ് മൊറാർജി ദേശായി: മുൻ പ്രധാനമന്ത്രി കൂടിയായ മൊറാർജി ദേശായിയുടെ പേരിലാണ് ഇപ്പോഴും ഏറ്റവും കൂടുതല്‍ ബജറ്റ് അവതരിപ്പിച്ചുവെന്ന റെക്കോഡുള്ളത്. പത്ത് ബജറ്റുകളാണ് മൊറാർജി ദേശായി അവതരിപ്പിച്ചത്.

നിര്‍മലയുടെ ദൈർഘ്യമേറിയ ബജറ്റ്: 2020ല്‍ രണ്ട് മണിക്കൂർ 42 മിനിട്ട് സമയമെടുത്ത് ഏറ്റവും ദൈർഘ്യമേറിയ ബജറ്റ് അവതരിപ്പിച്ച റെക്കോഡും നിർമല സീതാരാമനാണ്.

പേപ്പര്‍ലെസ് ബജറ്റ് റെക്കോഡും നിര്‍മലയ്‌ക്ക്: കഴിഞ്ഞ കേന്ദ്ര ബജറ്റിലാണ് ആദ്യമായി അച്ചടിച്ച കോപ്പി ഇല്ലാതെ, നിര്‍മല സീതാരാമന്‍ പേപ്പര്‍ലെസ് ബജറ്റ് അവതരിപ്പിച്ചത്. ഇക്കുറിയും അതിന് മാറ്റമില്ല. അച്ചടിച്ച കോപ്പി ഇല്ലാത്തതുകൊണ്ട് തന്നെ പാര്‍ലമെന്‍റ് അംഗങ്ങള്‍ക്കും പൊതുജനങ്ങൾക്കും 'യൂണിയൻ ബജറ്റ് മൊബൈൽ ആപ്പിൽ' ലഭ്യമാകും.