ന്യൂഡല്‍ഹി : രാജ്യതലസ്ഥാനത്ത് ചൊവ്വാഴ്‌ച നടക്കുന്ന ദേശീയ ജനാധിപത്യ സഖ്യത്തിന്‍റെ (NDA) യോഗത്തില്‍ 38 പാര്‍ട്ടികള്‍ പങ്കെടുക്കുമെന്നറിയിച്ച് ബിജെപി അധ്യക്ഷൻ ജെ.പി നദ്ദ. വരാനിരിക്കുന്ന ലോക്‌സഭ തെരഞ്ഞെടുപ്പിന്‍റെ മുന്നോടിയായി എന്‍ഡിഎ മുന്നണി വിളിച്ചുചേര്‍ക്കുന്ന യോഗത്തില്‍ ഇതിനോടകം 38 പാര്‍ട്ടികളുടെ നേതാക്കള്‍ തങ്ങളുടെ പങ്കാളിത്തം ഉറപ്പുനല്‍കിയതായി തിങ്കളാഴ്ച നടത്തിയ വാർത്താസമ്മേളനത്തില്‍ നദ്ദ വ്യക്തമാക്കി. അതേസമയം ബിജെപി നേതൃത്വം നല്‍കുന്ന എന്‍ഡിഎ മുന്നണിക്കെതിരെ പ്രതിപക്ഷ പാര്‍ട്ടികളുടെ രണ്ടാംഘട്ട യോഗം ബെംഗളൂരുവില്‍ നടക്കുന്ന ദിവസം തന്നെയാണ് എന്‍ഡിഎയുടേതും എന്നത് ശ്രദ്ധേയമാണ്.
യോഗം എന്തിന് : നരേന്ദ്രമോദി സർക്കാരിന്‍റെ പദ്ധതികളുടെയും നയങ്ങളുടെയും ഗുണപരമായ സ്വാധീനം മൂലം എൻഡിഎ ഘടകകക്ഷികൾ ഉത്സാഹത്തിലാണെന്ന് ജെ.പി നദ്ദ പറഞ്ഞു. അടുത്തിടെ മഹാരാഷ്‌ട്രയില്‍ കണ്ട രാഷ്‌ട്രീയ നാടകങ്ങളെല്ലാം പരിഗണിച്ചാല്‍, നടക്കാനിരിക്കുന്ന എൻഡിഎ യോഗത്തിൽ പുതുതായുള്ള ബിജെപി സഖ്യകക്ഷികളുടെ സാന്നിധ്യവും പ്രതീക്ഷിക്കുന്നുണ്ട്. ഇവരെ മുന്നണിയുമായി കുറച്ചുകൂടി അടുപ്പിക്കുക എന്നതിനൊപ്പം നിലവില്‍ എന്‍ഡിഎയുമായി പിണങ്ങി നില്‍ക്കുന്ന പാര്‍ട്ടികളെ അടുപ്പിക്കുക എന്നതും യോഗത്തിന്‍റെ പ്രധാന ഉദ്ദേശങ്ങളിലൊന്നാണ്.
കൈകോര്‍ത്ത് പ്രതിപക്ഷം : എന്നാല്‍ 2024ലെ ലോക്‌സഭ തെരഞ്ഞെടുപ്പില്‍ ബിജെപി നേതൃത്വത്തിലുള്ള എന്‍ഡിഎയെ തോല്‍പ്പിക്കാനുള്ള തന്ത്രങ്ങള്‍ക്ക് മൂര്‍ച്ച കൂട്ടിക്കൊണ്ട് പ്രതിപക്ഷ പാര്‍ട്ടികളുടെ രണ്ടാമത്തെ യോഗം ബെംഗളൂരുവില്‍ ഇന്നും നാളെയുമായി നടക്കുകയാണ്. യോഗത്തിന് മുമ്പേ തന്നെ ബിജെപിക്കെതിരെ ആഞ്ഞടിച്ച് കോണ്‍ഗ്രസ് രംഗത്തെത്തിയിരുന്നു. പ്രതിപക്ഷത്തിന്‍റെ ശക്തിക്കെതിരെ പോരാടാന്‍ ബിജെപിയുടെ ആക്കം നഷ്‌ടപ്പെട്ടുവെന്നും അതുകൊണ്ടാണ് പ്രതിപക്ഷ നേതാക്കളുടെ ശബ്‌ദം ഇല്ലാതാക്കാന്‍ അവര്‍ ഏജൻസികളെ ഉപയോഗിക്കുന്നതെന്നുമായിരുന്നു കോണ്‍ഗ്രസിന്‍റെ സംഘടന ചുമതലയുള്ള ജനറല്‍ സെക്രട്ടറി കെ.സി വേണുഗോപാലിന്‍റെ വിമര്‍ശനം.
Also Read: ആദ്യ ദിനം പവാറില്ല, പിണക്കം മാറി ആപ്പ് വരും: പ്രതിപക്ഷ ഐക്യ യോഗം ബെംഗളൂരുവില്‍
ഈ രാജ്യത്തെ ജനാധിപത്യം സംരക്ഷിക്കാനും ഭരണഘടനാപരമായ അവകാശങ്ങളും സ്ഥാപനങ്ങളുടെ സ്വാതന്ത്ര്യവും ഉറപ്പാക്കാനുമാണ് നാം ഒത്തുകൂടിയിരിക്കുന്നത്. ഇവയെല്ലാം തന്നെ ബിജെപി സർക്കാരിന്‍റെ നിലവിലെ ഭരണത്തില്‍ അക്രമിക്കപ്പെട്ടുകൊണ്ടിരിക്കുകയാണ്. പ്രതിപക്ഷത്തിന്‍റെ ശബ്‌ദത്തെ ഇല്ലാതാക്കാനാണ് അവർ ആഗ്രഹിക്കുന്നതെന്നും ഇത് പകപോക്കൽ രാഷ്ട്രീയമാണെന്നും കെ.സി വേണുഗോപാല്‍ കുറ്റപ്പെടുത്തി. പ്രതിപക്ഷത്തിന്‍റെ ശബ്‌ദത്തെ അടിച്ചമർത്താൻ അവർ ഏജൻസികളെ ദുരുപയോഗം ചെയ്യുകയാണെന്നും അദ്ദേഹം പറഞ്ഞു. രാഹുൽ ഗാന്ധിയെ പാര്‍ലമെന്‍റില്‍ നിന്ന് അയോഗ്യനാക്കിയത് അതിന് ഏറ്റവും വലിയ ഉദാഹരണമാണെന്നും മഹാരാഷ്‌ട്രയിൽ നടന്നതും ഇതിന്‍റെ ദൃഷ്ടാന്തമാണെന്നും സംയുക്ത പ്രതിപക്ഷ യോഗത്തിന് മുമ്പ് നടത്തിയ വാര്‍ത്താസമ്മേളനത്തില്‍ കെ.സി വേണുഗോപാല്‍ ആഞ്ഞടിച്ചിരുന്നു.
എന്‍ഡിഎ യോഗത്തിനെതിരെ പരിഹാസം : ബിജെപിക്കും പ്രധാനമന്ത്രിക്കുമെതിരെയും നടക്കാനിരിക്കുന്ന എന്‍ഡിഎ യോഗത്തിനെതിരെയുമായിരുന്നു കോണ്‍ഗ്രസ് നേതാവ് ജയ്‌റാം രമേശിന്‍റെ വിമര്‍ശനം. പ്രതിപക്ഷ പാർട്ടികളെ നേരിടാൻ പ്രധാനമന്ത്രി നരേന്ദ്രമോദി സമാന ചിന്താഗതിയുള്ള പാർട്ടികള്‍ക്കായി തെരച്ചില്‍ വ്യാപിപ്പിച്ചിരിക്കുകയാണ്. പട്‌നയിലെ പ്രതിപക്ഷ യോഗത്തിന് ശേഷമാണ് പ്രധാനമന്ത്രി പെട്ടെന്ന് എൻഡിഎയെക്കുറിച്ച് ചിന്തിക്കുന്നത്. നിലവില്‍ എന്‍ഡിഎയ്ക്ക് പുതുജീവന്‍ പകരാനുള്ള ശ്രമങ്ങളാണ് നടക്കുന്നത്. നാളെ തന്നെ എൻഡിഎ യോഗം വിളിച്ചിരിക്കുന്നതായാണ് റിപ്പോർട്ടെന്നും ഇത് പട്‌നയിലെ മീറ്റിങ്ങിന്‍റെ ഫലമാണെന്നും ജയ്‌റാം രമേശ് പരിഹസിച്ചു.
