ന്യൂഡല്‍ഹി: കുട്ടികള്‍ തങ്ങളുടെ വികാരവും ചിന്തകളും പങ്കുവയ്‌ക്കുന്നതില്‍ മടി കാണിക്കാതിരിക്കണമെങ്കില്‍ മാതാപിതാക്കള്‍ കുട്ടികളുടെ ലിവ്-ഇന്‍ റിലേഷന്‍ഷിപിനെ പിന്തുണക്കണമെന്ന് ദേശീയ വനിത കമ്മിഷന്‍ അധ്യക്ഷ രേഖ ശര്‍മ. രാജ്യത്ത് അടുത്തിടെ സ്‌ത്രീകള്‍ ലിവ്-ഇന്‍ പങ്കാളികളാല്‍ ക്രൂരമായി കൊല്ലപ്പെട്ട സംഭവങ്ങളില്‍ പ്രതികരിച്ചായിരുന്നു രേഖ ശര്‍മയുടെ പ്രസ്‌താവന. ഈ കേസുകളില്‍ ഒന്നും മാതാപിതാക്കള്‍ അവരുടെ മക്കള്‍ ലിവ്-ഇന്‍ റിലേഷന്‍ഷിപ്പില്‍ ആയിരുന്നതിനെ പിന്തുണച്ചിരുന്നില്ലെന്നും ദേശീയ വനിത കമ്മിഷന്‍ അധ്യക്ഷ ചൂണ്ടിക്കാട്ടി.
'നിക്കി യാദവിന്‍റെ കേസില്‍ മറ്റൊരു വിവാഹം കഴിക്കാൻ യുവാവിന്‍റെ മാതാപിതാക്കൾ സമ്മർദം ചെലുത്തുകയായിരുന്നു. മാതാപിതാക്കൾ അവരുടെ കുട്ടിയുടെ ഇഷ്‌ടങ്ങളെ പിന്തുണയ്ക്കുകയും അതിനെ ബഹുമാനിക്കുകയും വേണം. ശ്രദ്ധയുടെ കാര്യത്തിൽ പോലും കുടുംബം അവളുമായി ബന്ധപ്പെട്ടിരുന്നില്ല എന്നത് വ്യക്തമാണ്', രേഖ ശർമ മാധ്യമങ്ങളോട് പറഞ്ഞു.
'തങ്ങളുടെ കുട്ടികള്‍ ലിവ്-ഇന്‍ റിലേഷന്‍ഷിപ്പില്‍ ആണെങ്കില്‍ മാതാപിതാക്കള്‍ അവരെ പിന്തുണയ്‌ക്കണം. നമ്മുടെ കുട്ടികളോട് നമ്മള്‍ ബഹുമാനത്തോടെ പെരുമാറുന്നു എന്ന് ഉറപ്പു വരുത്തുകയും അവരെ നമ്മുടെ സ്വത്ത് ആയി കണക്കാക്കുന്നതില്‍ നിന്ന് വിട്ട് നില്‍ക്കുകയും വേണം. എങ്കില്‍ മാത്രമേ അവരുടെ ചിന്തകള്‍ മാതാപിതാക്കളുമായി അവര്‍ പങ്കുവയ്‌ക്കുകയുള്ളൂ. കുട്ടികളെ, പ്രത്യേകിച്ച് പ്രായപൂര്‍ത്തി ആയതിന് ശേഷം, നമ്മുടെ സുഹൃത്തുക്കളായി കണക്കാക്കേണ്ടത് വളരെ പ്രധാനമാണ്. നമ്മളില്‍ ഒരു വിശ്വാസം അവര്‍ക്ക് ഉണ്ടാകണം', രേഖ ശര്‍മ വ്യക്തമാക്കി.
നിക്കി യാദവ് കൊല കേസ്: ഫെബ്രുവരി 10നാണ് ശ്രദ്ധ വാക്കര്‍ കൊലപാതകത്തിന് സമാനമായി നിക്കി യാദവിനെ ലിവ്-ഇന്‍ പങ്കാളി സാഹില്‍ ഗെലോട്ട് കൊലപ്പെടുത്തിയത്. കാറില്‍ വച്ച് മൊബൈല്‍ ഫോണ്‍ കേബിള്‍ കഴുത്തില്‍ മുറുക്കിയാണ് 24 കാരിയായ നിക്കിയെ സാഹില്‍ കൊല ചെയ്‌തത്. ശേഷം മൃതദേഹം ഡല്‍ഹിയിലെ മിത്രോണ്‍ ഗ്രാമത്തില്‍ സ്ഥിതി ചെയ്യുന്ന തന്‍റെ ധാബയിലെ റഫ്രിജറേറ്ററില്‍ ഇയാള്‍ ഒളിപ്പിച്ചു.
ഇതേ ദിവസം തന്നെ സാഹില്‍ മറ്റൊരു യുവതിയെ വിവാഹം കഴിക്കുകയും ചെയ്‌തു. മിത്രോണ്‍ സ്വദേശിയായ സാഹില്‍ ഗെലോട്ട് നിക്കി യാദവുമായി നീണ്ട നാളുകളായി പ്രണയത്തിലായിരുന്നു. ഇതിനിടെ വീട്ടുകാരുടെ നിര്‍ദേശപ്രകാരം സാഹില്‍ മറ്റൊരു യുവതിയെ വിവാഹം കഴിക്കാന്‍ തീരുമാനിച്ചു. ആദ്യം വിവാഹ വിവരം നിക്കില്‍ നിന്ന് ഇയാള്‍ മറച്ചു വച്ചു.
പിന്നീട് വിവരം അറിഞ്ഞ നിക്കി സാഹിലിനെ ശക്തമായി എതിര്‍ക്കുകയാണ് ഉണ്ടായത്. ഇതേ തുടര്‍ന്നുണ്ടായ തര്‍ക്കങ്ങളും വഴക്കുമാണ് നിക്കിയുടെ കൊലപാതകത്തിലേക്ക് നയിച്ചത് എന്നാണ് പൊലീസ് നല്‍കുന്ന വിവരം. 2018 ല്‍ ഒരു കോച്ചിങ് സെന്‍റിറില്‍ വച്ച് പരിചയപ്പെട്ട നിക്കിയും സാഹിലും സൗഹൃദത്തിലാകുകയും പിന്നീട് ഈ ബന്ധം പ്രണയത്തിലെത്തുകയും ആയിരുന്നു.
നോവായി ശ്രദ്ധ വാക്കര്‍: രാജ്യത്ത് ഏറെ ഞെട്ടലുണ്ടാക്കിയ കൊലപാതകമായിരുന്നു ശ്രദ്ധ വാക്കറുടേത്. 2022 മെയ്‌ 18 നാണ് 28 കാരിയായ ശ്രദ്ധ വാക്കറെ ലിവ്-ഇന്‍ പങ്കാളിയായിരുന്ന അഫ്‌താബ് പൂനെവാല കൊലപ്പെടുത്തി മൃതദേഹം 35 കഷ്‌ണങ്ങളാക്കിയത്. റഫ്രിജറേറ്ററില്‍ സൂക്ഷിച്ചിരുന്ന ശരീര ഭാഗങ്ങള്‍ പിന്നീട് നഗരത്തിന്‍റെ വിവിധ ഭാഗങ്ങളില്‍ ഇയാള്‍ ഉപേക്ഷിക്കുകയായിരുന്നു.
മുംബൈയിലെ കോള്‍ സെന്‍റര്‍ ജീവനക്കാരായിരുന്ന ശ്രദ്ധയും അഫ്‌താബും ഡേറ്റിങ് ആപ് വഴിയാണ് പരിചയപ്പെട്ടത്. ഇരുവരും തമ്മിലുള്ള ബന്ധത്തെ കുടുംബം എതിര്‍ത്തതോടെ ശ്രദ്ധയും അഫ്‌താബും ഡല്‍ഹിയിലേക്ക് താമസം മാറുകയായിരുന്നു. വിവാഹത്തിനായി ശ്രദ്ധ നിര്‍ബന്ധിച്ചതാണ് കൊലപാതകത്തില്‍ കലാശിച്ചത്.
ശ്രദ്ധയെ ബന്ധപ്പെടാന്‍ ശ്രമിച്ചിട്ട് ലഭിക്കാതെ വന്നതോടെ പിതാവ് പൊലീസില്‍ പരാതിപ്പെടുകയായിരുന്നു. തുടര്‍ന്ന് നടന്ന അന്വേഷണത്തിലാണ് ഞെട്ടിക്കുന്ന കൊലപാതക വിവരം പുറംലോകം അറിഞ്ഞത്. ഇയാള്‍ക്ക് മറ്റ് പെണ്‍കുട്ടികളുമായും ബന്ധമുണ്ടായിരുന്നതായാണ് ലഭിക്കുന്ന വിവിരം.
