കൊഹിമ : ഇ-വിധാന്‍ സഭ പദ്ധതി നടപ്പിലാക്കുന്ന രാജ്യത്തെ ആദ്യ സംസ്ഥാനമായി നാഗാലാന്‍ഡ്. പൂര്‍ണമായും കടലാസ് രഹിതമായാണ് നാഗാലാന്‍ഡ് നിയമസഭ ഇന്ന് ചേര്‍ന്നത്. സഭയിലെ 60 അംഗങ്ങളുടേയും മേശകളില്‍ ടാബ്‌ലെറ്റോ ഇ-ബുക്കോ നല്‍കി.
ഇ-വിധാന്‍ സഭ പദ്ധതിക്ക് സമാനമായ ഒരു സംവിധാനം ഹിമാചൽ പ്രദേശിൽ പ്രവർത്തിക്കുന്നുണ്ട്. വിവിധ സംസ്ഥാനങ്ങളിലെ സഭകളും സമാനമായി പദ്ധതി പിന്തുടരാന്‍ ആലോചിക്കുന്നതായി നാഗാലാന്‍ഡ് സ്‌പീക്കർ ശരിങ്കെയ്‌ന്‍ ലോങ്‌കുമേർ പറഞ്ഞു. എല്ലാ നിയമസഭകളും പദ്ധതി നടപ്പിലാക്കിയാല്‍, പാർലമെന്‍റും സംസ്ഥാന നിയമസഭകളും ഏകീകരിച്ച് പ്രവര്‍ത്തിക്കാനാകുമെന്ന് സ്‌പീക്കര്‍ വ്യക്തമാക്കി.
Also read: കേരളത്തിനും നേട്ടമായി തമിഴ്നാട് ബജറ്റ്: മൂന്നിടത്ത് പച്ചക്കറി മൊത്ത വ്യാപാര സമുച്ചയം
എല്ലാ നിയമസഭകളിലെയും നടപടിക്രമങ്ങൾ ഡിജിറ്റലൈസ് ചെയ്യുന്നതിനായാണ് കേന്ദ്രസർക്കാർ ഇ‐വിധാൻ സഭ പദ്ധതി ആവിഷ്‌കരിച്ചിരിയ്ക്കുന്നത്. ഇലക്‌ട്രോണിക് സംവിധാനങ്ങള്‍ ഉപയോഗിച്ചാണ് സഭാ നടപടികള്‍ പുരോഗമിക്കുക. പാർലമെന്‍ററി കാര്യ മന്ത്രാലയത്തിന്‍റെ മേൽനോട്ടത്തിലാണ് പദ്ധതി നടപ്പിലാക്കുന്നത്. ഇതിനുള്ള ചെലവുകൾ 90:10 എന്ന അനുപാതത്തില്‍ കേന്ദ്രവും സംസ്ഥാന സർക്കാരും ചേര്‍ന്നാണ് വഹിയ്ക്കുന്നത്.
