ബെംഗളൂരു : കാഴ്‌ചശക്തി ഇല്ലെന്ന പ്രതിസന്ധിയോട് പടവെട്ടി, 2021ലെ യുപിഎസ്‌സി പരീക്ഷയിൽ 425-ാം റാങ്ക് നേടി കർണാടക സ്വദേശി മേഘന. 2020ൽ യുപിഎസ്‌സിയിൽ 465-ാം റാങ്ക് നേടിയ മേഘന വീണ്ടും പരീക്ഷ എഴുതിയാണ് 2021ലെ പരീക്ഷയില്‍ 425-ാം റാങ്ക് നേടിയത്. കഴിഞ്ഞ ദിവസമാണ് ഫലം പ്രസിദ്ധീകരിച്ചത്.
നിലവില്‍ മേഘന ട്രഷറി വകുപ്പിൽ ജോലി ചെയ്യുകയാണ്. താണ്ഡവ മൂർത്തിയുടെയും നവനീതയുടെയും മകളായ മേഘന ബെംഗളൂരുവിലെ കെങ്കേരിയിലാണ് താമസം. പത്താം ക്ലാസിൽ പഠിക്കുമ്പോൾ നേത്രപടല സംബന്ധമായ പ്രശ്‌നത്തെ തുടർന്ന് മേഘനയുടെ 70 ശതമാനം കാഴ്‌ചശക്തിയും നഷ്‌ടപ്പെട്ടിരുന്നു.
എന്നാൽ പ്രതിസന്ധിയിൽ തളരാതെ കഠിനമായി പ്രയത്നിച്ച് നേട്ടം സ്വന്തമാക്കി മാതൃക ആയിരിക്കുകയാണ് മേഘന. മകളുടെ നേട്ടത്തിൽ മാതാപിതാക്കളും ഏറെ സന്തുഷ്‌ടരാണ്.
