കൊല്‍ക്കത്ത : കല്‍ക്കരി കള്ളക്കടത്ത് മുതല്‍ പശുക്കടത്ത് വരെ നിയമ വിരുദ്ധ പ്രവര്‍ത്തനങ്ങള്‍ നടത്തി കോടീശ്വരരായ ബിനയ് മിശ്ര - ബികാഷ് മിശ്ര സഹോദരന്മാരെ പൂട്ടാനുള്ള പരിശ്രമത്തിലാണ് അന്വേഷണ ഏജന്‍സികള്‍. കണക്കില്‍പ്പെടാത്ത സ്വത്ത് സമ്പാദിച്ചതിനും നിയമ വരുദ്ധ പ്രവര്‍ത്തനങ്ങള്‍ കണ്ടെത്തിയതിനും ബികാഷ് മിശ്ര കേന്ദ്ര ഏജൻസിയുടെ കസ്റ്റഡിയിലാണ്. എന്നാല്‍ ബിനയ് മിശ്ര രാജ്യം വിട്ട് ആൻഡമാനിനടുത്തുള്ള വനാട്ടുദ്വീപില്‍ പൗരത്വം നേടി അവിടെ ഒളിവില്‍ കഴിയുകയാണ്.
2010-നും 2019-നും ഇടയിലാണ് ബികാഷ് മിശ്രയുടെ സമ്പത്ത് കുതിച്ചുയര്‍ന്നത്. ഇയാളുടെ സാമ്പത്തിക വളര്‍ച്ചയില്‍ സംശയം തോന്നിയ സിബിഐയും ഇഡിയും ഇരുവരെക്കുറിച്ചും അന്വേഷണം നടത്തിയതോടെയാണ് ഞെട്ടിക്കുന്ന വിവരങ്ങള്‍ പുറത്തുവന്നത്. കള്ളക്കടത്ത് മുതല്‍ സാമ്പത്തിക ക്രമക്കേട് വരെ നിരവധി നിയമ വിരുദ്ധ പ്രവര്‍ത്തനങ്ങളാണ് ഇരുവരും ചേര്‍ന്ന് നടത്തിയത്.
Also Read: ആയുധം, സ്‌ഫോടക വസ്തു കടത്ത്; ഓടി രക്ഷപ്പെട്ട ഡ്രൈവര്‍ക്കായി തെരച്ചില്‍ ഊര്‍ജിതം
ഈ തുകകള്‍ ഉപയോഗിച്ച് നിരവധി കമ്പനികള്‍ ഇരുവരും നിര്‍മിച്ചു. അസൻസോൾ, ദുർഗാപൂർ പ്രദേശങ്ങളിൽ ആഡംബര വീടുകൾ നിർമിക്കുകയും രാജ്യത്തിന്‍റെ പലഭാഗത്തും വലിയ തോതില്‍ സ്ഥലം വാങ്ങിക്കൂട്ടുകയും ചെയ്‌തു. 7 സ്വകാര്യ കമ്പനികളിൽ ബികാഷ് മിശ്ര ഡയറക്ടറാണ്. ചില കമ്പനികളില്‍ സഹ ഡയറക്ടറുമാണ്. സഹോദരന്‍ വിനയ് മിശ്രയും നിരവധി കമ്പനികളുടെ ഡയറക്ടറാണ്.
അസന്‍സോളിലെ ഇരുവരുടേയും വീടുകള്‍ റെയ്ഡ് ചെയ്തതോടെയാണ് നിയമ വിരുദ്ധപ്രവര്‍ത്തനങ്ങള്‍ പുറത്തുവരുന്നത്. കോടതിയുടെ അനുമതിയോടെ നടത്തിയ റെയ്ഡില്‍ നിരവധി രേഖകള്‍ എജന്‍സികള്‍ക്ക് ലഭിച്ചിട്ടുണ്ട്. കേസുകളില്‍ അന്വേഷണം പുരോഗമിക്കുകയാണെന്ന് ഉദ്യോഗസ്ഥര്‍ അറിയിച്ചു.
