ന്യൂഡല്‍ഹി: നിലവില്‍ ഏറ്റുമധികം ചര്‍ച്ചകള്‍ക്കും വിമര്‍ശനങ്ങള്‍ക്കും ഇടയായിക്കൊണ്ടിരിക്കുന്ന ചിത്രമാണ് സുദീപ് തോ സെന്‍ സംവിധാനം ചെയ്‌ത 'ദി കേരള സ്റ്റോറി'. കേരളത്തില്‍ നിന്ന് 32,000 പെണ്‍കുട്ടികളെ കാണാതായെന്നും ഇവര്‍ പിന്നീട് ഭീകര സംഘടനയായ ഐഎസില്‍ ചേര്‍ന്നെന്നുമാണ് ചിത്രത്തിന്‍റെ ഉള്ളടക്കം. മെയ്‌ അഞ്ചിന് തിയേറ്ററില്‍ റിലീസ് ചെയ്യാനിരിക്കുന്ന ചിത്രത്തിന് പല കോണുകളില്‍ നിന്നും എതിര്‍പ്പുകളുടെ പ്രവാഹമാണ് നേരിടേണ്ടി വരുന്നത്.
കേരളത്തിലെ ഭരണകക്ഷിയായ സിപിഎമ്മും പ്രതിപക്ഷമായ കോണ്‍ഗ്രസും വര്‍ഗീയ അജണ്ടയാണ് ഇതിന് പിന്നിലെന്നും സംസ്ഥാനത്തിന്‍റെ മതസൗഹാര്‍ദം തകര്‍ക്കുവാനുള്ള സംഘപരിവാര്‍ അജണ്ടയാണ് ഇതിന് പിന്നിലെന്നും ഒരേ സ്വരത്തില്‍ പാര്‍ട്ടികളും പറയുന്നു. മുസ്‌ലിം സമുദായത്തിന്‍റെ ഒട്ടാകെ പ്രതിച്ഛായ മനഃപൂര്‍വം അപകീര്‍ത്തിപ്പെടുത്തുന്നതാണ് ചിത്രമെന്ന് ജംഇയ്യത്തുല്‍ ഉലമ-ഇ-ഹിന്ദ് പ്രസിഡന്‍റ് മൗലാന സെയ്യിദ് അര്‍ഷാദ് മദനി ഇടിവി ഭാരതിന് നല്‍കിയ അഭിമുഖത്തില്‍ പറഞ്ഞു.
ഹിന്ദു- ഇസ്ലാം ഐക്യത്തെക്കുറിച്ചുള്ള തന്‍റെ കാഴ്‌ചപ്പാടുകള്‍ മൂന്ന് വര്‍ഷം മുമ്പ് ആര്‍എസ്‌എസ്‌ മേധാവി മോഹന്‍ ഭഗവതുമായി പങ്കുവയ്‌ക്കുവാന്‍ താന്‍ ശ്രമിച്ചിരുന്നുവെന്നും എന്നാല്‍, തന്‍റെ സമുദായത്തില്‍പ്പെട്ടവര്‍ തന്നെ ഇതിനെ എതിര്‍ക്കുകയാണുണ്ടായതെന്നും അദ്ദേഹം പറഞ്ഞു. ഇടിവി ഭാരതുമായി അദ്ദേഹം നടത്തിയ അഭിമുഖത്തിലെ ഏതാനും ഭാഗങ്ങള്‍,
ഇടിവി ഭാരത്: ദി കേരള സ്റ്റോറി എന്ന ചിത്രത്തിന് മേലുള്ള വിവാദങ്ങളെ നിങ്ങള്‍ എങ്ങനെയാണ് നോക്കിക്കാണുന്നത്?
മദനി: ഹിന്ദു- മുസ്‌ലിം ശത്രുതയുടെ വേരുകള്‍ ആഴത്തിലാക്കുവാനുള്ള ആസൂത്രിത ശ്രമത്തിന്‍റെ ഭാഗമാണിത്. എത്ര പെണ്‍കുട്ടികളെ ഐഎസില്‍ ചേര്‍ത്തു എന്നതിനെക്കുറിച്ച് ആഭ്യന്തര മന്ത്രാലയത്തില്‍ നിന്നോ ഐബിയില്‍ നിന്നോ കൃത്യമായ കണക്കുകള്‍ ഉണ്ടോ?. ഇസ്ലാം വിഭാഗത്തെ ആകെ അപകീര്‍ത്തിപ്പെടുത്തുവാനായി മനഃപൂര്‍വം കെട്ടിച്ചമച്ച കഥയാണിത്.
ഇടിവി ഭാരത്: ജംഇയ്യത്തുര്‍ ഇതിന് എങ്ങനെ നേരിടും? നിങ്ങള്‍ കോടതിയെ സമീപിക്കുമോ?
മദനി: ഇസ്ലാം സമുദായത്തെ അപകീര്‍ത്തിപ്പെടുത്തുവാനുള്ള ശ്രമങ്ങള്‍ കുറെക്കാലങ്ങളായി രാജ്യത്ത് നടക്കുന്നുണ്ട്. ഒരു രാഷ്‌ട്രീയ പാര്‍ട്ടിയുടെയോ ഏതെങ്കിലും പ്രത്യേക നേതാവിന്‍റെയോ പേര് പറയാന്‍ ഞാന്‍ ആഗ്രഹിക്കുന്നില്ല. എന്നാല്‍, ഇത്തരം പ്രവര്‍ത്തികള്‍ മതപരമായ സഹവര്‍ത്തിത്വത്തിനും സാമുദായിക സൗഹാര്‍ദത്തിനും ഭീഷണിയാണ്.
ഈ വിഷയത്തില്‍ ഞങ്ങള്‍ ഉടന്‍ സുപ്രീം കോടതിയെ സമീപിക്കും. കോടതി അനുകൂലമായ വിധി പുറപ്പെടുവിക്കുമെന്ന് ഞങ്ങള്‍ വിശ്വസിക്കുന്നു. കേരളത്തില്‍ നിന്ന് എത്ര പേര് ഐഎസില്‍ ചേര്‍ന്നുവെന്ന കൃത്യമായ കണക്കുകള്‍ ചോദിക്കുമ്പോള്‍ അവര്‍ക്ക് ഔദ്യോഗിക ഡാറ്റ ഹാജരാക്കേണ്ടി വരും.
തുടര്‍ന്ന് സത്യം പുറത്തു വരും. നീചമായ പ്രവര്‍ത്തികള്‍ സൃഷ്‌ടിക്കുന്നവരെ സമൂഹത്തിന് മുമ്പില്‍ തുറന്നുകാണിക്കാന്‍ സാധിക്കും.
ഇടിവി ഭാരത്: കര്‍ണാടക, രാജസ്ഥാന്‍ പോലുള്ള സംസ്ഥാനങ്ങളില്‍ വരാനിരിക്കുന്ന 2024ലെ ലോക്‌സഭ തെരഞടുപ്പും വിവാദവുമായി എന്തെങ്കിലും ബന്ധമുണ്ടെന്ന് കരുതുന്നുണ്ടോ?
മദനി: തീര്‍ച്ചയായും, തെരഞ്ഞെടുപ്പിന് ഗുണം ചെയ്യുവാനാണ് ഇതെല്ലാം കെട്ടിച്ചമച്ചത്. ധ്രൂവീകരണവും വിഭാഗീയതയും സമൂഹത്തിന് ഗുണം ചെയ്യില്ല. വിദ്വേഷത്തിന്‍റെ വിത്ത് വിതയ്‌ക്കുക മാത്രമാണ് ചെയ്യുക.
ഇടിവി ഭാരത്: കേരളത്തിൽ ഇതുവരെ വിജയം നേടാന്‍ സാധിക്കാത്തതിനാല്‍ ബിജെപിയും അതിന്‍റെ ആദർശവാദികളായ ആർഎസ്എസും മനഃപൂര്‍വം പ്രചരിപ്പിക്കുന്നതാണ് ഇതെന്ന് ചിലര്‍ പറയുന്നു. അതിനോട് നിങ്ങള്‍ യോജിക്കുന്നുണ്ടോ?
മദനി: അതെ, ഞാന്‍ യോജിക്കുന്നു. കേരളത്തില്‍ ഇന്നേ വരെ ചുവട് ഉറപ്പിക്കുവാന്‍ അവര്‍ക്ക് സാധിച്ചിട്ടില്ല. ഇതിലൂടെ വര്‍ഗീയ ധ്രൂവീകരണം തീവ്രമാവുകയും അവര്‍ക്ക് അനുകൂലമാവുകയും ചെയ്യും. ശാന്തിയ്‌ക്കും സമാധാനത്തിനും ഇത് ദോഷകരമാണ്.
ഇടിവി ഭാരക്: കുറച്ച് മാസങ്ങള്‍ക്ക് മുമ്പ് ഡല്‍ഹിയിലെ ഗവര്‍ണര്‍ നജീബ് ജങ് ഉള്‍പെടെയുള്ള ചില പ്രമുഖ നേതാക്കള്‍ ആര്‍എസ്‌എസ്‌ മേധാവി ഡോ. മോഹന്‍ ഭഗവതുമായി കൂടിക്കാഴ്‌ച നടത്തി. ഇത് ശരിയായ ദിശയില്‍ തന്നെ ഫലപ്രദമായെന്ന് തോന്നുന്നുണ്ടോ?
മദനി: ഇല്ല, ഇതുവരെയും ഏതെങ്കിലും തരത്തില്‍ ഗുണമുണ്ടായി എന്ന് എനിക്ക് തോന്നുന്നില്ല. എന്നാല്‍ അത്തരം കൂടിക്കാഴ്‌ചകള്‍ തുടരണമെന്ന് ഞാന്‍ പറയും. ഇത്തരം കൂടിക്കാഴ്‌ചകള്‍ക്ക് മാത്രമെ ഇരു വിഭാഗങ്ങള്‍ക്കും ഇടയിലുള്ള വിടവ് നികത്തുവാന്‍ സാധിക്കുകയുള്ളു.
ഇടിവി ഭാരത്: വരും ദിവസങ്ങളില്‍ ജംഇയ്യത്തും ആര്‍എസ്‌എസുമായുള്ള കൂടിക്കാഴ്‌ചകള്‍ തുടരുമോ?
മദനി: മൂന്ന് വര്‍ഷം മുമ്പ് ആര്‍എസ്‌എസ്‌ മേധാവി ഡോ. ഭഗവത് ഞങ്ങളെ കൂടിക്കാഴ്‌ച നടത്താന്‍ ക്ഷണിച്ചിരുന്നു. അത് വളരെ മികച്ച ഒരു കൂടിക്കാഴ്‌ചയായിരുന്നു. സമാധാനപരമായ അന്തരീക്ഷം സൃഷ്‌ടിക്കാന്‍ അദ്ദേഹത്താല്‍ കഴിയുന്നത് എന്തും ചെയ്യാമെന്ന് ഉറപ്പ് നല്‍കിയിരുന്നു.
ഞങ്ങള്‍ എല്ലാവരും അതില്‍ വളരെയധികം സന്തുഷ്‌ടരാണ്. മുസ്‌ലിം ഹിന്ദു ഐക്യത്തിന് അനുകൂലമായി ഭഗവത് സംസാരിച്ചപ്പോള്‍ തന്നെ ആര്എസ്എസിനുള്ളില് തന്നെ അദ്ദേഹത്തിന് ചില വെല്ലുവിളികള്‍ നേരിടേണ്ടതായി വന്നു. അതായിരുന്നു ആ കൂടിക്കാഴ്‌ചയുടെ വഴിത്തിരിവ്.
അതിന് ശേഷം ഞങ്ങള്‍ കൂടിക്കാഴ്‌ച നടത്തിയിട്ടില്ല. ഈ വിഷയം ആര്എസ്എസിനുള്ളില് തന്നെ അവതരിപ്പിക്കുവാനും സ്വീകാര്യത കണ്ടെത്തുവാനും ആര്‍എസ്‌എസ്‌ മേധാവിക്ക് തന്നെ വളരെയധികം പ്രയാസമാണ്.
