ചെന്നൈ: മാന്‍ഡോസ് ചുഴലിക്കാറ്റില്‍ തമിഴ്‌നാടിന്‍റെ വിവിധ ഭാഗങ്ങളില്‍ മരങ്ങള്‍ കടപുഴകി വീണു. ചെന്നൈ നഗരത്തിലും പരിസര പ്രദേശങ്ങളിലും വൈദ്യുതി തടസപ്പെട്ടു. ചെന്നൈ കോര്‍പറേഷന്‍ കടപുഴകി വീണ മരങ്ങള്‍ നീക്കം ചെയ്യാനുള്ള നടപടികള്‍ സ്വീകരിച്ചിട്ടുണ്ട്.
തീവ്രത കുറഞ്ഞ് വടക്ക് പടിഞ്ഞാറ് ദിശയിലേക്ക് നീങ്ങുന്ന മാന്‍ഡോസ് ചുഴലിക്കാറ്റ് ഇന്ന് ഉച്ചയോടെ ന്യൂനമര്‍ദമായി മാറുമെന്ന് ചെന്നൈ കാലാവസ്ഥ കേന്ദ്രം അറിയിച്ചിരുന്നു. ചുഴലിക്കാറ്റിനെ തുടര്‍ന്നുണ്ടായ ശക്തമായ മഴയിലും കാറ്റിലും പ്രതീക്ഷിച്ച നഷ്‌ടം സംഭവിച്ചിട്ടില്ലെന്ന് മന്ത്രി കെകെഎസ്‌എസ്‌ആര്‍ രാമചന്ദ്രന്‍ പറഞ്ഞു. പ്രശ്‌നം നിലനില്‍ക്കുന്ന മേഖലകളില്‍ നിന്ന് ആളുകളെ ദുരിതാശ്വാസ കേന്ദ്രങ്ങളിലേക്ക് മാറ്റിയതായി മന്ത്രി അറിയിച്ചു.
205 കേന്ദ്രങ്ങളിലായി 9,000 ത്തിലധികം ആളുകളെയാണ് മാറ്റിപ്പാര്‍പ്പിച്ചത്. ചെന്നൈ മെട്രോയുടെ വിവിധ ഭാഗങ്ങളിലായി നൂറോളം മരങ്ങള്‍ കടപുഴകി വീണിരുന്നു. അവയെല്ലാം നീക്കം ചെയ്‌തിട്ടുണ്ട്. അഞ്ചിടങ്ങളില്‍ വൈദ്യുതി പോസ്റ്റുകളും വീണിരുന്നു. ഇതില്‍ മൂന്നെണ്ണം പുനഃസ്ഥാപിച്ചു.
താത്‌കാലികമായി ഗതാഗതം നിര്‍ത്തിവച്ച മറീന ബീച്ചിലെ കാമരാജര്‍ ശാലയില്‍ ഗതാഗതം പുനരാരംഭിച്ചതായി പൊലീസ് അറിയിച്ചു. ചുഴലിക്കാറ്റ് വിമാനത്താവളത്തെയും ബാധിച്ചതിനാൽ വെള്ളിയാഴ്‌ച രാവിലെ 6 മുതല്‍ ഇന്ന് രാവിലെ 6 വരെയുള്ള 30 ആഭ്യന്തര, അന്തർദേശീയ വിമാന സര്‍വീസുകള്‍ റദ്ദു ചെയ്‌തിരുന്നു.
