വിജയനഗര (കർണാടക): യുവതിയുടെ അറുത്തെടുത്ത തലയുമായി യുവാവ് പൊലീസ് സ്റ്റേഷനിലെത്തി കീഴടങ്ങി. കര്‍ണാടകയിലെ വിജയനഗര ജില്ലയില്‍ കുഡ്‌ലിഗി താലൂക്കിലാണ് സംഭവം. നഴ്‌സിങ് വിദ്യാര്‍ഥിനിയായ നിർമല (21) ആണ് കൊല്ലപ്പെട്ടത്.
സംഭവത്തില്‍ നിര്‍മലയുടെ മുന്‍ കാമുകനും വിവാഹിതനുമായ ബോജരാജയെ (25) ഹൊസഹള്ളി പൊലീസ് അറസ്റ്റു ചെയ്‌തു. നിര്‍മല മറ്റൊരാളുമായി പ്രണയത്തിലായതാണ് ഇയാളെ പ്രകോപിതനാക്കിയത്. അവധിക്ക് നാട്ടിലെത്തിയ നിര്‍മല വീട്ടില്‍ ഒറ്റക്കായിരുന്ന സമയത്ത് പ്രതി മാരകായുധങ്ങളുമായെത്തി കൃത്യം നടത്തുകയായിരുന്നു.
തുടര്‍ന്ന് വെട്ടിയെടുത്ത തലയുമായി ഇയാള്‍ പൊലീസ് സ്റ്റേഷനില്‍ കീഴടങ്ങി. കുഡ്‌ലിഗിയില്‍ ട്രാക്‌ടര്‍ ഡ്രൈവറായ ബോജരാജ വിവാഹിതനാണ്. നിര്‍മലയുടെ ശരീരം വീട്ടില്‍ നിന്ന് കണ്ടെടുത്തതായി പൊലീസ് പറഞ്ഞു.
ഇന്ത്യൻ ശിക്ഷ നിയമത്തിലെ സെക്ഷൻ 302 (കൊലപാതകം), 450 (കുറ്റം ചെയ്യുന്നതിനായി അതിക്രമിച്ച് കടക്കുക) എന്നീ വകുപ്പുകള്‍ പ്രകാരമാണ് ബോജരാജക്കെതിരെ കേസ് രജിസ്റ്റർ ചെയ്‌തിരിക്കുന്നത്. സംഭവത്തില്‍ വിശദമായ അന്വേഷണം നടന്നു വരികയാണ്.
