ന്യൂഡൽഹി: 67 കോടിയിലധികം വ്യക്തികളുടെയും സംഘടനകളുടെയും സ്വകാര്യ വിവരങ്ങൾ മോഷ്‌ടിക്കുകയും കൈവശം വയ്‌ക്കുകയും വിൽപ്പന നടത്തുകയും ചെയ്‌ത സംഭവത്തിൽ കേന്ദ്ര സർക്കാരിനോട് വിശദീകരണം തേടി കോണ്‍ഗ്രസ്. ഇന്ത്യക്കാരുടെ സ്വകാര്യതയ്ക്കും സുരക്ഷയ്ക്കും മേലുള്ള കടന്നുകയറ്റമാണിതെന്ന് വാദിച്ച കോണ്‍ഗ്രസ് സർക്കാർ ഇക്കാര്യത്തിൽ വ്യക്‌തത വരുത്തണമെന്നും ആവശ്യപ്പെട്ടു. കേസുമായി ബന്ധപ്പെട്ട മാധ്യമ റിപ്പോർട്ട് ടാഗ് ചെയ്‌തുകൊണ്ട് കോണ്‍ഗ്രസ് ജനറൽ സെക്രട്ടറി ജയ്റാം രമേശാണ് ട്വിറ്ററിലൂടെ ചോദ്യം ഉന്നയിച്ചത്.
'ഇന്ത്യയിലെ 67 കോടി ജനങ്ങളുടെ സ്വകാര്യ വിവരങ്ങൾ എങ്ങനെ, എന്തുകൊണ്ട് മോഷ്‌ടിക്കപ്പെട്ടു? ആരാണ് സൈന്യത്തിന്‍റെ വിവരങ്ങൾ മോഷ്‌ടിച്ചത്, എങ്ങനെ? ഇത് ഇന്ത്യക്കാരുടെ സ്വകാര്യതയ്ക്കും സുരക്ഷയ്ക്കും മേലുള്ള കടന്നാക്രമണമാണ്. ഇത് അംഗീകരിക്കാനാകില്ല. സർക്കാർ ഇക്കാര്യത്തിൽ വ്യക്‌തത വരുത്തണം. ജയറാം രമേശ് ട്വീറ്റ് ചെയ്‌തു.
ചോർന്നത് 66.9 കോടി ആളുകളുടെ വിവരങ്ങൾ: കഴിഞ്ഞ ദിവസമാണ് 24 സംസ്ഥാനങ്ങളിലെയും എട്ട് മെട്രോപൊളിറ്റന്‍ നഗരങ്ങളിലെയും ഉള്‍പ്പടെ 66.9 കോടി പേരുടെ രഹസ്യവിവരങ്ങള്‍ ചോർത്തുകയും വില്‍പന നടത്തുകയും ചെയ്‌ത വിനയ് ഭരദ്വാജ് എന്നയാളെയാണ് സൈബരാബാദ് പൊലീസ് പിടികൂടിയത്. 104 വിഭാഗങ്ങളിലായി വ്യക്തികളുടെയും സംഘടനകളുടെയും അടക്കം 66.9 കോടി ആളുകളുടെ വിവരങ്ങൾ ഇയാൾ വിൽപ്പന നടത്തിയതായി പൊലീസ് അറിയിച്ചു.
പ്രതിരോധ മേഖലയിലെ ഉദ്യോഗസ്ഥർ, സർക്കാർ ജീവനക്കാർ, പാൻകാർഡ് ഉടമകൾ, 9 മുതൽ 12-ാം ക്ലാസ് വരെയുള്ള വിദ്യാര്‍ഥികള്‍, മുതിര്‍ന്ന പൗരന്മാര്‍, ഡല്‍ഹിയിലെ വൈദ്യുതി ഉപഭോക്താക്കള്‍, ഡി-മാറ്റ് അക്കൗണ്ട് ഉടമകള്‍, വ്യക്തികളുടെ മൊബൈല്‍ ഫോണ്‍ നമ്പറുകള്‍, നീറ്റ് വിദ്യാര്‍ഥികള്‍, സമ്പന്നര്‍, ഇന്‍ഷുറന്‍സ് ഉടമകള്‍, ക്രെഡിറ്റ് ഡെബിറ്റ് കാര്‍ഡ് ഉടമകള്‍ ഉള്‍പ്പടെയുള്ളവരുടെ വിവരങ്ങളാണ് ഇയാൾ ചോർത്തിയതെന്ന് പൊലീസ് വ്യക്‌തമാക്കി.
കൂടാതെ വിവിധ സംസ്ഥാനങ്ങളില്‍ നിന്നുള്ള റോഡ് ട്രാൻസ്പോർട്ട് ഓർഗനൈസേഷനുകൾ, ജിഎസ്‌ടി തുടങ്ങിയവയിലെ ഉപഭോക്താക്കളുടെ വിവരങ്ങള്‍, ഇ കൊമേഴ്‌സ് പോർട്ടലുകൾ, സോഷ്യൽ മീഡിയ പ്ലാറ്റ്‌ഫോമുകൾ, ഫിൻടെക് കമ്പനികൾ, എഡ്യു ടെക് ഓര്‍ഗനൈസേഷനുകള്‍ തുടങ്ങിയവയില്‍ നിന്നുള്ള ഉപഭോക്താക്കളുടെ രഹസ്യ വിവരങ്ങള്‍ എന്നിവയും ഇയാളില്‍ നിന്നും കണ്ടെത്തിയിരുന്നു.
ഹരിയാനയിലെ ഫരീദാബാദ് കേന്ദ്രീകരിച്ച് ഇൻസ്‌പയർവെബ്‌സ് എന്ന വെബ്‌സൈറ്റ് മുഖേന ക്ലൗഡ് ഡ്രൈവ് ലിങ്കുകൾ വഴിയാണ് ഇയാൾ ആവശ്യക്കാർക്ക് ചോർത്തിയെടുത്ത രേഖകൾ വിൽപ്പന നടത്തിയിരുന്നത്. പ്രതിയിൽ നിന്ന് രണ്ട് മൊബൈല്‍ ഫോണുകളും രണ്ട് ലാപ്‌ടോപ്പുകളും, വ്യക്തികളുടെയും സർക്കാർ, സ്വകാര്യ സ്ഥാപനങ്ങളിലെയും ഉള്‍പ്പടെ 135 വിഭാഗങ്ങളിലായുള്ള വിവരങ്ങളും പൊലീസ് കണ്ടെടുത്തിരുന്നു.
വലവിരിച്ച് സൈബർ കുറ്റവാളികൾ: മാർച്ച് 23നും സ്വകാര്യ വിവരങ്ങൾ മോഷ്‌ടിച്ച് വിൽപ്പന നടത്തുന്ന സംഘത്തെ സൈബരാബാദ് പൊലീസ് അറസ്റ്റ് ചെയ്‌തിരുന്നു. ബാങ്കുകളുടേയും സിം കാർഡുകളുടേയും പേരിൽ ഉപഭോക്താക്കൾക്ക് സന്ദേശങ്ങൾ അയക്കുകയും സന്ദേശത്തിൽ ഉള്ള ലിങ്കിൽ ക്ലിക്ക് ചെയ്യുന്നതോടെ ഇവരുടെ വിവരങ്ങൾ ചോർത്തുന്നതുമായിരുന്നു തട്ടിപ്പ് സംഘത്തിന്‍റെ രീതി.
കെവൈസി, ക്രെഡിറ്റ്, ഡെബിറ്റ് കാർഡ് വിവരങ്ങൾ അപ്‌ഡേറ്റ് ചെയ്യുന്നതിനായി എച്ച്‌ഡിഎഫ്‌സി, എസ്‌ബിഐ ബാങ്കുകളുടെ പേരിൽ അടുത്തിടെ ധാരാളം സന്ദേശങ്ങൾ ഉപഭോക്താക്കൾക്ക് ലഭിച്ചിരുന്നു. ഈ വ്യാജ സന്ദേശങ്ങളിലുടെ നിരവധി ആളുകളാണ് പറ്റിക്കപ്പെട്ടത്. പരാതികൾ ഏറിയതോടെ രാജ്യവ്യാപകമായി പൊലീസ് അന്വേഷണം ആരംഭിച്ചിരുന്നു.
