ചെന്നൈ: മദ്രാസ് ഐഐടി കാമ്പസിൽ, മഹാരാഷ്‌ട്ര സ്വദേശിയായ വിദ്യാർഥി ആത്മഹത്യ ചെയ്‌തു. എംഎസ് ഇലക്ട്രിക്കൽ രണ്ടാം വർഷം വിദ്യാര്‍ഥിയായ നവി മുംബൈ സ്വദേശി ശ്രീവൻ സണ്ണി അൽപാട്ടാണ് (25) ജീവനൊടുക്കിയത്. കാമ്പസിലെ മഹാനദി ഹോസ്റ്റലിലാണ് വിദ്യാര്‍ഥിയെ ഫെബ്രുവരി 13ന് രാത്രി മരിച്ച നിലയില്‍ കണ്ടെത്തിയത്.
ശ്രീവൻ രണ്ട് മാസമായി ഗവേഷണ ക്ലാസിൽ സ്ഥിരമായി ഹാജരായിരുന്നില്ല. തുടർന്നുണ്ടായ സമ്മർദത്തിലാണ് ആത്മഹത്യ ചെയ്‌തതെന്നാണ് പ്രാഥമികാന്വേഷണത്തിന് ശേഷം പൊലീസ് ഉദ്യോഗസ്ഥര്‍ പറയുന്നത്. ഒരാഴ്‌ചയായി യുവാവ് വിഷാദത്തില്‍ ആയിരുന്നുവെന്നും പൊലീസ് പറയുന്നു. സംഭവത്തിന് പിന്നാലെ, മറ്റൊരു വിദ്യാര്‍ഥിയും കാമ്പസില്‍ ആത്മഹത്യയ്ക്ക് ശ്രമിച്ചു. കര്‍ണാടക സ്വദേശിയായ വിദ്യാര്‍ഥിയാണ് ജീവനൊടുക്കാന്‍ ശ്രമിച്ചത്.
രണ്ട് സംഭവങ്ങളിലും പൊലീസ് കേസെടുത്ത് അന്വേഷണം ആരംഭിച്ചു. ആത്മഹത്യാശ്രമം നടത്തിയ വിദ്യാര്‍ഥി മാനസിക സമ്മർദത്തിലായിരുന്നുവെന്നും പഠനത്തിൽ കൃത്യമായി ശ്രദ്ധ കേന്ദ്രീകരിക്കാൻ കഴിയുന്നില്ലെന്നും വ്യക്തമായതായി അന്വേഷണ ഉദ്യോഗസ്ഥര്‍ പറഞ്ഞു. പ്രൊഫസർമാരുടെ സമ്മർദത്തെ തുടർന്നാണ് ഈ വിദ്യാർഥികൾ വിഷാദത്തിലായതെന്നാണ് ഐഐടിയിലെ മറ്റ് വിദ്യാര്‍ഥികള്‍ ആരോപിക്കുന്നത്. രണ്ട് സംഭവങ്ങളുടേയും പശ്ചാത്തലത്തില്‍ ഐഐടി വിദ്യാര്‍ഥികള്‍ കാമ്പസിൽ കുത്തിയിരിപ്പ് സമരം നടത്തി.
ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസിക ബുദ്ധിമുട്ടുകളുണ്ടായാല്‍ സഹായത്തിനായി വിളിക്കുക, അതിജീവിക്കാന്‍ ശ്രമിക്കുക. ഹെല്‍പ്‌ലൈന്‍ നമ്പര്‍: 9152987821
