മുംബൈ: 5,000 രൂപയുമായി ദലാല്‍ സ്‌ട്രീറ്റിലെ ഓഹരി വിപണിയിലെത്തിയ ഒരു കോളജ് വിദ്യാര്‍ഥിയില്‍ നിന്ന് രാജ്യത്തെ കോടീശ്വരന്‍മാരുടെ പട്ടികയില്‍ പതിനാലാമനായി മാറിയ രാകേഷ് ജുന്‍ജുന്‍വാല ഇന്ത്യന്‍ നിക്ഷേപ മേഖലയിലെ ഒരു ഇതിഹാസം തന്നെയാണ്. 1960 ജൂലൈ അഞ്ചിന് ഒരു ഇടത്തരം രാജസ്ഥാനി കുടുംബത്തിലായിരുന്നു ജുന്‍ജുന്‍വാലയുടെ ജനനം. അച്ഛന്‍ മുംബൈയില്‍ ആദായനികുതി വകുപ്പ് ഉദ്യോഗസ്ഥനായിരുന്നതിനാല്‍ ജുന്‍ജുന്‍വാലയുടെ വളര്‍ച്ചയും വിദ്യാഭ്യാസവുമെല്ലാം മുംബൈയില്‍ തന്നെയായിരുന്നു.
സൈധനം കോളജ് ഓഫ് കൊമേഴ്‌സ് ആന്‍റ് എക്കണോമിക്‌സില്‍ നിന്ന് ബിരുദം നേടിയ ശേഷം ഇന്‍സ്‌റ്റിറ്റ്യൂട്ട് ഓഫ് ചാര്‍ട്ടേഡ് അക്കൗണ്ടന്‍റ്‌സ്‌ ഓഫ് ഇന്ത്യയില്‍ തുടര്‍പഠനത്തിനായി ചേര്‍ന്നു. ജുന്‍ജുന്‍വാല ഓഹരി വിപണിയില്‍ ആകൃഷ്‌ടനാകുന്നതും അക്കാലത്താണ്. 1985ല്‍ വെറും 5,000 രൂപയുമായി ഓഹരി വിപണിയിലേക്ക് ഇറങ്ങുമ്പോള്‍ വിദ്യാര്‍ഥിയായിരുന്നു ജുന്‍ജുന്‍വാല.
അച്ഛന്‍റെ വാക്കുകളാണ് ജുന്‍ജുന്‍വാലക്ക് ഓഹരി വിപണിയിലെ പരീക്ഷണത്തിന് ഇറങ്ങാന്‍ പ്രചോദനമായത്. 1986ൽ ടാറ്റ ടീയുടെ 5,000 ഓഹരികൾ 43 രൂപയ്‌ക്ക്‌ വാങ്ങുകയും മൂന്ന് മാസത്തിനുള്ളിൽ സ്റ്റോക്ക് 143 രൂപയായി ഉയരുകയും ചെയ്‌തപ്പോൾ അദ്ദേഹം തന്‍റെ ആദ്യത്തെ മികച്ച ലാഭം നേടി. മൂന്ന് വർഷം കൊണ്ട് 20-25 ലക്ഷം രൂപയാണ് ജുന്‍ജുന്‍വാല സമ്പാദിച്ചത്.
1985ൽ ജുൻജുൻവാല 5000 രൂപ മൂലധനമായി നിക്ഷേപിച്ചത്, 2018 സെപ്റ്റംബറോടെ 11,000 കോടി രൂപയായി ഉയർന്നു. അദ്ദേഹം ഓഹരി വിപണിയിലേക്ക് ഇറങ്ങുമ്പോൾ സെൻസെക്‌സ് 150 പോയിന്‍റിലായിരുന്നു വ്യാപാരം നടത്തിയിരുന്നത്. വിദ്യാഭ്യാസം കൊണ്ട് ചാര്‍ട്ടേഡ് അക്കൗണ്ടന്‍റ് ആണെങ്കിലും ഓഡിറ്റിങ് ഒരിക്കലും ജുന്‍ജുന്‍വാലയുടെ മനസ് കീഴടക്കിയില്ല.
ദലാല്‍ സ്‌ട്രീറ്റും നിക്ഷേപവും ഒക്കെയായിരുന്നു അദ്ദേഹത്തിന് പ്രിയം. ടൈറ്റൻ, ക്രിസിൽ, സെസ ഗോവ, പ്രജ് ഇൻഡസ്‌ട്രീസ്, അരബിന്ദോ ഫാർമ, എൻസിസി എന്നിവയിലെല്ലാം ജുൻജുൻവാല വിജയകരമായി നിക്ഷേപം നടത്തി. 2008 ലെ ആഗോള മാന്ദ്യത്തെ തുടർന്ന് അദ്ദേഹത്തിന്‍റെ ഓഹരി വില 30% ഇടിഞ്ഞു, എന്നാൽ 2012 ആയപ്പോഴേക്കും അദ്ദേഹം അതെല്ലാം വീണ്ടെടുത്തു.
ഇന്ത്യയുടെ വാറൻ ബഫറ്റ് എന്നറിയപ്പെടുന്ന അദ്ദേഹത്തിന്‍റെ സ്വപ്‌ന പദ്ധതികളില്‍ ഒന്നായിരുന്നു ആകാശ എയര്‍. ഈ മാസമാണ് മുംബൈയിൽ നിന്ന് അഹമ്മദാബാദിലേക്കുള്ള ആദ്യ വിമാനവുമായി ആകാശ എയർലൈൻ വാണിജ്യ പ്രവർത്തനങ്ങൾ ആരംഭിച്ചത്. സ്റ്റാർ ഹെൽത്ത്, ടൈറ്റൻ, റാലിസ് ഇന്ത്യ, എസ്‌കോർട്ട്‌സ്, കാനറ ബാങ്ക്, ഇന്ത്യൻ ഹോട്ടൽസ് കമ്പനി, അഗ്രോ ടെക് ഫുഡ്‌സ്, നസാര ടെക്‌നോളജീസ്, ടാറ്റ മോട്ടോഴ്‌സ് തുടങ്ങിയ കമ്പനികൾ അദ്ദേഹത്തിന്‍റെ പോർട്ട്‌ഫോളിയോയിൽ ഉൾപ്പെടുന്നു.
ഭാര്യ രേഖ ജുന്‍ജുന്‍വാലയും നിക്ഷേപകയാണ്. വൃക്ക സംബന്ധമായ അസുഖം ഉള്‍പ്പെടെ അലട്ടിക്കൊണ്ടിരുന്ന ജുന്‍ജുന്‍വാലയെ നെഞ്ചുവേദനയെ തുടര്‍ന്നാണ് ഇന്ന്(14.08.2022) രാവിലെ ആശുപത്രിയില്‍ പ്രവേശിപ്പിച്ചത്. ആശുപത്രിയില്‍ വച്ച് തന്നെ മരിക്കുകയായിരുന്നു.
വെറും 5,000 രൂപയില്‍ നിക്ഷേപം തുടങ്ങിയ ബിഗ് ബുള്‍ രാകേഷ് ജുന്‍ജുന്‍വാലയുടെ നിലവിലെ ആസ്‌തി ഏകദേശം 42,000 കോടി രൂപയാണ്.
Also Read പ്രമുഖ വ്യവസായിയും നിക്ഷേപകനുമായ രാകേഷ് ജുൻജുൻവാല അന്തരിച്ചു
