ന്യൂഡൽഹി: കേന്ദ്രസർക്കാരിന്‍റെ കാർഷിക പരിഷ്കരണ നിയമങ്ങൾക്കെതിരെ മെയ് 26ന് കരി ദിനം ആചരിക്കാനുള്ള പദ്ധതി പിൻവലിച്ച് കിസാൻ മോർച്ച. രാജ്യത്തുടനീളമുള്ള കർഷകരും തൊഴിലാളിവർഗവും ഉൾപ്പെടെയുള്ള എല്ലാവരും വീടുകളിലും ഓഫീസുകളിലും കടകളിലും പൊതു സ്ഥലങ്ങളിലും കറുത്ത പതാകകൾ സ്ഥാപിച്ച് കരി ദിനം ആചരിക്കണമെന്ന് ഇന്ന് കിസാൻ മോർച്ച അഭ്യർഥിച്ചിരുന്നു.
എന്നാൽ മെയ് 26 ബുദ്ധ പൂർണിമയായതിനാൽ കരി ദിനം ആചരിക്കുന്നത് രാജ്യത്ത് തെറ്റായ സന്ദേശം നൽകുകയും പ്രസ്ഥാനത്തിന്‍റെ പ്രതിച്ഛായ വീണ്ടും കളങ്കപ്പെടുത്തുകയും ചെയ്യുമെന്നതിനാലാണ് പദ്ധതി പിൻവലിച്ചത്. കരിദിനം ആചരിക്കുന്നതിന് പകരം മെയ് 26 രാവിലെ എട്ടിനും പത്തിനും ഇടയിൽ എല്ലാ പിക്കറ്റിംഗ് സൈറ്റുകളിലും ബുദ്ധ പൂർണിമ ആഘോഷിക്കുമെന്ന് കിസാൻ മോർച്ച പ്രഖ്യാപിച്ചു.
ALSO READ: ബിജെപി പ്രവർത്തകർ കൊല്ലപ്പെട്ട കേസിൽ മൂന്നുപേർ പിടിയിലെന്ന് ബംഗാൾ സർക്കാർ
രാവിലെ ബുദ്ധ പ്രതിമയ്ക്ക് പുഷ്പമാല അർപ്പിച്ചതിനു ശേഷമായിരിക്കും കർഷക നേതാക്കൾ പരിപാടികൾ ആരംഭിക്കുകയുള്ളു. പ്രധാനമന്ത്രി മോദിയുടെ കോലം നാളെ രാജ്യത്തിന്‍റെ വിവിധ ഭാഗങ്ങളിൽ കത്തിക്കാനും കിസാൻ മോർച്ച പദ്ധതിയിടുന്നുണ്ടെന്ന് ഉന്നത വൃത്തങ്ങൾ അറിയിച്ചു. അതേസമയം ഡൽഹി അതിർത്തിയിലെ വിവിധ പ്രതിഷേധ സ്ഥലങ്ങളിലേക്ക് കർഷകരെ അണിനിരത്തുന്നത് വീണ്ടും ആരംഭിച്ചതായും ആയിരക്കണക്കിന് കർഷകർ നാളെ വീണ്ടും ഒത്തുകൂടുമെന്നും റിപ്പോർട്ടുകൾ പറയുന്നു.
