ബെംഗളൂരു: സംസ്ഥാനത്ത് ഏര്‍പ്പെടുത്തിയ കൊവിഡ് നിയന്ത്രണങ്ങളില്‍ ചിലത് പിന്‍വലിച്ച് കര്‍ണാടക. രാത്രി കർഫ്യൂ പിന്‍വലിയ്‌ക്കാനും സ്‌കൂളുകള്‍ തുറന്നു പ്രവര്‍ത്തിക്കാനുമാണ് തീരുമാനം. തിങ്കളാഴ്ച മുതലാണ് ഇത് നടപ്പിലാകുക.
ഒന്നുമുതല്‍ ഒന്‍പത് വരെയുള്ള ക്ളാസുകളാണ് 31-ാം തിയതി മുതല്‍ പുനഃരാരംഭിക്കുക. മഹാരാഷ്ട്ര, കേരളം, ഗോവ എന്നിവിടങ്ങളിൽ നിന്നുള്ളവര്‍ക്ക് നിർബന്ധിത ആർ.ടി.പി.സി.ആർ പരിശോധനകള്‍ തുടരും. മുഖ്യമന്ത്രി ബസവരാജ് ബൊമ്മൈ, കർണാടക റവന്യൂ മന്ത്രി ആർ അശോക, വിദഗ്‌ധ സമിതി എന്നിവരടങ്ങിയ കൊവിഡ് അവലോകന യോഗത്തിലാണ് തീരുമാനം.
ALSO READ: ഗര്‍ഭിണികളെ നിയമിക്കുന്നതിന് നിയന്ത്രണം: വിവാദ സര്‍ക്കുലര്‍ പിന്‍വലിച്ച് എസ്‌.ബി.ഐ
ഒരു ക്ലാസിൽ ആരെങ്കിലും കൊവിഡ് പോസിറ്റീവ് ആണെന്ന് സ്ഥിരീകരിച്ചാല്‍ ആ ക്ലാസ് അടച്ചിടും. തുടര്‍ന്ന് എല്ലാ കുട്ടികളെയും പരിശോധനയ്ക്ക് വിധേയമാക്കും. സ്‌കൂള്‍ സാധാരണപോലെ പ്രവർത്തിക്കുമെന്നും വിദ്യാഭ്യാസ മന്ത്രി ബി.സി നാഗേഷ് പറഞ്ഞു. ക്ലാസ് എത്രനാൾ അടച്ചിടണമെന്ന് ബന്ധപ്പെട്ട ജില്ലയിലെ ഡെപ്യൂട്ടി കമ്മിഷണർ തീരുമാനിക്കുമെന്നും അദ്ദേഹം പറഞ്ഞു.
