ബെംഗളൂരു : പാരമ്പര്യമായി ലഭിച്ച സ്വത്തിന്‍റെ വിഹിതം മരിച്ച പെണ്‍മക്കള്‍ക്ക് നല്‍കാതിരിക്കുന്നത് ഭരണഘടനയുടെ സമത്വങ്ങള്‍ക്ക് വിരുദ്ധമാണെന്ന് കര്‍ണാടക ഹൈക്കോടതി (Karnataka HC on inherited property share). സ്വത്തില്‍ തുല്യപങ്കാളിത്തം മരിച്ച പെണ്‍മക്കള്‍ക്കും ഉറപ്പാക്കണമെന്ന് കോടതി ഉത്തരവിട്ടു (Daughters have equal rights in inherited property).
പെണ്‍മക്കള്‍ക്ക് പാരമ്പര്യ സ്വത്തില്‍ അവകാശമുണ്ടെന്ന ഗഡക് കോടതിയുടെ ഉത്തരവിന്‍റെ അടിസ്ഥാനത്തിലാണ് കര്‍ണാടക ഹൈക്കോടതി ഇങ്ങനെ ഒരു നിരീക്ഷണം നടത്തിയിരിക്കുന്നത്. നര്‍ഗുണ്ട താലൂക്കിലെ ചന്നബസപ്പ ഹോസ്മണി എന്ന ആളുടെ ഹര്‍ജിയിലാണ് ജസ്റ്റിസ് സച്ചിന്‍ ശങ്കര്‍ മഗദം അധ്യക്ഷനായ ഹൈക്കോടതി ബെഞ്ചിന്‍റെ നിര്‍ണായക വിധി (constitutional Rights).
മരിച്ചപോയ സഹോദരിമാരുടെ അനന്തരാവകാശികള്‍ക്ക് പാരമ്പര്യ സ്വത്തില്‍ തുല്യാവകാശം നല്‍കണമെന്ന ഗഡക് കോടതിയിലെ ചീഫ് സിവില്‍ ജഡ്‌ജിയുടെ 2023 ഒക്ടോബര്‍ മൂന്നിലെ വിധി ചോദ്യം ചെയ്‌താണ് ചന്ന ബസപ്പ ഹൈക്കോടതിയെ സമീപിച്ചത്. ഇയാളുടെ സഹോദരിമാരായ നാഗവ്വയും സംഘവ്വയും 2005ലെ ഹിന്ദു പിന്തുടര്‍ച്ച ഭേദഗതി നിയമം നിലവില്‍ വരും മുമ്പ് മരിച്ചതാണെന്നും അത് കൊണ്ട് തന്നെ നിയമം ഇവര്‍ക്ക് ബാധകമല്ലെന്നും അതിനാല്‍ ഉത്തരവ് തിരുത്തണമെന്നും ആവശ്യപ്പെട്ടാണ് ഹൈക്കോടതിയെ സമീപിച്ചത്. മരിച്ചുപോയ സഹോദരിമാര്‍ക്ക് സ്വത്തില്‍ അവകാശമില്ലെന്നും ഇയാള്‍ കോടതിയെ ബോധിപ്പിച്ചു (Karnataka HC)
എന്നാല്‍ പെണ്‍മക്കള്‍ക്കും കുടുംബസ്വത്തില്‍ തുല്യാവകാശമുണ്ടെന്ന് കോടതി ചൂണ്ടിക്കാട്ടി. നിയമം നിലവില്‍ വരും മുമ്പ് മകന്‍ മരിച്ചാല്‍ സ്വത്തില്‍ അവകാശം ഉള്ളത് പോലെ തന്നെ മകള്‍ക്കും ഉണ്ടെന്നും കോടതി നിരീക്ഷിച്ചു. മകള്‍-മകന്‍ എന്ന വിവേചനം അനുവദിക്കാനാകില്ല. ആണ്‍-പെണ്‍ വിവേചനം ഭരണഘടനയിലെ അടിസ്ഥാന മൂല്യങ്ങള്‍ക്കെതിരാണ്. ലിംഗഭേദമില്ലാതെ കുടുംബസ്വത്തില്‍ എല്ലാവര്‍ക്കും അവകാശമുണ്ട്. നിയമം വരും മുമ്പ് മരിച്ചുപോയവര്‍ക്ക് സ്വത്തില്‍ അവകാശം നിഷേധിക്കുന്നത് നേരത്തെയുള്ള ലിംഗ വിവേചനത്തിലേക്ക് നയിക്കും. ഭേദഗതി ചെയ്യപ്പെട്ട നിയമങ്ങളില്‍ നിന്ന് സ്ത്രീകളെ ഒഴിവാക്കിയിട്ടില്ല. എല്ലാവര്‍ക്കും തുല്യാവസരം നല്‍കണമെന്നും കോടതി ചൂണ്ടിക്കാട്ടി.
എങ്ങനെയാണ് മകള്‍ മരിച്ചതെന്ന കാര്യം പോലും ഇക്കാര്യത്തില്‍ പരിഗണിക്കേണ്ടതില്ലെന്നും വീനിത ശര്‍മ്മയുടെ കേസിലെ സുപ്രീം കോടതി ഉത്തരവ് ചൂണ്ടിക്കാട്ടി ഹൈക്കോടതി പറഞ്ഞു. പാരമ്പര്യ സ്വത്ത് ജന്മനാ തന്നെ നേടുന്നതാണ്. മരിച്ചുപോയോ ജീവനോടെ ഉണ്ടോ എന്നകാര്യം പരിഗണിക്കേണ്ടതില്ല. പെണ്‍കുട്ടികളും സ്വത്തില്‍ തുല്യാവകാശികളാണെന്നും കോടതി ആവര്‍ത്തിച്ച് വ്യക്തമാക്കി. അത് കൊണ്ട് തന്നെ സഹോദരിമാരുടെ നിയമവകാശികള്‍ക്ക് സ്വത്തില്‍ അവകാശമുണ്ടെന്നും കോടതി വ്യക്തമാക്കി.
Also Read: ബിൽക്കിസ് ബാനു കേസ്‌; സുപ്രീം കോടതി തിങ്കളാഴ്‌ച വിധി പറയും
