രജനികാന്തുമായി കൂടിക്കാഴ്‌ച നടത്തി സംവിധായകന്‍ ജൂഡ് ആന്തണി ജോസഫ് (Jude Anthany Joseph). ഇതിന്‍റെ ചിത്രങ്ങള്‍ ജൂഡ് ആന്തണി സോഷ്യല്‍ മീഡിയ പേജിലൂടെ പങ്കുവച്ചു (Jude Anthany Joseph Met With Rajinikanth). 'പോസ്‌റ്റ് ചെയ്യുന്നതിന്‍റെ ആവേശം നിര്‍ത്താന്‍ കഴിയില്ല. കൂടുതല്‍ ചിത്രങ്ങള്‍ ഉടന്‍'- രജനികാന്തിനൊപ്പമുള്ള ആദ്യ ചിത്രം പങ്കുവച്ചുകൊണ്ട് ജൂഡ് ഫേസ്‌ബുക്കില്‍ കുറിച്ചു (Jude Anthany Joseph Facebook Post). പിന്നാലെ രജനികാന്തുമായി കൂടിക്കാഴ്‌ച നടത്തുന്നതിന്‍റെ കൂടുതല്‍ ചിത്രങ്ങള്‍ ജൂഡ് ഫേസ്‌ബുക്കില്‍ പോസ്റ്റുചെയ്‌തു.
- " class="align-text-top noRightClick twitterSection" data="">
'തലൈവര്‍ പറഞ്ഞു, എന്തൊരു സിനിമയാണത് ജൂഡ്, നിങ്ങള്‍ എങ്ങനെ ഇത് ചിത്രീകരിച്ചു? അത്ഭുതകരമാണത്. ഓസ്‌കര്‍ യാത്രയുടെ ഭാഗമായി ഞങ്ങള്‍ അദ്ദേഹത്തിന്‍റെ അനുഗ്രഹം തേടി. അപ്പോള്‍ തലൈവര്‍ പറഞ്ഞു, പോയി ഓസ്‌കര്‍ കൊണ്ട് വാ, എന്‍റെ അനുഗ്രഹങ്ങളും പ്രാര്‍ഥനകളും നിങ്ങളോടൊപ്പം ഉണ്ട്. ഈ അവിസ്‌മരണീയ അവസരത്തിന് ദൈവത്തിന് നന്ദി. ഇത് സാധ്യമാക്കിയതിന് പ്രിയ സുഹൃത്ത് സൗന്ദര്യയ്‌ക്കും നന്ദി' - ജൂഡ് കുറിച്ചു.
പോസ്‌റ്റിന് പിന്നാലെ രജനികാന്തിനെയും ജൂഡിനെയും അഭിനന്ദിച്ച് നിരവധി പേര്‍ കമന്‍റ് സെക്ഷനില്‍ എത്തി. 'തലൈവർ 170ന് വേണ്ടി കാത്തിരിക്കുന്നു' - ഒരു ആരാധകന്‍ കമന്‍റ് ചെയ്‌തു. 'തലൈവര്‍ കേരളത്തില്‍'- മറ്റൊരാള്‍ കുറിച്ചു.
- " class="align-text-top noRightClick twitterSection" data="">
'തലൈവര്‍ 170' എന്ന് താത്‌കാലികമായി പേരിട്ടിരിക്കുന്ന സിനിമയുടെ ചിത്രീകരണവുമായി ബന്ധപ്പെട്ട് താരം തിരുവനന്തപുരത്ത് എത്തിയപ്പോഴായിരുന്നു ഈ കൂടിക്കാഴ്‌ച. ജൂഡിനൊപ്പം 2018 സിനിമയുടെ നിര്‍മാതാക്കളായ വേണു കുന്നപ്പള്ളി, ആന്‍റോ ജോസഫ് എന്നിവരും രജനികാന്തിനെ സന്ദര്‍ശിച്ചിരുന്നു.
'തലൈവര്‍ 170'ന്‍റെ ചിത്രീകരണം തിരുവനന്തപുരത്ത് പുരോഗമിക്കുകയാണ്. സിനിമയുടെ ചിത്രീകരണത്തിനായി 10 ദിവസം താരം തിരുവനന്തപുരത്ത് ഉണ്ടാകും. വെള്ളായണി കാര്‍ഷിക കോളജിലും ശംഖുമുഖത്തെ ഒരു വീട്ടിലുമായാണ് സിനിമയുടെ കേരളത്തിലെ ചിത്രീകരണം.
രജനികാന്തിന്‍റെ ഒരു മുഴുനീള ആക്ഷന്‍ ചിത്രമാണ് 'തലൈവര്‍ 170' എന്നാണ് സൂചന. ഒരു വിരമിച്ച മുസ്ലിം പൊലീസ് ഓഫീസറുടെ വേഷത്തിലാണ് സിനിമയില്‍ രജനികാന്ത് പ്രത്യക്ഷപ്പെടുന്നത് എന്നും സൂചനയുണ്ട്. ഒരു വ്യാജ എൻകൗണ്ടറിനെ തുടർന്നുണ്ടാകുന്ന സംഭവ വികാസങ്ങളാണ് ചിത്ര പശ്ചാത്തലം.
ചിത്രത്തില്‍ മൂന്ന് നായികമാരാണുള്ളത്. മലയാളികളുടെ സ്വന്തം ലേഡി സൂപ്പര്‍ സ്‌റ്റാര്‍ മഞ്ജു വാര്യര്‍, ഋതിക സിംഗ്, ദുഷാര വിജയന്‍ എന്നിവരാണ് 'തലൈവര്‍ 170'ല്‍ നായികമാരായി എത്തുന്നത്. ഇവരെ കൂടാതെ ബോളിവുഡ് താരം അമിതാഭ് ബച്ചന്‍, ഫഹദ് ഫാസില്‍, തെലുഗു സൂപ്പര്‍ താരം റാണ ദഗുപതി തുടങ്ങിയവരും ചിത്രത്തില്‍ സുപ്രധാന വേഷത്തില്‍ എത്തുന്നുണ്ട്. നിര്‍മാണ കമ്പനിയായ ലൈക്ക പ്രൊഡക്ഷന്‍സാണ് ഇക്കാര്യം എക്‌സിലൂടെ (ട്വിറ്റര്‍) അറിയിച്ചത്.
