ന്യൂഡൽഹി: ഉദയ്‌പൂർ കൊലപാതകത്തെ അപലപിച്ച് ജംയ്യത്തുല്‍ ഉലമ-ഇ-ഹിന്ദ്. സംഭവം ഇസ്‌ലാമിനും രാജ്യത്തെ നിയമത്തിനും എതിരാണ്. പിന്നില്‍ ആരായാലും ഒരു തരത്തിലും ന്യായീകരിക്കാൻ കഴിയില്ലെന്നും സംഘടന ജനറൽ സെക്രട്ടറി മൗലാന ഹക്കീമുദീൻ ഖാസ്‌മി പ്രസ്‌താവനയില്‍ പറഞ്ഞു.
നമ്മുടെ രാജ്യത്ത് ഒരു നിയമവ്യവസ്ഥയുണ്ട്. അത് കൈയിലെടുക്കാൻ ആർക്കും അവകാശമില്ല. രാജ്യത്തെ പൗരന്മാര്‍ വൈകാരികമായി പ്രതികരിക്കരുതെന്നും സമാധാനം ഉറപ്പുവരുത്തണമെന്നും ഖാസ്‌മി അഭ്യര്‍ഥിച്ചു. അതേസമയം, സംസ്ഥാനത്ത് ഒരു മാസത്തെ നിരോധനാജ്ഞ പ്രഖ്യാപിച്ച് രാജസ്ഥാന്‍ സര്‍ക്കാര്‍. ചൊവ്വാഴ്‌ച അര്‍ധ രാത്രിയോടെയാണ് ഇതുസംബന്ധിച്ച ഉത്തരവ് പുറപ്പെടുവിച്ചത്.
എസ്‌.ഐ.ടി രൂപീകരിച്ച് സര്‍ക്കാര്‍: പ്രവാചകനിന്ദ നടത്തിയ നുപുര്‍ ശര്‍മയെ അനുകൂലിച്ച് സാമൂഹ്യ മാധ്യമത്തില്‍ പോസ്റ്റിട്ട കനയ്യ ലാലിനെ രണ്ടംഗ സംഘം കഴുത്തറുത്ത് കൊന്നതിന് പിന്നാലെയാണ് നടപടി. സംസ്ഥാനത്ത് അതീവ ജാഗ്രതയാണ് ഏര്‍പ്പെടുത്തിയിരിക്കുന്നത്. സമാധാനന്തരീക്ഷം ഉറപ്പുവരുത്താന്‍ രണ്ട് എ.ഡി.ജി.പിമാര്‍ ഉദയ്‌പൂരിലെത്തി. സംഭവത്തെക്കുറിച്ച് അന്വേഷിക്കാൻ സംസ്ഥാന സർക്കാർ പ്രത്യേക അന്വേഷണ സംഘം (എസ്‌.ഐ.ടി) രൂപീകരിച്ചു.
സംഭവത്തില്‍ രണ്ടുപേര്‍ അറസ്റ്റിലായി. ഉദയ്പൂര് സ്വദേശികളായ ഗൗസ് മുഹമ്മദ്, റിയാസ് എന്നിവരാണ് പിടിയിലായത്. തയ്യൽ ജോലിക്കാരനായ കനയ്യ ലാൽ എന്നയാളാണ് കൊല്ലപ്പെട്ടത്. വസ്ത്രം തയ്പ്പിക്കാൻ എന്ന വ്യാജേനയാണ് കൊലപാതകികൾ കടയിലെത്തിയത്. തുടർന്ന് കനയ്യ ലാലിനെ വെട്ടിക്കൊലപ്പെടുത്തി.
ALSO READ| രാജസ്ഥാനില്‍ നൂപുര്‍ ശർമയെ അനുകൂലിച്ച് പോസ്റ്റിട്ടയാളെ കഴുത്തറുത്ത് കൊന്നു
കൊലപാതക ദ്യശ്യങ്ങൾ മൊബൈൽ ഫോണിൽ പകർത്തുകയും സമൂഹ മാധ്യമങ്ങളിലൂടെ പ്രചരിപ്പിക്കുകയും ചെയ്‌തു. വീഡിയോയിൽ പ്രതികളുടെ മുഖം വ്യക്തമായതിനാൽ ഇവർക്കായുളള തെരച്ചിൽ ഊർജിതമാക്കിയിരുന്നു. 'ഞങ്ങളുടെ ദൈവത്തോട് അനാദരവ് കാണിച്ച പ്രതിയെ പാഠം പഠിപ്പിക്കുക എന്ന ലക്ഷ്യം പൂർത്തിയാകുമ്പോൾ ഈ വീഡിയോ വൈറലാക്കും', എന്ന് പ്രതികളിലൊരാൾ പറയുന്നത് വീഡിയോയിൽ വ്യക്തമായിരുന്നു.
ALSO READ| ഉദയ്പൂര് കൊലപാതകം: രണ്ടുപേര്‍ അറസ്റ്റില്‍, ഇന്‍റര്‍നെറ്റ് വിച്ഛേദിച്ചു
