ന്യൂഡല്‍ഹി: അനുദിനം കുതിച്ചുയരുന്ന ഇന്ധനവിലയ്‌ക്കൊപ്പം രാജ്യത്തെ ടോള്‍ നിരക്കിലും ഇന്ന് മുതല്‍ വര്‍ധന. കേന്ദ്ര - സംസ്ഥാന സര്‍ക്കാരുടെ ബജറ്റ് നിര്‍ദേശപ്രകാരം സംസ്ഥാനങ്ങളുടെ നിത്യപയോഗ സാധനങ്ങള്‍ക്കും ഭൂമിക്കും വാഹന കൈമാറ്റത്തിനും ഇന്ന് മുതല്‍ പുതുക്കിയ നിരക്കാണ്. അതിനൊപ്പമാണ് ടോളിലെ നിരക്ക് വര്‍ധനയും.
ദേശീയപാതകളിലെ ടോള്‍ നിരക്കില്‍ 10 രൂപ മുതല്‍ 65 രൂപ വരെയാണ് ഇന്ന് മുതല്‍ അധികം നല്‍കേണ്ടത്. സംസ്ഥാനത്തെ വിവിധ റോഡുകളില്‍ 10 ശതമാനം വരെയാണ് ടോള്‍ നിരക്ക് കൂട്ടിയത്. പാലക്കാട് പന്നിയങ്കര ടോള്‍ പ്ലാസയില്‍ കാറിന് 135 രൂപയില്‍ നിന്ന് 150 രൂപയാക്കി ഉയര്‍ത്തി. തൃശൂര്‍ പാലിയേക്കര ടോള്‍ പ്ലാസയില്‍ നിരക്ക് വര്‍ധനയില്ല.
സാധാരണയായി എല്ലാ സാമ്പത്തിക വര്‍ഷവും എന്‍എച്ച്എഐ ടോള്‍ ടാക്‌സ് പരിഷ്‌കരിക്കാറുണ്ട്. ഇത്തവണയും പതിവ് തെറ്റിയില്ല. തലസ്ഥാന നഗരമായ ഡല്‍ഹിയെ ബന്ധിപ്പിക്കുന്ന ഹൈവേയില്‍ കാറുകള്‍ക്കും ജീപ്പുകള്‍ക്കുമുള്ള ടോള്‍ നികുതി 10 രൂപ വര്‍ധിപ്പിച്ചു. വലിയ വാഹനങ്ങള്‍ക്ക് വണ്‍വേ ടോളില്‍ 65 രൂപയാണ് വര്‍ധിപ്പിച്ചിരിയ്ക്കുന്നത്.
59.77 കിലോമീറ്റര്‍ ദൈര്‍ഘ്യമുള്ള ഡല്‍ഹി- മീററ്റ് എക്സ്പ്രസ്‌വേയിലും ടോള്‍ ചാര്‍ജില്‍ 10 ശതമാനം വര്‍ധിപ്പിച്ചു. തെലങ്കാനയിലെ 29 ടോള്‍പ്ലാസകളിലും തമിഴ്നാട്ടിലെ 28 ടോള്‍ പ്ലാസകളിലും എന്‍എച്ച്എഐ നിരക്ക് വര്‍ധിപ്പിച്ചിട്ടുണ്ട്.
ALSO READ: ത്രിപുര അംബാസയില്‍ തൃണമൂലിന്‍റെ ഏക കൗണ്‍സിലറും ബിജെപിയില്‍
