ബെംഗളൂരു: മെയ്‌ 10ന് നടക്കാനിരിക്കുന്ന കര്‍ണാടക നിയമസഭ തെരഞ്ഞെടുപ്പിനുള്ള പ്രചാരണം ഇന്ന് അവസാനിച്ചു. കഴിഞ്ഞ 40 ദിവസമായി സംസ്ഥാനം സാക്ഷിയായ വീറും വാശിയും നിറഞ്ഞ പ്രചാരണത്തിനാണ് ഇന്ന് സമാപനമായത്. കര്‍ണാടകയിലെ പ്രധാന പാര്‍ട്ടികളായ ബിജെപി, കോണ്‍ഗ്രസ്, ജെഡിഎസ് നേതാക്കളുടെ തെരഞ്ഞെടുപ്പ് പ്രചാരണം ശക്തമാക്കിയിരുന്നു.
അന്തിമ ഘട്ടത്തില്‍ ബിജെപിക്ക് വേണ്ടി പ്രധാനമന്ത്രി നരേന്ദ്ര മോദി നേരിട്ടെത്തിയാണ് പ്രചാരണം നടത്തിയത്. അതേസമയം കോണ്‍ഗ്രസിന് വേണ്ടി രാഹുല്‍ ഗാന്ധിയും പ്രിയങ്ക ഗാന്ധിയുമാണ് കളത്തിലിറങ്ങിയത്. എന്നാല്‍ ജെഡിഎസിനായി മുന്‍ പ്രധാനമന്ത്രി എച്ച്ഡി ദേവഗൗഡ കളത്തിലിറങ്ങി പ്രചാരണം കൊഴുപ്പിച്ചു.
കഴിഞ്ഞ 38 വര്‍ഷമായി സംസ്ഥാനത്ത് മാറിമാറി വരുന്ന സര്‍ക്കാറുകളാണ് ഭരണം നടത്തിയത്. എന്നാല്‍ ഇത്തവണ സീറ്റ് ആര് ഉറപ്പിക്കുമെന്നതില്‍ കടുത്ത മത്സരമാണ് നടക്കുന്നത്. പ്രധാനമന്ത്രി നരേന്ദ്ര മോദിക്കെതിരെ കോണ്‍ഗ്രസ് അധ്യക്ഷന്‍ നടത്തിയ വിഷ പാമ്പ് പരാമര്‍ശവും കോണ്‍ഗ്രസ് പ്രകടന പത്രികയിലെ ബജ്‌റംഗ്‌ദള്‍ നിരോധനവുമെല്ലാം തെരഞ്ഞെടുപ്പ് പ്രചാരണത്തിനിടെയുണ്ടായ ചൂടേറിയ വാര്‍ത്തകള്‍ തന്നെയായിരുന്നു.
2024 ലോക്‌സഭ തെരഞ്ഞെടുപ്പില്‍ പ്രധാന പ്രതിപക്ഷ കക്ഷിയായി തങ്ങളെത്തുന്നതിന് ആക്കം കൂട്ടുന്നതിന് ബിജെപിയില്‍ നിന്ന് അധികാരം പിടിച്ചെടുക്കാനുള്ള കഠിന പരിശ്രമത്തിലാണ് കോണ്‍ഗ്രസ്. അതേസമയം ബിജെപിയ്‌ക്കും കോണ്‍ഗ്രസ് വിട്ടുകൊടുക്കില്ലെന്ന മട്ടില്‍ കര്‍ണാടകയില്‍ സര്‍ക്കാര്‍ രൂപീകരിക്കാനുള്ള ശ്രമത്തിലാണ് ജെഡിഎസ്. 224 അംഗ നിയമസഭയിലേക്കുള്ള തെരഞ്ഞെടുപ്പിന്‍റെ പ്രചാരണ വേളയില്‍ പൂര്‍ണ ഭൂരിപക്ഷത്തോടെയുള്ള വിജയം ലക്ഷ്യം വച്ചാണ് എല്ലാ പാര്‍ട്ടികളും പ്രചാരണത്തിനെത്തിയത്.
പ്രധാനമന്ത്രി നരേന്ദ്ര മോദി നയിക്കുന്ന കേന്ദ്ര സര്‍ക്കാറിന്‍റെ നേട്ടങ്ങള്‍ ഓരോന്നും എണ്ണി പറഞ്ഞ് ബിജെപി പ്രചാരണം നടത്തുമ്പോള്‍ പ്രാദേശിക പ്രശ്‌നങ്ങളും അവയ്‌ക്കുള്ള പരിഹാരങ്ങളും ചൂണ്ടിക്കാട്ടിയായിരുന്നു കോണ്‍ഗ്രസ് പ്രചാരണം മുന്നോട്ട് നീക്കിയത്. ഏപ്രില്‍ 29 മുതല്‍ കഴിഞ്ഞ ഒരാഴ്‌ചക്കുള്ളില്‍ 18 പൊതു യോഗങ്ങളും ആറ് റോഡ് ഷോകളുമാണ് പ്രധാനമന്ത്രിയുടെ നേതൃത്വത്തില്‍ നടന്നത്.
പ്രചാരണത്തിലെ പ്രതീക്ഷയില്‍ ബിജെപി: പ്രധാനമന്ത്രി നരേന്ദ്ര മോദി അടക്കമുള്ള കേന്ദ്ര നേതാക്കളെ ഉള്‍കൊള്ളിച്ചുള്ള പ്രചാരണം സംസ്ഥാനത്തെ വോട്ടര്‍മാര്‍ക്കിടയില്‍ പാര്‍ട്ടിയുടെ മനോവീര്യവും ആത്മവിശ്വാസവും വര്‍ധിപ്പിച്ചുവെന്നാണ് ബിജെപി നേതൃത്വം പറയുന്നത്. വോട്ടര്‍മാരുടെ ഈ ആത്മവിശ്വാസം ബിജെപിക്കുള്ള വോട്ടുകളായി ബാലറ്റ് പൊട്ടിയില്‍ വീഴുമെന്ന പ്രതീക്ഷയിലാണ് നേതാക്കള്‍. പ്രധാനമന്ത്രിക്ക് പുറമെ കേന്ദ്ര ആഭ്യന്തരമന്ത്രി അമിത്‌ഷാ, മന്ത്രി നിര്‍മല സീതാരാമന്‍ എന്നിവരും പ്രചാരണത്തിനിറങ്ങിയിരുന്നു.
പാർട്ടി ദേശീയ അധ്യക്ഷൻ ജെ പി നദ്ദ, ഉത്തർ പ്രദേശ് മുഖ്യമന്ത്രി യോഗി ആദിത്യ നാഥ്, അസമിലെ ഹിമന്ത ബിശ്വ ശർമ, മധ്യപ്രദേശിലെ ശിവരാജ് സിങ് ചൗഹാൻ, ഗോവയിൽ നിന്നുള്ള പ്രമോദ് സാവന്ത്, കേന്ദ്രമന്ത്രിമാരായ എസ് ജയശങ്കർ, സ്‌മൃതി ഇറാനി, നിതിൻ ഗഡ്‌കരി തുടങ്ങിയവരും കര്‍ണാടകയിലെ വിവിധയിടങ്ങളില്‍ ബിജെപിക്ക് വേണ്ടി പ്രചാരണത്തിന് എത്തിയിരുന്നു.
2008ലും 2018ലും കര്‍ണാടകയില്‍ ഭരണം പിടിച്ച ബിജെപി ഇത്തവണയും ഭൂരിപക്ഷത്തോടെയുള്ള ജനവിധിയാണ് പ്രതീക്ഷിക്കുന്നത്. വിജയ സാധ്യത കുറവുള്ള മൈസൂരുവിലും ഇത്തവണ ബിജെപി വലവിരിച്ചിട്ടുണ്ട്.
കോണ്‍ഗ്രസിനിത് നിര്‍ണായക പോരാട്ടം: കര്‍ണാടകയില്‍ വിജയം കൈവരിക്കുക എന്നത് കോണ്‍ഗ്രസ് പാര്‍ട്ടിയെ സംബന്ധിച്ചിടത്തോളം നിര്‍ണായക ഘടകം തന്നെയാണ്. കോണ്‍ഗ്രസിന്‍റെ രാഷ്‌ട്രീയ ഭാവി നിലനിര്‍ത്താന്‍ വിജയം ഉറപ്പാക്കിയേ തീരൂ. മാത്രമല്ല കര്‍ണാടകയിലെ വിജയം കോണ്‍ഗ്രസിന് മുന്നോട്ട് നീങ്ങുന്നതിനുള്ള ഒരു ബൂസ്റ്റര്‍ കൂടിയാണ്.
കര്‍ണാടകയില്‍ വിജയം കൈപിടിയിലൊതുക്കാനായാല്‍ ബിജെപിയുടെ കോട്ടകളായ മറ്റ് സംസ്ഥാനങ്ങളിലെ കോണ്‍ഗ്രസിനെ പുനരുജ്ജീവിക്കാന്‍ അതൊരു ഊര്‍ജമാകുമെന്നതും പ്രത്യേകതയാണ്. കര്‍ണാടകയില്‍ വിജയിച്ചാല്‍ പിന്നീട് മധ്യപ്രദേശ്, ഛത്തീസ്‌ഗഡ്, രാജസ്ഥാൻ എന്നിവിടങ്ങളില്‍ ബിജെപിയുമായി കോണ്‍ഗ്രസ് കടുത്ത ഏറ്റുമുട്ടല്‍ നടത്തുമെന്നും പ്രതീക്ഷിക്കാം.
ഇത് കേന്ദ്രീകരിച്ചാണ് പാർട്ടി ഇത്തവണ വൻ പ്രചാരണ പരിപാടികളിൽ ഏർപ്പെട്ടിരിക്കുന്നത്. തുടക്കത്തിൽ സംസ്ഥാന നേതാക്കളായ സിദ്ധരാമയ്യയേയും ഡി കെ ശിവകുമാറിനെയും കേന്ദ്രീകരിച്ചായിരുന്നു പ്രചാരണം. എന്നാല്‍ മല്ലികാര്‍ജുന്‍ ഖാര്‍ഗെയുടെ സാന്നിധ്യം പ്രചാരണത്തിന് ഏറെ ആക്കം കൂട്ടി. മാത്രമല്ല പ്രിയങ്ക ഗാന്ധിയും രാഹുല്‍ ഗാന്ധിയും ബിജെപിയെ വെല്ലുവിളിച്ചാണ് സംസ്ഥാനത്തെ പ്രചാരണം കൊഴുപ്പിച്ചത്.
കേന്ദ്ര സര്‍ക്കാറിന്‍റെ അഴിമതി ഭരണത്തിന് പകരം കോണ്‍ഗ്രസ് മികച്ച ഭരണം കാഴ്‌ച വയ്‌ക്കുമെന്നും ഇരുവരും ജനങ്ങള്‍ക്ക് വാഗ്‌ദാനം ചെയ്‌തു. പ്രചാരണത്തിന്‍റെ അന്തിമഘട്ടത്തില്‍ സോണിയ ഗാന്ധി ജനങ്ങളെ അഭിസംബോധന ചെയ്‌തതും കോണ്‍ഗ്രസിന് വലിയ നേട്ടമാകുമെന്നാണ് പ്രതീക്ഷ.
മൈസൂരുവിലെ സീറ്റുകള്‍ കാക്കാന്‍ ജെഡിഎസ്: കര്‍ണാടകയിലെ 150 സീറ്റുകള്‍ പിടിച്ചെടുക്കാനാണ് ജെഡിഎസിന്‍റെ ശ്രമം. ആഭ്യന്തര കലഹങ്ങള്‍, കുടുംബ രാഷ്‌ട്രീയം, എന്നിവ ചൂണ്ടിക്കാട്ടിയായിരുന്നു ജെഡിഎസ് പ്രചാരണം നടത്തിയത്. പ്രായാധിക്യ പ്രശ്‌നങ്ങള്‍ കാരണം 89 കാരനായ ദേവഗൗഡ പ്രചാരണത്തില്‍ നിന്ന് വിട്ടു നിന്നെങ്കിലും അന്തിമഘട്ടത്തില്‍ പാര്‍ട്ടിക്കായി രംഗത്തിറങ്ങുകയായിരുന്നു.
ജെഡിഎസ് കോട്ടയായ മൈസൂരുവിലാണ് പാര്‍ട്ടി പ്രചാരണം കൂടുതല്‍ ഊന്നല്‍ നല്‍കിയത്. ബിജെപി വലവിരിക്കാന്‍ ശ്രമിക്കുന്ന മൈസൂരുവില്‍ ബിജെപിയുടെയും കോണ്‍ഗ്രസിന്‍റെയും രാഷ്‌ട്രീയ ഇടപെടലുകളെ ചെറുക്കാനുള്ള ശ്രമത്തിലായിരുന്നു ജെഡിഎസ്. കര്‍ഷകരുടെയും സാധാരണക്കാരുടെയും പ്രശ്‌നങ്ങള്‍ക്ക് പരിഹാരം വാഗ്‌ദാനം ചെയ്‌തായിരുന്നു മൈസൂരുവിലെ ജെഡിഎസ് പാര്‍ട്ടിയുടെ പ്രചാരണം.
മെയ്‌ 10ന് നടക്കുന്ന തെരഞ്ഞെടുപ്പിനായി സംസ്ഥാനമൊട്ടാകെ രാഷ്‌ട്രീയ പാര്‍ട്ടികള്‍ പ്രചാരണ പ്രവര്‍ത്തനങ്ങളും വാഗ്‌ദാനങ്ങളുമായി രംഗത്തെത്തിയിരുന്നെങ്കിലും ജനങ്ങള്‍ ആരെ തെരഞ്ഞെടുക്കുമെന്നത് കാത്തിരുന്നു കാണേണ്ടത് തന്നെയാണ്.
also read: Premier League | ഡി ഗിയയുടെ പിഴവിൽ മാഞ്ചസ്റ്റർ യുണൈറ്റഡിന് തോൽവി; ചാമ്പ്യൻസ് ലീഗ് യോഗ്യത ഭീഷണിയിൽ
