ഗാന്ധിനഗർ: 18നും 45 വയസിനുമിടയിലുള്ള ആളുകൾക്ക് കൊവിഡ് വാക്സിന്‍ നൽകാനുള്ള നടപടികൾ ആരംഭിക്കുമെന്ന് ഗുജറാത്ത് സർക്കാർ. കേന്ദ്രസർക്കാരിന്‍റെ പ്രഖ്യാപന പ്രകാരം 18 നും 45 നും ഇടയിൽ പ്രായമുള്ളവർക്കുള്ള രജിസ്ട്രേഷൻ ബുധനാഴ്ച മുതൽ കോവിൻ പോർട്ടലിൽ ആരംഭിച്ചു. ഈ ഘട്ടത്തിൽ സർക്കാർ, സ്വകാര്യ ആശുപത്രികൾ ഫാർമ കമ്പനികളിൽ നിന്ന് നേരിട്ട് വാക്സിനുകൾ വാങ്ങണം.
സെറം ഇൻസ്റ്റിറ്റ്യൂട്ട് ഓഫ് ഇന്ത്യയിൽ നിന്ന് ഒരു കോടി ഡോസ് കൊവിഷീൽഡ് വാക്‌സിനുകളും ഭാരത് ബയോടെക്കിൽ നിന്ന് 50 ലക്ഷം ഡോസ് കൊവാക്‌സിനും വാങ്ങാന്‍ സംസ്ഥാന സർക്കാർ ഏപ്രിൽ 25 ന് ഉത്തരവിട്ടു. ഈ പ്രായക്കാർക്ക് വാക്സിനുകൾ സൗജന്യമായി നൽകുന്നതിന് ആവശ്യമായ എല്ലാ ക്രമീകരണങ്ങളും സംസ്ഥാന സർക്കാർ ഏർപ്പെടുത്തിയിട്ടുണ്ട്. ഫാർമ കമ്പനികളിൽ നിന്ന് സംസ്ഥാനത്തിന് വാക്സിൻ ഡോസുകൾ ലഭിച്ചുകഴിഞ്ഞാൽ വാക്സിനേഷന്‍ പ്രക്രിയ ആരംഭിക്കും.
വാക്സിന്‍ വിതരണം ആരംഭിക്കാൻ രണ്ട് ദിവസങ്ങൾ മാത്രം ശേഷിക്കെ ഇതുവരെ ഫാർമ കമ്പനികളിൽ നിന്ന് നേരിട്ട് ഡോസുകളൊന്നും ലഭിച്ചിട്ടില്ല. ഇത് മെയ് 1 മുതൽ സംസ്ഥാനത്തിന് വാക്സിനേഷൻ ആരംഭിക്കാൻ കഴിയുമോ എന്ന് ആശങ്ക ഉയർത്തി. വാക്സിനുകൾ ലഭിക്കാൻ സാധ്യതയുള്ള തീയതികളും വിതരണം ചെയ്യുന്ന തീയതിയും സർക്കാർ ഇതുവരെ വ്യക്തമാക്കിയിട്ടില്ല. എന്നിരുന്നാലും 45 വയസ്സിനു മുകളിലുള്ളവർക്കുള്ള വാക്സിനേഷൻ തുടരുമെന്ന് സർക്കാർ അറിയിച്ചിട്ടുണ്ട്.
ബുധനാഴ്ചയാണ് മഹാരാഷ്ട്ര സർക്കാർ 18നും 45 വയസ്സിനിടയിലുള്ളവർക്ക് വാക്സിന്‍റെ ദൗർലഭ്യം മൂലം മെയ് 1 മുതൽ വാക്സിനേഷന്‍ ആരംഭിക്കാൻ കഴിയില്ലെന്ന് അറിയിച്ചത്.
