ന്യൂഡല്‍ഹി: രാജ്യത്തെ പ്രമുഖ വാടക വാഹന സേവന ദാതാക്കളായ യൂബറിനോടും ഒലയോടും സേവനങ്ങളെ സംബന്ധിച്ച കമ്പനിയുടെ പ്രവര്‍ത്തന രീതികളും നയങ്ങളും അറിയിക്കാന്‍ ആവശ്യപ്പെട്ട് കേന്ദ്ര സര്‍ക്കാര്‍. ഉപഭോക്താക്കളുടെ വിവര സംരക്ഷണം, യാത്ര നിരക്ക്, ഡ്രൈവറുടെയും ഉപഭോക്താവിന്‍റേയും സേവനം റദ്ദാക്കല്‍ നിരക്ക് (ക്യാന്‍സലേഷന്‍ ചാര്‍ജ്) തുടങ്ങി നിരവധി വിഷയങ്ങളില്‍ വിശദീകരണം ആവശ്യപ്പെട്ടാണ് കൂടിക്കാഴ്ച. സെന്‍ററല്‍ കണ്‍സ്യൂമര്‍ അഫയേഴ്‌സ് സെക്രട്ടറിയുമായി ചൊവ്വാഴ്ചയാണ് യോഗം.
യൂബറിനും ഒലക്കുമെതിരെ നിരന്തരം പരാതികള്‍ ഉയരുന്ന സാഹചര്യത്തിലാണ് ഇത്തരമൊരു നീക്കവുമായി സര്‍ക്കാര്‍ രംഗത്ത് എത്തിയത്. ബുക്കിങ് സ്വീകരിച്ചതിന് ശേഷം ട്രിപ്പുകൾ റദ്ദാക്കാൻ ഡ്രൈവർമാർ ഉപഭോക്താക്കളെ നിർബന്ധിക്കുന്നതടക്കമുള്ള കാര്യങ്ങള്‍ ചര്‍ച്ചയാകും. ഇത് അന്യായമെന്നാണ് വകുപ്പിന്‍റെ നിലപാട്.
ഇത്തരത്തില്‍ ചെയ്യുമ്പോള്‍ ഉപഭോക്താവ് പണം നല്‍കേണ്ടി വരുന്ന് അംഗീകരിക്കാനാകില്ലെന്നും വകുപ്പ് വ്യക്തമാക്കി. റൈഡ് ക്യാൻസലേഷൻ നയം ഉൾപ്പടെയുള്ള വിഷയങ്ങളില്‍ കമ്പനി മന്ത്രാലയവുമായി ചര്‍ച്ച നടത്തും. ഉപഭോക്താക്കളില്‍ നിന്നും എന്തെല്ലാം ചാര്‍ജുകളാണ് ഈടാക്കുന്നത് എന്നതടക്കമുള്ള കാര്യങ്ങളും കമ്പനി വ്യക്തമാക്കണം.
രണ്ട് വ്യക്തികള്‍ക്ക് ഒരു പ്രദേശത്ത് നിന്ന് മറ്റൊരു പ്രദേശത്തേക്ക് പോകാന്‍ രണ്ട് ചാര്‍ജുകള്‍ ഈടാക്കുന്നത് എങ്ങനെയെന്നും മന്ത്രാലയം ചോദിച്ചു. മാത്രമല്ല ഉപഭോക്താവിന്‍റെ യാത്രവരെ നിയന്ത്രിക്കുന്ന ഇത്തരം ആപ്പുകള്‍ സ്വകാര്യ വിവര സംരക്ഷണത്തിനായി ഉപയോഗിച്ച അവരുടെ സംവിധാനങ്ങളെ കുറിച്ചും സര്‍ക്കാര്‍ ആരായും. ഇത്തരം വിഷയങ്ങല്‍ സംബന്ധിച്ച ചോദ്യങ്ങള്‍ നിലവില്‍ ആവശ്യപ്പെട്ടിട്ടുണ്ടെന്നും. ചര്‍ച്ചയ്ക്ക് ശേഷം തുടര്‍ നടപടി ഉണ്ടാകുമെന്നും കമ്പനി അറിയിച്ചു.
യാത്ര റദ്ദാക്കാന്‍ ഡ്രൈവര്‍മാര്‍ ആവശ്യപ്പെടുന്ന വിഷയത്തില്‍ കടുത്ത നടപടി ഉണ്ടാകുമെന്നും കമ്പനിയെ സര്‍ക്കാര്‍ അറിയിച്ചിട്ടുണ്ട്. പുതിയ ഉപഭോക്താക്കളെ ചേര്‍ക്കാനായി സ്വീകരിക്കുന്ന നടപടികള്‍ കാരണം പഴയ ഉപഭോക്താക്കള്‍ക്ക് കൂടുതല്‍ പ്രശ്നങ്ങള്‍ ഉണ്ടാകുന്ന സാഹചര്യമുണ്ട്. ഇതിനെതിരെ ശക്തമായ നടപടി സ്വീകരിക്കുമെന്നും വകുപ്പ് അറിയിച്ചു.
Also Read: Uber booking via WhatsApp: വാട്ട്സ്‌ആപ്പ് വഴിയും യൂബർ ബുക്ക്‌ ചെയ്യാം, പദ്ധതി ആദ്യം ഇന്ത്യയിൽ
