പനാജി: ഗോവയില്‍ ഇന്ന് സംസ്ഥാന മുഖ്യമന്ത്രിയെ പ്രഖ്യാപിക്കും. ഇതിനായി ബി.ജെ.പി നിയമസഭ കക്ഷിയോഗം വൈകിട്ട് നാലിന് പനാജിയിലെ പാര്‍ട്ടി ഓഫിസില്‍ ചേരും. കേന്ദ്രമന്ത്രിമാരായ നരേന്ദ്ര സിങ് തോമറും എൽ മുരുഗനും യോഗത്തിൽ പങ്കെടുക്കും.
മുഖ്യമന്ത്രിയുടെ പേരിനുപുറമെ സത്യപ്രതിജ്ഞ തിയതിയും തീരുമാനിക്കും. ഗോവ ബി.ജെ.പി അധ്യക്ഷന്‍ സദാനന്ദ് തനവാഡെ ഞായറാഴ്ചയാണ് ഇതുസംബന്ധിച്ച വിവരം മാധ്യമങ്ങളെ അറിയിച്ചത്. അതേസമയം, പാർട്ടി ഏൽപ്പിക്കുന്ന ഏത് ഉത്തരവാദിത്വവും സ്വീകരിക്കുമെന്ന് മുഖ്യമന്ത്രി സ്ഥാനാർഥി കൂടിയായ പ്രമോദ് സാവന്ത് പറഞ്ഞിരുന്നു. തന്‍റെ പാർട്ടിയ്‌ക്ക് 20 സീറ്റ് നേടാൻ കഴിഞ്ഞതിൽ സന്തോഷമുണ്ടെന്നും അദ്ദേഹം മാധ്യമങ്ങളോട് പറഞ്ഞു.
സർക്കാർ രൂപീകരിക്കുന്നത് സംബന്ധിച്ച് സംസാരിക്കുന്നതിനായി ബി.ജെ.പി നേതാക്കള്‍ ഗവർണർ പി.എസ് ശ്രീധരൻ പിള്ളയെ കാണും. സർക്കാർ രൂപീകരണ ചർച്ചകൾക്കായി ശനിയാഴ്‌ച ഡൽഹിയിലെത്തിയ സാവന്ത്, കേന്ദ്ര ആഭ്യന്തര മന്ത്രി അമിത് ഷായെ കണ്ടിരുന്നു. 40 അംഗ നിയമസഭയില്‍ 20 സീറ്റുകൾ നേടിയാണ് ബി.ജെ.പി ഗോവയിൽ ഏറ്റവും വലിയ ഒറ്റക്കക്ഷിയായത്. 11 സീറ്റുകളാണ് കോൺഗ്രസ് നേടിയത്.
