ബെംഗളൂരു: കര്‍ണാടകയിലെ മുന്‍ മന്ത്രിയും ബിജെപി നേതാവുമായ സിപി യോഗീശ്വരയുടെ ബന്ധുവിനെ മരിച്ച നിലയില്‍ കണ്ടെത്തി. യോഗീശ്വരയുടെ ഭാര്യ സഹോദരന്‍ മഹാദേവയ്യയെയാണ് മരിച്ച നിലയില്‍ കണ്ടെത്തിയത്. ചാമരാജനഗര്‍ രാമപുരയിലെ വനമേഖലയില്‍ നിന്നാണ് മൃതദേഹം കണ്ടെടുത്തത് (Former Karnataka Minister CP Yogeeshwara).
തലയ്‌ക്ക് ഗുരുതരമായി പരിക്കേറ്റ നിലയിലാണ് മൃതദേഹം കണ്ടെത്തിയത്. ഡിസംബര്‍ ഒന്നിന് മഹാദേവയ്യയെ ചന്നപട്ടണയില്‍ നിന്നും കാണാതായിരുന്നു. സംഭവത്തെ തുടര്‍ന്ന് മകന്‍ പ്രശാന്ത് പിതാവിനെ കാണാനില്ലെന്ന് പൊലീസില്‍ പരാതി നല്‍കിയിരുന്നു. പരാതിയുടെ അടിസ്ഥാനത്തില്‍ അന്വേഷണം പുരോഗമിക്കുന്നതിനിടെയാണ് മൃതദേഹം കണ്ടെത്തിയത് (Mahadevaiah Found Dead).
കേസില്‍ അന്വേഷണം നടത്താന്‍ ചാമരാജനഗര്‍ പൊലീസ് പ്രത്യേക അന്വേഷണ സംഘത്തെ രൂപീകരിച്ചിരുന്നു. അന്വേഷണത്തിനിടെ കഴിഞ്ഞ ദിവസം ഹനൂരില്‍ നിന്നും മഹാദേവയ്യയുടെ കാര്‍ പൊലീസ് കണ്ടെത്തിയിരുന്നു (Mahadevaiah Murder Case). കാര്‍ കണ്ടെത്തിയതിനെ തുടര്‍ന്ന് ഹനൂരിലും പരിസര പ്രദേശങ്ങളിലുമെല്ലാം പൊലീസ് പരിശോധന ശക്തമാക്കിയിരുന്നു (Channapatna in Chamarajanagara).
കാര്‍ കാണപ്പെട്ട സ്ഥലത്ത് നിന്നും ആറ് കിലോമീറ്റര്‍ അകലെയുള്ള കൊടും കാട്ടിലാണ് മൃതദേഹം കണ്ടെത്തിയത്. സമീപ പ്രദേശങ്ങളിലെ സിസിടിവി ക്യാമറകള്‍ പരിശോധിച്ച പൊലീസിന് സ്ഥലത്ത് ഏതാനും അജ്ഞാതരുടെ സാന്നിധ്യം കണ്ടെത്താന്‍ കഴിഞ്ഞിട്ടുണ്ട്. തട്ടികൊണ്ടു പോയി കൊലപ്പെടുത്തിയതാകാമെന്നാണ് പൊലീസിന്‍റെ പ്രാഥമിക നിഗമനം. സിസിടിവി ദൃശ്യങ്ങള്‍ അടക്കം പരിശോധിച്ച് പൊലീസ് അന്വേഷണം ഊര്‍ജിതമാക്കിയിരിക്കുകയാണ് (Kidnap Case Karnataka).
