മുംബൈ: ബോളിവുഡ് താരം ഷാരൂഖ് ഖാന്‍റെ മകൻ ആര്യൻ ഖാനൊപ്പം മയക്കുമരുന്ന് കേസിൽ അറസ്റ്റിലായ നടി മുൻമുൻ ധമേച്ച ഞായറാഴ്ച ജയില്‍ മോചിതയാകും. ബോണ്ട് നടപടികൾ പൂർത്തിയാക്കിയ ശേഷം ശനിയാഴ്ച വൈകുന്നേരമാണ് ധമേച്ചയുടെ വിടുതൽ ഉത്തരവ് വന്നത്.
ആര്യൻ ഖാൻ, അർബാസ് മർച്ചന്‍റ്, മുൻമുന്‍ ധമേച്ച എന്നിവരുടെ ജാമ്യാപേക്ഷ പരിശോധിച്ച ബോംബെ ഹൈക്കോടതി, എല്ലാ വെള്ളിയാഴ്ചയും എൻ.സി.ബി ഓഫീസിൽ ഹാജരാകാൻ ആവശ്യപ്പെട്ടിരുന്നു. രാവിലെ 11.00 മുതൽ ഉച്ചയ്ക്ക് രണ്ടുവരെയാണ് ഇതിനായി കോടതി സമയം നല്‍കിയത്. മൂന്ന് ദിവസത്തെ വാദം കേൾക്കലിന് ശേഷം വ്യാഴാഴ്‌ചയാണ് കോടതി ജാമ്യം അനുവദിച്ചത്.
ALSO READ: കന്നഡ സൂപ്പർതാരം പുനീത് രാജ്‌കുമാറിന്‍റെ സംസ്‌കാരം വൈകിട്ട് മൂന്നിന്
അതേസമയം, ഒക്‌ടോബര്‍ 30 ന് ആര്യൻ ഖാൻ ജയിൽ മോചിതനായി. പിതാവ് ഷാരൂഖ് ഖാൻ മകനെ സ്വീകരിക്കാനായി ആർതർ റോഡ് ജയിലിൽ എത്തി. രാവിലെ 11 മണിയോടെ സുരക്ഷ ജീവനക്കാരുടെ അകമ്പടിയോടെയാണ് താരപുത്രന്‍ ജയില്‍ നിന്നിറങ്ങി വീട്ടിലേക്ക് മടങ്ങിയത്.
