ന്യൂഡല്‍ഹി: നക്സല്‍ പോരാട്ടം ശക്തമായ മേഖലകളില്‍ വനിതകളെയും വിന്യസിക്കുമെന്ന് സിആര്‍പിഎഫ് മേധാവി അറിയിച്ചു. സിആര്‍പിഎഫിന്‍റെ നക്സല്‍ വിരുദ്ധ വിഭാഗമായ കോബ്രാ ഫോഴ്സിലാണ് സ്ത്രീകളെ ഉള്‍പ്പെടുത്താനുള്ള നീക്കം നടക്കുന്നത്. അടുത്ത മാസം 28ന് വിരമിക്കുന്ന സിആര്‍പിഎഫ് ഡയറക്ടര്‍ ജനറല്‍ എ പി മഹേശ്വരിയാണ് ഇക്കാര്യം അറിയിച്ചത്.
തീവ്രവാദികളെയും കലാപകാരികളെയും കൈകാര്യം ചെയ്യുന്നതിനായി ഗൊറില്ല, ജംഗിൾ വാർഫയർ തരത്തിലുള്ള പ്രവർത്തനങ്ങൾക്കായി കമാൻഡോ ബറ്റാലിയൻ ഫോർ റിസല്യൂട്ട് ആക്ഷന്‍റെ (കോബ്ര) അറ്റാച്ച് ചെയ്യാത്ത 10 ബറ്റാലിയനുകൾ അനുവദിച്ച് ആഭ്യന്തര മന്ത്രാലയം അനുമതി നൽകിയിരുന്നു. 2008-09 ൽ കോബ്രാ സേനയുടെ ഭാഗമായി രണ്ട് ബറ്റാലിയനുകൾ വര്‍ദ്ധിപ്പിച്ചിരുന്നു. 2009-10 ൽ ബറ്റാലിയന്‍റെ എണ്ണം നാലായി വര്‍ദ്ധിപ്പിച്ചു. പിന്നീട്, 2010-11 ൽ നാല് ബറ്റാലിയൻ കൂടി സേനയുടെ ഭാഗമാക്കി. ഇതാദ്യമായാണ് സ്ത്രീകളെ കോബ്രാ സേനയിൽ ഉൾപ്പെടുത്തുന്നത്.
