ഹൈദരാബാദ് : കഴിഞ്ഞ 24 മണിക്കൂറില്‍ ഇന്ത്യയിലെ കൊവിഡ് കേസുകളുടെ എണ്ണത്തില്‍ ഗണ്യമായ വര്‍ധന. രാജ്യത്ത് 423 പുതിയ കൊവിഡ് കേസുകള്‍ റിപ്പോര്‍ട്ട് ചെയ്‌തതായി കേന്ദ്ര ആരോഗ്യ മന്ത്രാലയത്തിന്‍റെ കണക്കുകള്‍ സൂചിപ്പിക്കുന്നു. കേരളം, കര്‍ണാടക എന്നിവിടങ്ങളിലാണ് ഏറ്റവും കൂടുതല്‍ കൊവിഡ് രോഗികളുള്ളത്.
266 പേര്‍ക്കാണ് കേരളത്തില്‍ കൊവിഡ് സ്ഥിരീകരിച്ചിട്ടുള്ളത്. കര്‍ണാടകയില്‍ നിന്ന് 70 കേസുകളാണ് റിപ്പോര്‍ട്ട് ചെയ്‌തിട്ടുള്ളത്. കഴിഞ്ഞ 24 മണിക്കൂറിനിടെ കൊവിഡ് ബാധിച്ച് നാല് പേരാണ് മരിച്ചത്. കേരളത്തില്‍ നിന്നും രണ്ട് പേരും കര്‍ണാടക, രാജസ്ഥാന്‍ എന്നിവിടങ്ങളില്‍ നിന്നും ഓരോരുത്തര്‍ വീതവുമാണ് കൊവിഡ് ബാധിച്ച് മരിച്ചിട്ടുള്ളത്. ഇതോടെ കൊവിഡ് മരണ നിരക്ക് 1.19 ശതമാനമായി ഉയര്‍ന്നു.
കേരളത്തില്‍ പരിശോധന കൂടുതല്‍: ഇന്ത്യയിലെ മറ്റ് സംസ്ഥാനങ്ങളെ അപേക്ഷിച്ച് കേരളത്തില്‍ സാമ്പിള്‍ ടെസ്റ്റുകളുടെ എണ്ണം കൂടുതലായത് കൊണ്ടാണ് രോഗികളുടെ എണ്ണം വര്‍ധിക്കാന്‍ കാരണമെന്ന് ആരോഗ്യ മന്ത്രി വീണ ജോര്‍ജ് പറഞ്ഞു (Kerala Health Minister Veena George).
ബിഹാറില്‍ ആര്‍ടിപിസിആര്‍ നിര്‍ബന്ധം: പട്‌ന, ഗയ, ദർഭംഗ വിമാനത്താവളങ്ങള്‍ വഴിയെത്തുന്ന മുഴുവന്‍ യാത്രക്കാരെയും ആര്‍ടിപിസിആര്‍ പരിശോധനക്ക് വിധേയരാക്കണമെന്ന് ബിഹാര്‍ സര്‍ക്കാര്‍ മുഴുവന്‍ ജില്ലകള്‍ക്കും നിര്‍ദേശം നല്‍കി. രോഗ ലക്ഷണങ്ങളുമായി ആശുപത്രിയിലെത്തുന്ന മുഴുവന്‍ രോഗികളെയും പരിശോധനക്ക് വിധേയരാക്കാന്‍ ആശുപത്രികള്‍ക്കും നിര്‍ദേശം.
അസമില്‍ ആശങ്ക വേണ്ട: സംസ്ഥാനത്ത് കൊവിഡ് 19 സാഹചര്യത്തെ കുറിച്ച് ആശങ്കപ്പെടേണ്ട സാഹചര്യമില്ലെന്ന് അസം ആരോഗ്യമന്ത്രി കേശബ് മഹന്ത പറഞ്ഞു (Covid In Assam).
കര്‍ണാടകയില്‍ പ്രത്യേക സംഘം: സംസ്ഥാനത്തെ കൊവിഡ് സാഹചര്യം നിരീക്ഷിക്കാന്‍ പ്രത്യേക സംഘം രൂപീകരിച്ച് കര്‍ണാടക മുഖ്യമന്ത്രി സിദ്ധരാമയ്യ. ജനങ്ങള്‍ പരിഭ്രാന്തരാകരുതെന്ന് അദ്ദേഹം പറഞ്ഞു. തിരക്കേറിയ സ്ഥലങ്ങളിലും ജനങ്ങള്‍ ഒത്തുചേരുന്നയിടങ്ങളിലും മാസ്‌ക് ധരിക്കണമെന്നും സിദ്ധരാമയ്യ നിര്‍ദേശം നല്‍കി (Karnataka Chief Minister Siddaramaiah).
ജെഎന്‍ 1 അപകട സാധ്യത കുറവ്: ബിഎ 2.86ന്‍റെ വകഭേദമാണ് ജെഎന്‍ 1 എന്ന് ലോകാരോഗ്യ സംഘടന (World Health Organization). നിലവിലെ പഠനങ്ങളുടെ അടിസ്ഥാനത്തില്‍ ജെഎന്‍ 1ന് അപകട സാധ്യത കുറവാണെന്നും ഡബ്ല്യൂഎച്ച്ഒ. എന്നാല്‍ അമിത ശൈത്യം അനുഭവപ്പെടുന്ന രാജ്യങ്ങളില്‍ ഇത് അപകടങ്ങള്‍ക്ക് കാരണമാകുന്നുണ്ടെന്നും പഠനങ്ങള്‍ പറയുന്നു (JN.1).
അമിത തണുപ്പ് അനുഭവപ്പെടുന്നയിടങ്ങളില്‍ ഇത് ശ്വാസ കോശ സംബന്ധമായ പ്രശ്‌നങ്ങള്‍ക്ക് കാരണമാകുന്നുണ്ട്. എന്നാല്‍ ജെഎന്‍1 അടക്കമുള്ള കൊവിഡ് വകഭേദങ്ങള്‍ക്ക് നിലവില്‍ ലഭ്യമാകുന്ന വാക്‌സിനുകള്‍ ഫലപ്രദമാണെന്നാണ് ലോകാരോഗ്യ സംഘടന വ്യക്തമാക്കി.
Also read: കൊവിഡ് അവലോകന യോഗം: ആശങ്ക വേണ്ട, ജാഗ്രത മതിയെന്ന് കേന്ദ്രം; കിട്ടാനുള്ള ഫണ്ട് വേണമെന്ന് കേരളം
