ന്യൂഡൽഹി: കേന്ദ്ര ആരോഗ്യ മന്ത്രാലയം ബുധനാഴ്‌ച പ്രസിദ്ധീകരിച്ച കണക്കുകൾ പ്രകാരം ഇന്ത്യയിൽ 2,151 പുതിയ കൊവിഡ് കേസുകളുടെ പ്രതിദിന വർദ്ധനവ്. അഞ്ച് മാസത്തിനിടയിലെ ഏറ്റവും ഉയർന്ന പ്രതിദിന കേസുകളാണിത്. ഇതോടെ ആകെ സജീവ കോവിഡ് കേസുകൾ 11,903 ആയി ഉയർന്നു.
രാജ്യത്താകെ ഇതുവരെ റിപ്പോർട്ട് ചെയ്‌ത കോവിഡ് കേസുകളുടെ എണ്ണം 4.47 കോടിയായി (4,47,09,676). ഏഴ് കൊവിഡ് മരണങ്ങളും റിപ്പോർട്ട് ചെയ്‌തിട്ടുണ്ട്. ഇതോടെ ആകെ കൊവിഡ് മരണങ്ങൾ 5,30,848 ആയി ഉയർന്നു. രാവിലെ 8 മണിക്ക് പുറത്തുവിട്ട വിവരങ്ങളുടെ അടിസ്ഥാനത്തിൽ പ്രതിദിന പോസിറ്റിവിറ്റി 1.51 ശതമാനവും പ്രതിവാര പോസിറ്റിവിറ്റി 1.53 ശതമാനവുമാണ്.
ഇപ്പോൾ സജീവമായ കേസുകൾ മൊത്തം അണുബാധകളുടെ 0.03 ശതമാനമാണ്. അതേ സമയം കേസിലെ മരണനിരക്ക് 1.19 ശതമാനമാണ്. മന്ത്രാലയത്തിന്‍റെ വെബ്‌സൈറ്റ് അനുസരിച്ച്, രാജ്യവ്യാപകമായി കൊവിഡ് വാക്‌സിനേഷൻ ഡ്രൈവിന് കീഴിൽ ഇതുവരെ 220.65 കോടി ഡോസ് കൊവിഡ് വാക്‌സിൻ രാജ്യത്ത് നൽകിയിട്ടുണ്ട്. കൊവിഡ് കണക്കുകൾ പ്രതിധിനം വർധിക്കുമ്പോഴും രാജ്യത്ത് പനിബാധിതരിൽ സമഗ്രമായി കൊവിഡ് പരിശോധന നടത്തുന്നില്ല എന്ന ആക്ഷേപവും നിലനിൽക്കുന്നുണ്ട്.
