പട്‌ന:ഭാരത് ബയോടെക് നിർമിക്കുന്ന കൊവാക്സിന്‍റെ പീഡിയാട്രിക് പരീക്ഷണങ്ങൾ പട്‌ന എയിംസിൽ ആരംഭിച്ചു. കുട്ടികളിൽ കൊവാക്സിന്‍റെ ക്ലിനിക്കൽ പരീക്ഷണങ്ങൾ നടത്താൻ മെയ് 11ന് ഡ്രഗ്സ് കൺട്രോളർ ജനറൽ ഓഫ് ഇന്ത്യ(ഡിസിജിഐ) അനുമതി നൽകിയിരുന്നു. രണ്ട് മുതൽ 18 വയസ് വരെ പ്രായം വരുന്ന കുട്ടികളിൽ കൊവാക്സിന്‍റെ രണ്ട്, മൂന്ന് ഘട്ട ക്ലിനിക്കൽ പരീക്ഷണങ്ങൾ ഡിസിജിഐ അംഗീകരിച്ചിട്ടുണ്ടെന്ന് നീതി ആയോഗ് അംഗം വി.കെ പോൾ നേരത്തെ പറഞ്ഞിരുന്നു.
ആരോഗ്യ പ്രവർത്തകർക്ക് വാക്സിനേഷൻ നൽകിക്കൊണ്ട് ജനുവരി 16നാണ് രാജ്യത്ത് വാക്സിനേഷൻ ഡ്രൈവ് ആരംഭിച്ചത്. തുടർന്ന് മുൻനിര തൊഴിലാളികൾക്ക് ഫെബ്രുവരി രണ്ടോടെ വാക്സിനേഷൻ നൽകാൻ തുടങ്ങി.
മാർച്ച് ഒന്നിന് ആരംഭിച്ച വാക്സിനേഷന്‍ ഡ്രൈവിന്‍റെ അടുത്ത ഘട്ടത്തിൽ 60 വയസിന് മുകളിലുള്ളവർക്കും 45 വയസിന് മുകളിൽ പ്രായമുള്ള ഗുരുതര രോഗം ബാധിച്ചവർക്കും വാക്സിൻ നൽകി. 45 വയസിന് മുകളിൽ പ്രായമുള്ള മറ്റുള്ളവരുടെ വാക്സിനേഷൻ ഏപ്രിൽ ഒന്നിന് ആരംഭിച്ചു. 18 മുതൽ 44 വരെ പ്രായമുള്ളവർക്ക് വാക്സിനേഷൻ നൽകുന്ന മൂന്നാം ഘട്ടം മെയ് ഒന്നിന് ആരംഭിച്ചു.
Also Read: പുൽവാമയിൽ ബി.ജെ.പി നേതാവിനെ ഭീകരർ വെടിവച്ചുകൊന്നു
ഭാരത് ബയോടെക്കിന്‍റെ കൊവാക്സിൻ, സെറം ഇൻസ്റ്റിറ്റ്യൂട്ടിന്‍റെ കൊവിഷീൽഡ്, റഷ്യയുടെ സ്പുട്നിക് വി. എന്നിവയാണ് ഇന്ത്യയിൽ നിലവിൽ ജനങ്ങൾക്ക് നൽകുന്ന വാക്സിൻ.
