ബെംഗളൂരു: പ്രണയബന്ധം വീട്ടിൽ അറിഞ്ഞതിനെ ത്തുടർന്ന് വീട് വിട്ടിറങ്ങിയ പ്രായപൂർത്തിയാകാത്ത പെണ്‍കുട്ടിയെ പീഡിപ്പിച്ച പൊലീസ് കോണ്‍സ്റ്റബിൾ അറസ്റ്റിൽ. ബെംഗളൂരുവിലെ ഗോവിന്ദരാജനഗർ സ്റ്റേഷനിലെ കോണ്‍സ്റ്റബിൾ പവൻ ദയവന്നവർ(26) ആണ് അറസ്റ്റിലായത്. നാല് ദിവസം മുൻപായിരുന്നു കേസിനാസ്‌പദമായ സംഭവം.
ജൂലൈ 25നാണ് പ്രണയബന്ധം വീട്ടുകാർ അറിഞ്ഞതിനെ തുടർന്ന് 17കാരി വീട് വിട്ടിറങ്ങിയത്. പിന്നാലെ വീട്ടുകാർ മകളെ തട്ടിക്കൊണ്ടുപോയി എന്ന് കാട്ടി പൊലീസിൽ പരാതി നൽകി. ഇതിനിടെ കാമുകനെ കാണുന്നതിനായി ബെംഗളൂരുവില്‍ എത്തി പെണ്‍കുട്ടിയെ വിജയ നഗറിലെ ഒരു പാർക്കിൽ വച്ച് പ്രതിയായ പവൻ കണ്ടുമുട്ടുകയായിരുന്നു.
പൊലീസ് ആണെന്ന് അറിഞ്ഞതോടെ തനിക്ക് ചാമരാജ്‌നഗർ ജില്ലയിലെ യെലന്തൂറിലേക്ക് പോകണമെന്നും സഹായിക്കണമെന്നും പെണ്‍കുട്ടി ആവശ്യപ്പെട്ടു. എന്നാൽ സ്ഥലത്ത് എത്തിക്കാം എന്ന് പറഞ്ഞ് പെണ്‍കുട്ടിയെ ഇയാൾ വീട്ടിലേക്ക് കൂട്ടിക്കൊണ്ട് പോയി പീഡിപ്പിക്കുകയായിരുന്നു. തുടർന്ന് അടുത്ത ദിവസം രാവിലെ ഇയാൾ പെണ്‍കുട്ടിയെ ചാമരാജ്‌നഗറിലേക്ക് അയച്ചു.
പിന്നാലെ യെലന്തൂറിലെത്തിയ പെണ്‍കുട്ടി കാമുകനോട് പീഡന വിവരം അറിയിക്കുകയായിരുന്നു. ഇവർ നൽകിയ പരാതിയുടെ അടിസ്ഥാനത്തിൽ അഗ്രഹാര പൊലീസാണ് ഇയാളെ പിടികൂടിയത്. പോക്‌സോ നിയമപ്രകാരം കേസെടുത്ത ഇയാൾ നിലവിൽ ജുഡീഷ്യൽ കസ്റ്റഡിയിലാണ്.
