ഗാന്ധിനഗര്‍: ഗുജറാത്തിലെ നിയമസഭ തെരഞ്ഞെടുപ്പിനോടനുബന്ധിച്ച് നാമനിര്‍ദേശ പത്രിക സമര്‍പ്പിക്കാന്‍ കലക്‌ടറുടെ ഓഫിസിലെത്തിയ കോണ്‍ഗ്രസ് സ്ഥാനാര്‍ഥിയാണ് ഇപ്പോള്‍ പ്രധാന ചര്‍ച്ച വിഷയം. കൊട്ടും കലാശവുമായി ഒട്ടകസവാരി നടത്തിയായിരുന്നു തര്‍ബപ്പ നഗറില്‍ നിന്നുള്ള കോണ്‍ഗ്രസ് സ്ഥാനാര്‍ഥിയായ വിജയ് ബ്രഹ്മാബട്ട് പത്രിക സമര്‍പ്പിക്കാന്‍ എത്തിയത്. രാജ്യത്തെ വിലക്കയറ്റത്തിനെതിരെയും ബിജെപി ഭരണകൂടത്തിനെതിരായുള്ള കടുത്ത പ്രതിഷേധത്തെയും സൂചിപ്പിക്കാനാണ് കോണ്‍ഗ്രസ് സ്ഥാനാര്‍ഥിയുടെ ഒട്ടക സവാരി.
കൂടാതെ ഒരു ഗ്യാസ് സിലിണ്ടറും ഉള്‍പ്പെടുത്തിയായിരുന്നു സ്ഥാനാര്‍ഥിയുടെ പ്രതിഷേധം. വിജയ് ബ്രഹ്മാബട്ടിന് പിന്തുണയറിയിച്ചുകൊണ്ട് നിരവധി പാര്‍ട്ടി പ്രവര്‍ത്തകരും റാലിയില്‍ പങ്കുചേര്‍ന്നിരുന്നു. രാഷ്‌ട്രീയ പാര്‍ട്ടികളും മത്സരാര്‍ഥികളും വളരെയധികം സര്‍ഗാത്മകമായാണ് തെരഞ്ഞെടുപ്പ് പ്രചാരണം നടത്തുന്നത്. വിജയ് ബ്രഹ്മാബട്ടിന്‍റെ പ്രചാരണ റാലി സമൂഹ മാധ്യമങ്ങളില്‍ ഉടനീളം പ്രചരിക്കുകയാണ്.
