വാറങ്കൽ: ഡോക്‌ടറുടെ അനാസ്ഥയിൽ നാലുവയസുകാരിക്ക് കൈപ്പത്തി നഷ്‌ടമായ കേസിൽ 19 വർഷങ്ങൾക്ക് ശേഷം കുടുംബത്തിന് നീതി. 2003ൽ തെലങ്കാനയിലെ വാറങ്കൽ ജില്ലയിലെ ഹനുമകൊണ്ടയിലാണ് സംഭവം. സലൈൻ നൽകാനുള്ള ഇൻജക്‌ഷൻ ട്രിപ്പ് ശരിയായി സ്ഥാപിക്കാത്തതിനാൽ സൗമ്യ എന്ന നാലുവയസുകാരിക്കാണ് കൈപ്പത്തി മുറിച്ചുമാറ്റേണ്ടിവന്നത്.
19 വർഷങ്ങൾക്ക് ശേഷം കേസ് പരിഗണിച്ച സംസ്ഥാന ഉപഭോക്തൃ കമ്മീഷൻ ഇരയ്‌ക്ക് ഏഴു ശതമാനം പലിശ ഉൾപ്പെടെ 16 ലക്ഷം രൂപ നഷ്‌ടരിഹാരം നൽകണമെന്ന് വിധിച്ചു. പ്രതിയായ ഡോക്‌ടർ ജി രമേശും യുണൈറ്റഡ് ഇൻഷുറൻസ് കമ്പനിയും നഷ്‌ടപരിഹാരതുക കുട്ടിയുടെ കുടുംബത്തിന് നൽകണമെന്നും കമ്മീഷൻ അറിയിച്ചു.
2003ൽ സംഭവിച്ചത്: 2003ൽ പനി ബാധിച്ച് നാലുവയസുകാരിയായ മകളെ ഹനുമകൊണ്ടയിലെ അമൃത നഴ്‌സിങ് ഹോമിലെത്തിച്ചതായിരുന്നു രക്ഷിതാക്കൾ. ഇൻജക്‌ഷൻ ട്രിപ്പ് ശരിയായി സ്ഥാപിക്കാതെ സലൈൻ നൽകിയ ഡോക്‌ടകർ രണ്ട് ദിവസത്തെ ചികിത്സയ്‌ക്ക് ശേഷം കുട്ടിയെ ഡിസ്‌ചർജ് ചെയ്‌തു. തുടർന്ന് സലൈൻ കുത്തിവച്ച വലതുകൈയിൽ നീരുവരുകയും വേദന കൂടുകയും ചെയ്‌തു.
കുട്ടിയുടെ മാതാപിതാക്കൾ വീണ്ടും ഡോക്‌ടറെ സമീപിച്ചുവെങ്കിലും അവർ ഹൈദരാബാദിലെ മറ്റൊരു സ്വകാര്യ ആശുപത്രിയിലേക്ക് നിർദേശിച്ചു. സ്വകാര്യ ആശുപത്രിയിലെ ചികിത്സാചെലവ് താങ്ങാനാകാതെ കുടുംബം വാറങ്കൽ എംജിഎം ആശുപത്രിയുമായി ബന്ധപ്പെട്ടു. ഇവിടെ വച്ച് കുട്ടിയുടെ രോഗം ബാധിച്ച കൈപ്പത്തി നീക്കം ചെയ്യുകയായിരുന്നു.
ഡോക്‌ടറുടെ അനാസ്ഥ മൂലം മകൾ അംഗവൈകല്യം സംഭവിച്ചുവെന്ന് കാണിച്ച് സൗമ്യയുടെ പിതാവ് രമേഷ്ബാബുവാണ് ജില്ലാ ഉപഭോക്തൃ ഫോറത്തെ സമീപിച്ചത്. ഇരയുടെ കുടുംബത്തിന് വേണ്ടി അഡ്വ. വി ഗൗരിശങ്കര റാവു ഹാജരായി.
