ഭിലായ്‌ (ഛത്തീസ്ഗഡ്): സാമൂഹിക സേവനങ്ങള്‍ കൊണ്ട് മാതൃകകളായവര്‍ ജനപ്രതിനിധികളായെത്തണം എന്നുള്ളത് ഓരോ ജനാധിപത്യവിശ്വാസിയുടെയും ആഗ്രഹമാണ്. പൊതുപ്രവര്‍ത്തകന്‍ എന്ന നിലയിലല്ലാതെ സമൂഹത്തിന് വേണ്ടുന്ന പ്രവൃത്തികളില്‍ വ്യാപൃതരായവരെ തങ്ങളെ പ്രതിനിധീകരിക്കുന്നവരായി നിയമ നിര്‍മാണ സഭകളിലേക്കയയ്‌ക്കാന്‍ ഇത്തരക്കാര്‍ ആഗ്രഹിക്കാറുണ്ടെങ്കിലും, ഒരു സ്വതന്ത്ര്യ സ്ഥാനാര്‍ഥിയായി കുറച്ച് വോട്ടുകള്‍ നേടുകയല്ലാതെ ഇവര്‍ക്ക് വിജയിക്കാനാവാറില്ല. രാഷ്‌ട്രീയ പാര്‍ട്ടികളിലെ അംഗങ്ങളുടെ പോരാട്ടങ്ങളില്‍ ചിലപ്പോഴെല്ലാം ഇവരുടെ സ്ഥാനാര്‍ഥിത്വം പോലും മുങ്ങിപ്പോവാറുമുണ്ട്.
എന്നാല്‍ നിയമസഭ തെരഞ്ഞെടുപ്പിലേക്കടുക്കുന്ന ഛത്തീസ്‌ഗഡിലെ വൈശാലി നഗർ മണ്ഡലത്തിലെ വോട്ടര്‍മാര്‍ക്ക് ഇത്തവണ ആ പ്രത്യേക ഭാഗ്യം ലഭിക്കാനിടയുണ്ട്. കാരണം അവകാശികളില്ലാത്ത ലക്ഷക്കണക്കിന് മൃതദേഹങ്ങള്‍ സംസ്‌കരിച്ച് അക്ഷീണ പ്രവര്‍ത്തനങ്ങളുടെ പേരില്‍ അറിയപ്പെട്ട സാമൂഹിക പ്രവര്‍ത്തകന്‍ ശങ്കർ ലാൽ സാഹുവാണ് ഇപ്രാവശ്യം വൈശാലി നഗറില്‍ നിന്നും ജനവിധി തേടുന്നത്. തന്‍റെ കൈവശമുള്ള മുഷിഞ്ഞ നോട്ടുകളും നാണയത്തുട്ടുകളും ഉള്‍പ്പടെ 10,000 രൂപ കെട്ടിവച്ചാണ് ശങ്കര്‍ ലാല്‍ സാഹു നാമനിര്‍ദേശ പത്രിക സമര്‍പ്പിച്ചത് (Man Who Cremated Over One lakh Unclaimed Bodies To Chhattisgarh Assembly Elections).
ആരാണ് ഈ സ്ഥാനാര്‍ഥി: 35 വര്‍ഷക്കാലത്തോളമായി ഛത്തീസ്‌ഗഡിലെ ഭിലായ്‌ പ്രദേശത്തിന് ശങ്കർ ലാൽ സാഹുവിനെ സുപരിചിതമാണ്. ഭിലായിലെ രാംനഗര്‍ മുക്തിധാമിലുള്ള ആരോരുമില്ലാത്തവരുടെ യാത്രയയപ്പുകള്‍ ഉറപ്പാക്കിയാണ് ശങ്കർ ലാൽ സാഹു ജനങ്ങള്‍ക്ക് പ്രിയപ്പെട്ടവനാകുന്നത്. അതേസമയം ചെറുപ്പകാലം മുതലേ മനസിലൊളിപ്പിച്ച സിനിമ മോഹങ്ങളോടുള്ള ഭ്രമം വിട്ടൊഴിയാത്തതിനാല്‍, ചെറിയ സിനിമകളില്‍ മുഖം കാണിച്ചും ചലച്ചിത്ര ഗാനങ്ങളെഴുതിയും ശങ്കർ ലാൽ സാഹു ജനപ്രിയനാണ്.
മത്സരം എന്തിനെന്ന് വ്യക്തമാക്കി സാഹു: ജീവിച്ചിരിക്കുന്നവരെ മാത്രമല്ല മരിച്ചവരെയും സഹായിച്ച ഒരാളാണ് ഞാൻ. വരാനിരിക്കുന്ന ഛത്തീസ്ഗഡ് നിയമസഭ തെരഞ്ഞെടുപ്പിൽ മത്സരിക്കുന്നതിന്‍റെ ഉദ്ദേശം തന്നെ അഴിമതിക്കെതിരെ പോരാടുക എന്നതാണ്. ഒരു മാറ്റം വരുത്താൻ ഞാൻ ആത്മാര്‍ത്ഥമായി ആഗ്രഹിക്കുന്നുണ്ടെന്ന് ശങ്കർ ലാൽ സാഹു നാമനിര്‍ദേശ പത്രിക സമര്‍പ്പിച്ച ശേഷം മാധ്യമങ്ങളോട് പ്രതികരിച്ചു.
രാംനഗർ മുക്തിധാമാണ് എന്‍റെ പ്രവര്‍ത്തനമണ്ഡലം. അവിടെ ഞാൻ അവകാശികളില്ലാത്ത മൃതദേഹങ്ങളുടെ സംസ്‌കാരം നടത്തിവരുന്നുണ്ട്. കഴിഞ്ഞ മൂന്ന് പതിറ്റാണ്ടായി ഞാൻ ഇത് തുടരുന്നു. ഇന്നേവരെ ഞാൻ ഒരു ലക്ഷത്തിലധികം മൃതദേഹങ്ങൾ സംസ്‌കരിച്ചിട്ടുണ്ടെന്നും പ്രദേശത്തെ ജനങ്ങള്‍ക്ക് ഇതറിയാമെന്നും സാഹു മനസുതുറന്നു. വൈശാലി നഗർ ഏരിയയിൽ കാലങ്ങളായി ഒരു വികസന പ്രവർത്തനങ്ങളും നടന്നിട്ടില്ലെന്നും, ചുറ്റുമുള്ള എല്ലാ പ്രദേശങ്ങളും വികസിപ്പിച്ചപ്പോഴും ഈ പ്രദേശം പിന്നോക്കം നിൽക്കുകയാണെന്നും അദ്ദേഹം ആരോപിച്ചു.
