കൊൽക്കത്ത: വാക്‌സിൻ നടപടി ക്രമങ്ങൾ അവസാനിക്കുന്നതോടെ രാജ്യം പൗരത്വ നിയമ ഭേദഗതി നടപ്പിലാക്കൽ നടപടിയിലേക്ക് കടക്കുമെന്ന് ആഭ്യന്തരമന്ത്രി അമിത് ഷാ. ബംഗാളിൽ നടന്ന റാലിയിൽ അഭിസംബോദന ചെയ്ത് സംസാരിക്കുകയായിരുന്നു ഷാ.
പൗരത്വ ഭേദഗതി നിയമം (സിഎഎ) നടപ്പാക്കുന്നത് തടയാൻ പശ്ചിമ ബംഗാൾ മുഖ്യമന്ത്രി മമത ബാനർജിക്ക് കഴിയില്ലെന്ന് അദ്ദേഹം പറഞ്ഞു. സിഎഎയ്‌ക്കെതിരെ കളളപ്രചരണം നടത്തുന്നവർക്കെതിരെ ശക്തമായ നടപടി സ്വീകരിക്കും . ഒരു മുസ്ലീമിന്‍റെയും പൗരത്വം കവർന്നെടുക്കുന്ന ഒരു വ്യവസ്ഥയും സി‌എ‌എയ്ക്ക് ഇല്ലെന്ന് ആഭ്യന്തരമന്ത്രി പറഞ്ഞു. കഴിഞ്ഞ 70 വർഷമായി ഇന്ത്യയിൽ താമസിക്കുന്ന ആളുകൾക്ക് പൗരത്വം നൽകാൻ ഞങ്ങൾ ആഗ്രഹിക്കുന്നു. കിംവദന്തികൾക്ക് ഇരയാകരുതെന്നും അദ്ദേഹം പറഞ്ഞു.
ബംഗാളിന് പ്രധാനമന്ത്രി മോദിയുമായി ചേർന്ന് പ്രവർത്തിക്കുന്ന ഒരു സർക്കാരിന്‍റെ ആവശ്യമുണ്ട്. ദരിദ്രരുടെ നന്മയ്ക്കായി പ്രവർത്തിക്കുന്ന ഒരു സർക്കാർ ഉണ്ടാകണമെന്ന് അമിത് ഷാ പറഞ്ഞു.
അതേസമയം, തൃണമൂൽ കോൺഗ്രസ് ഒറ്റയ്ക്ക് പോരാടുമെന്നും ബിജെപിയെ അധികാരത്തിൽ വരാൻ അനുവദിക്കില്ലെന്നും കൊൽക്കത്തയിൽ നടന്ന പരിപാടിയിൽ പശ്ചിമ ബംഗാൾ മുഖ്യമന്ത്രി മമത ബാനർജി പറഞ്ഞു.
