ഹൈദരാബാദ് : വാന നിരീക്ഷകരെ അമ്പരപ്പിച്ചുകൊണ്ട് ഈ മാസത്തെ രണ്ടാമത്തെ ചാന്ദ്ര പ്രതിഭാസം (Blue Super Moon August 2023). ഓഗസ്റ്റിലെ രണ്ടാമത്തെ പൗര്‍ണമി ആയതിനാല്‍ ഇന്നലെ (ഓഗസ്റ്റ് 30) പ്രത്യക്ഷപ്പെട്ട സൂപ്പര്‍ മൂണ്‍ നീല നിറത്തിലായിരുന്നു (Blue super moon). ചന്ദ്രന്‍ അതിന്‍റെ ഭ്രമണ പഥത്തില്‍ ഭൂമിയോട് ഏറ്റവും കൂടുതല്‍ അടുത്ത് നില്‍ക്കുന്ന ഘട്ടത്തില്‍ സംഭവിക്കുന്ന പ്രതിഭാസമാണ് സൂപ്പര്‍ മൂണ്‍ (Super Moon). ഈ സമയത്ത് ചന്ദ്രനെ കൂടുതല്‍ വലിപ്പത്തിലും തെളിച്ചത്തിലും കാണാന്‍ സാധിക്കും എന്നതാണ് പ്രത്യേകത. ഭൂമിയില്‍ നിന്ന് 357244 കിലോമീറ്റര്‍ അകലെയാണ് സൂപ്പര്‍ ബ്ലൂ മൂണ്‍ പ്രത്യക്ഷപ്പെട്ടത്.
ഇന്ത്യയില്‍ ഈ അത്യപൂര്‍വ കാഴ്‌ച ദൃശ്യമായത് ഇന്നലെ രാത്രി 9.30 മുതല്‍ ഇന്ന് രാവിലെ 7.30 വരെയാണ്. ബ്ലൂ മൂണിനൊപ്പം ശനിയേയും ആകാശത്ത് കാണാനാകുമെന്ന് വാന നിരീക്ഷകര്‍ നേരത്തെ അറിയിച്ചിരുന്നു. ബൈനോക്കുലറോ ടെലസ്‌കോപ്പോ ഉപയോഗിച്ച് ശനി ഗ്രഹത്തെ വ്യക്തമായി വീക്ഷിക്കാമെന്നായിരുന്നു നിരീക്ഷകര്‍ പറഞ്ഞിരുന്നത്.
ഈ മാസത്തെ ആദ്യ ഭീമന്‍ ചാന്ദ്രക്കാഴ്‌ച ഓഗസ്റ്റ് ഒന്നിന് ദൃശ്യമായിരുന്നു. ഈ വര്‍ഷത്തെ ആദ്യ സൂപ്പര്‍ മൂണ്‍ കൂടിയായിരുന്നു ഇത്. സാധാരണ കാണപ്പെടുന്നതിനേക്കാള്‍ എട്ട് ശതമാനത്തില്‍ അധികം വലിപ്പത്തിലാണ് സൂപ്പര്‍ മൂണ്‍ ദൃശ്യമാവുക. ലോകത്തിന്‍റെ വിവിധ ഭാഗങ്ങളില്‍ നിന്നുള്ളവര്‍ സൂപ്പര്‍ ബ്ലൂ മൂണ്‍ ചിത്രങ്ങള്‍ പങ്കുവച്ചിട്ടുണ്ട്. ഈ വര്‍ഷത്തെ ഏറ്റവും വലിയ ചാന്ദ്രക്കാഴ്‌ചയാണ് ഇന്നലെ ദൃശ്യമായത്.
ഇനിയൊരു ചാന്ദ്ര വിസ്‌മയം കാണണമെങ്കില്‍ വര്‍ഷങ്ങള്‍ കാത്തിരിക്കണം എന്നാണ് നാസ നല്‍കുന്ന വിവരം. 14 വര്‍ഷങ്ങള്‍ക്ക് ശേഷമാകും അടുത്ത സൂപ്പര്‍ മൂണ്‍ പ്രത്യക്ഷപ്പെടുക. 2037 ജനുവരിയിലും പിന്നാലെ മാര്‍ച്ചിലുമാകും സൂപ്പര്‍ മൂണ്‍ കാണുക എന്നാണ് നാസ നല്‍കുന്ന വിവരം. അതേസമയം ബ്ലൂ മൂണ്‍ കാണാന്‍ കേരള ശാസ്‌ത്ര സാങ്കേതിക മ്യൂസിയം അവസരമൊരുക്കിയിരുന്നു. പിഎംജിയിലുള്ള മ്യൂസിയത്തില്‍ ഇന്ന് (ഓഗസ്റ്റ് 31) രാത്രി 8 മണി വരെ വാന നിരീക്ഷണത്തിന് അവസരം ഒരുക്കിയതായി മ്യൂസിയം ഡയറക്‌ടര്‍ അറിയിച്ചിരുന്നു.
Also Read : ഈ മാസം ആകാശത്ത് ദൃശ്യമാകുന്നത് ഇരട്ട വിസ്‌മയം ; രണ്ടാമത്തെ സൂപ്പര്‍ മൂണ്‍ ഓഗസ്റ്റ് 30ന്
സൂപ്പര്‍ മൂണ്‍ ദൃശ്യമാകുന്ന സാഹചര്യത്തില്‍ ഭൂമിയില്‍ ഉയര്‍ന്ന തിരമാല, ഭൂചലനം എന്നിവയ്‌ക്ക് സാധ്യതയുള്ളതായായാണ് ശാസ്‌ത്രജ്ഞര്‍ വിലയിരുത്തുന്നത്. ഈ സമയങ്ങളില്‍ ഭൂമി ചന്ദ്രന്‍റെ ഗുരുത്വാകര്‍ഷണ വലയത്തിലാകുന്നതിനാലാണ് ഇത്തരം പ്രതിഭാസങ്ങള്‍ സംഭവിക്കുന്നത്.
