കൊൽക്കത്ത: പൗരത്വ നിയമ ഭേദഗതിക്കെതിരെ പശ്ചിമ ബംഗാളും നിയമസഭയിൽ പ്രമേയം പാസാക്കി. ഈ മാസം 20നാണ് പ്രമേയത്തിന് അവതരണാനുമതി തേടി തൃണമൂല്‍ കോൺഗ്രസ് സ്പീക്കർക്ക് കത്ത് നൽകിയത്. പ്രത്യേക നിയമസഭ സമ്മേളനം വിളിച്ചു ചേർത്താണ് പ്രമേയം പാസാക്കിയത്. പൗരത്വ നിയമത്തിനെതിരെ പ്രമേയം പാസാക്കുന്ന നാലാമത്തെ സംസ്ഥാനമാണ് പശ്ചിമ ബംഗാൾ.
പൗരത്വ ഭേദഗതി നിയമം ഭരണഘടനയ്ക്കും മാനവികതയ്ക്കും എതിരാണെന്ന് മുഖ്യ മന്ത്രി മമത ബാനർജി പറഞ്ഞു. ഈ നിയമവും എൻ‌പി‌ആറും ഉടൻ റദ്ദാക്കണമെന്നും മമത ബാനർജി കൂട്ടിച്ചേർത്തു. പ്രതിപക്ഷ പാർട്ടികളായ കോൺഗ്രസും സിപിഎമ്മും പ്രമേയത്തെ പിന്തുണച്ചു.
പൗരത്വ ഭേദഗതി നിയമത്തിനെതിരെ പ്രമേയം പാസാക്കിയ ആദ്യ സംസ്ഥാനം കേരളമാണ്. കേരളത്തിന് പിന്നാലെ കോൺഗ്രസ് ഭരിക്കുന്ന പഞ്ചാബ്, രാജസ്ഥാൻ സംസ്ഥാനങ്ങളും ഭേദഗതി നിയമത്തിനെതിരെ പ്രമേയം പാസാക്കി.
ബംഗാളിൽ പ്രമേയം പാസ്സാക്കാൻ വൈകുന്നതിനെതിരെ സി.പി.എം നേരത്തെ വിമര്‍ശനം ഉന്നയിച്ചിരുന്നു. ഇതിനു പിന്നാലെയാണ് പ്രത്യേക നിയമസഭ സമ്മേളനം വിളിച്ചു ചേർക്കാൻ തൃണമൂൽ സർക്കാർ തീരുമാനിച്ചത്.
