ലക്‌നൗ: തട്ടികൊണ്ടുപോയ മകളെ കണ്ടെത്തുന്നതിലും പ്രതിയെ അറസ്റ്റ് ചെയ്യുന്നതിലും പൊലീസ് അനാസ്ഥ കാണിക്കുന്നുവെന്ന് ആരോപിച്ച് പെൺകുട്ടിയുടെ അമ്മ മൂന്ന് ദിവസമായി നിരാഹാര സമരത്തിൽ. ഉത്തര്‍പ്രദേശിലെ ഗോപിഗഞ്ച് നഗരത്തിൽ അടുത്തുള്ള പലചരക്ക് കടയിലേക്ക് പോകുകയായിരുന്ന പതിനാല് വയസുകാരിയെയാണ് കഴിഞ്ഞ മാസം 14 മുതൽ കാണാതായത്. പെൺകുട്ടിയെ തട്ടിക്കൊണ്ടുപോയതാണെന്ന് ആരോപിച്ച് അമ്മ ഗോപിഗഞ്ച് പൊലീസ് സ്റ്റേഷനിൽ പരാതി നൽകിയിട്ടും അന്വേഷണത്തിൽ ഇതുവരെ ഒരു പുരോഗമനവും ഉണ്ടായിട്ടില്ല.
കഴിഞ്ഞ 45 ദിവസങ്ങളായി പൊലീസ് സ്റ്റേഷനിൽ കയറിയിറങ്ങുകയാണെന്നും മകളെ സംബന്ധിച്ച് യാതൊരു വിവരവും പൊലീസിൽ നിന്ന് ലഭിച്ചിട്ടില്ലെന്നും പെൺകുട്ടിയുടെ അമ്മ പറയുന്നു. തന്‍റെ മകളെ കണ്ടെത്തുന്നത് വരെ നിരാഹാര സമരം തുടരുമെന്നും പെൺകുട്ടിയുടെ അമ്മ പറഞ്ഞു.
