ഹൈദരാബാദ്: സംസ്ഥാനത്ത് 2019ലെ മൊത്തം കുറ്റകൃത്യങ്ങളുടെ നിരക്കിൽ മൂന്ന് ശതമാനം കുറവുണ്ടായതായി ഉന്നത പൊലീസ് ഉദ്യോഗസ്ഥർ. 2018 ൽ റിപ്പോർട്ട് ചെയ്‌ത 16,084 കേസുകളിൽ നിന്ന് ഈ വർഷം രജിസ്റ്റർ ചെയ്‌ത കേസുകളുടെ എണ്ണം 15,598 ആയി കുറഞ്ഞതായി ഹൈദരാബാദ് പൊലീസ് കമ്മീഷണർ അഞ്ജനി കുമാർ പറഞ്ഞു.
അതേസമയം, സ്ത്രീകൾക്കെതിരായ കുറ്റകൃത്യങ്ങളിൽ നേരിയ വർധനയുണ്ടായി. ഈ വർഷം 2,305 കേസുകൾ റിപ്പോർട്ട് ചെയ്യപ്പെട്ടിട്ടുണ്ട്. 2018 ൽ ഇത് 2,286 ആയിരുന്നു. തട്ടിക്കൊണ്ടുപോകൽ കേസുകൾ 14 ശതമാനം കുറഞ്ഞു. പ്രിവന്‍റീവ് ഡിറ്റൻഷൻ (പിഡി) ആക്റ്റ്, ക്രിമിനൽ ട്രാക്കിങ് സംവിധാനം, തീവ്രമായ പട്രോളിങ്, സെർച്ച് ഓപ്പറേഷനുകൾ, കമ്മ്യൂണിറ്റി സിസിടിവി സ്ഥാപിക്കൽ എന്നിവ ഉൾപ്പെടെയുള്ള നടപടികളിലാണ് കുറ്റകൃത്യങ്ങളുടെ നിരക്ക് കുറയാൻ കാരണമായി ചൂണ്ടികാണിക്കുന്നത്.
മദ്യപിച്ച് വാഹനമോടിച്ച കേസുകൾ 26,856 കേസുകളിൽ നിന്ന് 27,737 ആയി ഉയർന്നു. പൗരന്മാരെ ശാക്തീകരിക്കുന്നതിൽ ശ്രദ്ധ കേന്ദ്രീകരിച്ച് ഹൈദരാബാദ് പൊലീസ് അടുത്ത വർഷം മുതൽ പട്രോളിങ് ഓഫീസർമാർ വഴി നിസ്സാര കേസുകൾക്കും എഫ്‌ഐആർ രജിസ്റ്റർ ചെയ്യാൻ തുടങ്ങുമെന്നും അതിനായി അപേക്ഷകർ പൊലീസ് സ്റ്റേഷനുകളിൽ പോകേണ്ടതില്ലെന്നും പൊലീസ് വക്താവ് അറിയിച്ചു. കേസുകളുടെ അന്വേഷണ പുരോഗതി ഓഫീസർമാർ കൃത്യമായി പരാതിക്കാരെ അറിയിക്കും.
ഈ വർഷം നഗരത്തിൽ 1,400 സൈബർ കുറ്റകൃത്യങ്ങൾ രജിസ്റ്റർ ചെയ്യപ്പെട്ടു. എന്നാൽ ലളിതമായ കേസുകൾ കണ്ടെത്തുന്നതിനും സൈബർ സാങ്കേതികവിദ്യയുമായി ബന്ധപ്പെട്ട സൗകര്യങ്ങളുണ്ടെന്ന് ഹൈദരാബാദ് പൊലീസ് മേധാവി പറഞ്ഞു.
