ന്യൂഡല്‍ഹി: നിയമസഭാ തെരഞ്ഞെടുപ്പില്‍ വോട്ട് രേഖപ്പെടുത്തി ഡല്‍ഹിയിലെ ഏറ്റവും പ്രായം കൂടിയ വോട്ടര്‍. സി ആര്‍ പാര്‍ക്കിലെ പോളിങ് സ്‌റ്റേഷനിലാണ് 111 വയസുള്ള കാലിതാര മണ്ഡല്‍ വോട്ട് ചെയ്‌തത്. കുടുംബത്തോടൊപ്പമെത്തി, ചെറുമകന്‍റെ കൈപിടിച്ച് കാലിതാര വോട്ട് ചെയ്തപ്പോള്‍ നിരവധി ഫോട്ടോഗ്രാഫര്‍മാരാണ് ചിത്രം പകര്‍ത്തിയത്. "വോട്ട് രേഖപ്പെടുത്താനായതില്‍ സന്തോഷമുണ്ട്. എത്ര തെരഞ്ഞെടുപ്പില്‍ വോട്ട് ചെയ്‌തിട്ടുണ്ടെന്ന് ഓര്‍മയില്ല. ഉത്തരവാദിത്തമുള്ള പൗരനെന്ന നിലയില്‍ നാം വോട്ട് ചെയ്യണം"- കാലിതാര മണ്ഡല്‍ പ്രതികരിച്ചു.
1908ല്‍ അന്നത്തെ ഇന്ത്യയുടെ ഭാഗവും ഇന്ന് ബംഗ്ലാദേശിന്‍റെ ഭാഗവുമായി ബാരിസാലിലാണ് കാലിതാരയുടെ ജനനം. ഇന്ത്യാ പാക് വിഭജനത്തിനും, ബംഗ്ലാദേശ് വിഭജനത്തിനും സാക്ഷിയായ കാലിതാരയ്‌ക്ക് രണ്ട് തവണയും അഭയാര്‍ഥിയാകേണ്ടിവന്നിട്ടുണ്ട്. പിന്നാലെയാണ് കുടുംബത്തോടെ കാലിതാര ഡല്‍ഹിയിലേക്ക് താമസം മാറിയത്.
കഴിഞ്ഞ ഒരു നൂറ്റാണ്ടിനിടെ ഡല്‍ഹിയിലുണ്ടായ എല്ലാ തെരഞ്ഞെടുപ്പുകളിലും വോട്ട് രേഖപ്പെടുത്തിയിട്ടുണ്ട് കാലിതാര. "തള്ളവിരലില്‍ മഷി പുരട്ടി ബാലറ്റ് പേപ്പറിലും, ഇപ്പോഴത്തെ മെഷീനിലും ഞാന്‍ വോട്ട് ചെയ്‌തിട്ടുണ്ട്" - കാലിതാര അഭിമാനത്തോടെ പറഞ്ഞു.
1971 ലെ ഇന്ത്യാ പാകിസ്ഥാന്‍ യുദ്ധത്തിന് ശേഷം ബംഗ്ലാദേശികള്‍ വ്യാപകമായി കുടിയേറിയ ഡല്‍ഹിയിലെ സി ആര്‍ പാര്‍ക്കിലാണ് കാലിതാര മണ്ഡലിന്‍റെ താമസം. കാലിതാരയെ കൂടാതെ നൂറുവയസ് കടന്ന 132 പേരാണ് ഡല്‍ഹിയിലുള്ളത്. 68 പുരുഷന്മാരും, 64 സ്‌ത്രീകളും.
