മരുമകളെയും ചെറുമകളെയും കൊന്ന ശേഷം അരുണാചൽ പ്രദേശ് സ്വദേശി സ്വയം ജീവനൊടുക്കി

പണത്തിന്‍റെ പേരിലുണ്ടായ തർക്കത്തെ തുടർന്ന് മരുമകളും പേരക്കുട്ടിയും ഉറങ്ങിക്കിടക്കുമ്പോൾ കൊലപ്പെടുത്തുകയായിരുന്നു. തുടർന്ന് ഇയാൾ തൂങ്ങിമരിച്ചു.

ഇറ്റാനഗർ: അരുണാചൽ പ്രദേശിലെ ലോങ്ഡിങ് ജില്ലയിൽ മരുമകളെയും പേരക്കുട്ടിയെയും കൊലപ്പെടുത്തിയ ശേഷം ഒരാൾ ആത്മഹത്യ ചെയ്‌തു. ലോങ്ഡിങ്ങിൽ നിന്നും 305 കിലോമീറ്റർ അകലെയുള്ള ഫോറസ്റ്റ് കോളനിയിലാണ് സംഭവം. മരുമകളുമായുള്ള തർക്കമാണ് കൊലപാതകത്തിന് കാരണമെന്നാണ് പ്രാഥമിക നിഗമനം.

വിഭാര്യനും ലഹരിക്കടിമയുമായ മാലേം പൻസ പണത്തിന്‍റെ പേരിലുണ്ടായ തർക്കത്തിൽ മരുമകൾ ടോയിക്കം പൻസയെ (30)യും ചെറുമകളെയും കൊലപ്പെടുത്തുകയായിരുന്നു. തുടർന്ന് ഇയാൾ തൂങ്ങിമരിച്ചു. ഞായറാഴ്‌ച രാത്രി ഇരുവരും ഉറങ്ങിക്കിടക്കുമ്പോഴാണ് കൊലപാതകം നടത്തിയതെന്നാണ് പൊലീസ് അറിയിച്ചത്. മരിച്ച സ്ത്രീയുടെ ഭർത്താവ് അസം റൈഫിൾസ് സൈനികനാണ്. സംഭവത്തിൽ എഫ്ഐആർ റജിസ്റ്റർ ചെയ്‌ത് അന്വേഷണം ആരംഭിച്ചു.