ഡെറാഡൂൺ: രാജ്യത്ത് ദിനം പ്രതി കൊവിഡ് രോഗികളുടെ എണ്ണം വർധിക്കുന്ന സാഹചര്യത്തിലും കൊവിഡ് ഇതുവരെ ബാധിക്കാത്ത പ്രദേശമാണ് ചമോലിയിലെ മന എന്ന ഗ്രാമം. കൊവിഡിനെ തുടർന്ന് നാട്ടുകാർ സ്വയം ലോക്ക്‌ഡൗണിന് തയ്യാറായതിനാലാണ് ഇന്നും ഗ്രാമം കൊവിഡ് രഹിതമായി നിലനിൽക്കുന്നതെന്ന് ആളുകൾ പറയുന്നു. കേന്ദ്ര സർക്കാർ അൺലോക്ക് നാലിലൂടെ നിയന്ത്രണങ്ങളിൽ ഇളവുകൾ വരുത്തിയെങ്കിലും സ്വയം പ്രഖ്യാപിത ലോക്ക് ഡൗണിലൂടെ മഹാമാരിയെ അകറ്റി നിർത്തുകയാണ് നാട്ടുകാർ.
മെയ്‌ മുതൽ പുറത്ത് നിന്നുളളവരുടെ പ്രവേശനം തടയുന്നതിനൊപ്പം അന്തർ ജില്ലകൾ തമ്മിലും ആളുകളുടെ പ്രവേശനം തടഞ്ഞിട്ടുണ്ട്. ഈ നടപടികളിലൂടെ ഗ്രാമത്തിലെ 150ഓളം വരുന്ന കുടുംബങ്ങളെ മഹാമാരിയിൽ നിന്ന് സുരക്ഷിതരാക്കുകയാണെന്ന് നാട്ടുകാർ പറയുന്നു.
സംസ്ഥാന സർക്കാർ ടൂറിസം വില്ലേജ് ആയി പ്രഖ്യാപിച്ച ഗ്രാമങ്ങളിൽ ഒന്നാണ് മന ഗ്രാമം. ബദരീനാഥ് ധാമിൽ നിന്ന് മൂന്ന് കിലോമീറ്റർ അകലെയാണ് മനോഹരമായ മന ഗ്രാമം സ്ഥിതി ചെയ്യുന്നത്. ഇവിടെ താമസിക്കുന്ന ഭോത്യ സമൂഹം ശൈത്യകാലത്ത് അവർ ഗോപേശ്വറിലേക്ക് പോകുകയും വേനൽക്കാലത്ത് സ്വന്തം ഗ്രാമത്തിലേക്ക് തിരിച്ചെത്തുകയുമാണ് പതിവ്. ഇന്തോ-ചൈന അതിർത്തിയിൽ വരുന്ന ഈ ഗ്രാമത്തിൽ ഇതുവരെ ആർക്കും തന്നെ കൊവിഡ് റിപ്പോർട്ട് ചെയ്‌തിട്ടില്ല.
ബദ്രിനാഥിലേക്കുള്ള സന്ദർശനം നിലച്ചതോടെ ഗ്രാമം കടുത്ത സാമ്പത്തിക പ്രതിസന്ധിയിലൂടെയാണ് കടന്നു പോകുന്നത്. ആളുകൾ വീടുകളിൽ ആവശ്യത്തിനായുള്ള പച്ചക്കറികൾ കൃഷി ചെയ്‌ത് സാഹചര്യങ്ങളോട് പൊരുതുകയാണെന്ന് ഗ്രാമ മുഖ്യനായ പീതാംബർ മോൾഫ പറഞ്ഞു.
