ന്യൂഡല്‍ഹി: ഇന്ത്യയില്‍ 25 കോടിയോളം പേര്‍ക്ക് കൊവിഡ്-19 രോഗം സ്ഥിരീകരിക്കുമെന്ന് പഠന റിപ്പേര്‍ട്ട്. രോഗത്തെ പിടിച്ച് കെട്ടാന്‍ 21 ദിവസത്തെ ലോക്ഡൗണ് കൊണ്ട് കഴിയില്ലെന്നും ജോണ്‍സ് ഹോക്കിന്‍സ് യൂണിവേഴ്‌സിറ്റിയും സെന്‍റര്‍ ഫോര്‍ ഡിസീസ് ഡയനാമിക്, എകണോമിക്‌സ് ആൻഡ് പോളിസിയും ചേര്‍ന്ന് നടത്തിയ പഠനത്തില്‍ വ്യക്തമാക്കന്നു.
എപ്രില്‍ മെയ്- ജൂണ്‍ മാസങ്ങളില്‍ 12 കോടിയോളം ജനങ്ങള്‍ക്ക് രോഗം സ്ഥിരീകരിക്കുമെന്നും റിപ്പോര്‍ട്ടിലുണ്ട്. രോഗ വ്യാപനത്തിന്‍റെ ആദ്യ ഘട്ടത്തിലാണിത്. രണ്ടാം ഘട്ടത്തില്‍ തീവ്രതകൂടുകയും 25 കോടി ജനങ്ങളിലേക്ക് രോഗം പടരുകയും ചെയ്യുമെന്നാണ് റിപ്പോര്‍ട്ട്. കാലാവസ്ഥ വ്യതിയാനം, ചൂട്, അന്തരീക്ഷത്തിലെ ജലാശത്തിന്‍റെ അളവ്, തുടങ്ങിയ കാര്യങ്ങളില്‍ രാജ്യത്ത് മറ്റം വരും. ഇത്തരം മാറ്റങ്ങളില്‍ വൈറസ് വ്യാപനം എത്രമാത്രമെന്ന് വിലയിരുത്തുക അസാധ്യമാണ്. എങ്കിലും കുറഞ്ഞത് 18 കോടിയോളം പേരിലെങ്കിലും ഇത്തരം സാഹചര്യങ്ങളില്‍ രോഗം പടരും. അന്തരീക്ഷ ഈര്‍പ്പം കുറയുകയും ചൂട് കൂടുകയും ചെയ്താല്‍ വൈറസ് വ്യാപന തോത് കുറയാന്‍ ഇടയുണ്ട്.
രോഗം ഏറ്റവും കൂടുതല്‍ വ്യാപിക്കുന്ന സമയത്ത് 25 ലക്ഷം ആളുകള്‍ ആശുപത്രികളില്‍ ചികിത്സയിലാകും. 17-18 ലക്ഷം ആളുകള്‍ ഇടത്തരം കാലത്തും 13 ലക്ഷം ആളുകള്‍ വ്യാപനം കുറഞ്ഞ സമയത്തും ആശുപത്രികളിലെത്തും. ചികിത്സക്കായി ഒരു മില്യണ്‍ വെന്‍റിലേറ്ററുകള്‍ ആവശ്യമായി വരും. ഇന്ത്യയില്‍ നിലവിലുള്ളത് 30,000 മുതല്‍ 50,000 മാത്രമാണെന്നും റിപ്പേര്‍ട്ടിലുണ്ട്. സാധാരണക്കാരില്‍ മരണസംഖ്യ ഉയരാനാണ് സാധ്യത. എന്നാല്‍ ആരോഗ്യ പ്രവത്തകര്‍ കൂടുതല്‍ ജാഗ്രത പാലിക്കണം. ഇല്ലെങ്കില്‍ അവരുടെതടക്കം നിരവിധി ജീവനുള്‍ നഷ്ടമാവാന്‍ കാരണമാകുമെന്നും റിപ്പോര്‍ട്ട് മുന്നറിയിപ്പ് നല്‍കുന്നു.
രാജ്യത്ത് ഇപ്പോള്‍ എത്രപേര്‍ കൊറോണ ബാധിതരാണെന്ന കാര്യത്തില്‍ വ്യക്തതയില്ല. അമേരിക്ക, ഇറ്റലി തുടങ്ങിയ രാജ്യങ്ങളുമായി താരതമ്യപ്പെടുത്തുമ്പോള്‍ ആദ്യഘട്ടത്തില്‍ വൈറസ് വ്യാപനം നിയന്ത്രിക്കുന്നതിന് ഇന്ത്യയ്ക്ക് കഴിഞ്ഞിട്ടുണ്ട്. എന്നാല്‍, യഥാര്‍ഥ രോഗികള്‍ എത്രയെന്നു വ്യക്തമല്ല. എത്രമാത്രം പരിശോധന നടത്തുന്നു, പരിശോധന ഫലത്തിലെ കൃത്യത, വൈറസ് ബാധിതരുമായി ഇടപെട്ടിരിക്കാവുന്നവര്‍ തുടങ്ങിയ ഘടകങ്ങളെ ആശ്രയിച്ചാണ് രോഗികളുടെ എണ്ണമിരിക്കുന്നതെന്ന് സംഘം പറയുന്നു.
ഇതുവരെ ഇന്ത്യയില്‍ പരിശോധന നടത്തിയവരുടെ എണ്ണം താരതമ്യേന കുറവാണ്. വിപുലമായ പരിശോധന നടക്കാത്തതിനാല്‍ സമൂഹവ്യാപനത്തിന്‍റെ തീവ്രത വിലയിരുത്താന്‍ സാധിക്കുകയില്ല. ആശുപത്രികളിലും വീടുകളിലും ചികിത്സയിലും നിരീക്ഷണത്തിലും കഴിയുന്നവരല്ലാതെ എത്രപേരെ വൈറസ് ബാധിച്ചിട്ടുണ്ടെന്ന് കണക്കാക്കാനും കഴിയില്ല. ആദ്യഘട്ട വിവരങ്ങള്‍വെച്ച് രോഗവ്യാപനം കുറവായിരിക്കുമെന്നു വിലയിരുത്താനാവില്ല. കൊറോണവ്യാപനം ഗുരുതരമായ തോതില്‍ ഉയരുംമുമ്പ് വളരെക്കടുത്ത നടപടികള്‍ സ്വീകരിക്കേണ്ടത് ആവശ്യമാണ് റിപ്പോര്‍ട്ട് പറയുന്നു.
മാത്രമല്ല ലോക്ഡൗണ് പ്രഖ്യാപനം വലിയ സാമ്പത്തിക പ്രതിസന്ധിക്കും പട്ടിണിക്കും കാരണമാകും. ആദ്യ ഘട്ടത്തില്‍ രോഗ വ്യാപനം ആഗോള തലത്തില്‍ ആയിരുന്നെങ്കില്‍ രണ്ടാം ഘട്ടത്തില്‍ ആഭ്യന്തരമാകും. ജനങ്ങളെ പരിഭ്രാന്തരാക്കുന്ന നടപടികള്‍ ഒഴിവാക്കി കൂടുതല്‍ കാര്യക്ഷമമായ തീരുമാനങ്ങള്‍ കൈക്കൊള്ളാന്‍ സര്‍ക്കാര്‍ സംവിധാനങ്ങള്‍ ശ്രമിക്കണമെന്നും റിപ്പോര്‍ട്ടില്‍ പറയുന്നു. രാജ്യത്തെ ചില സംസ്ഥാനങ്ങളില്‍ രണ്ടാഴ്ച്ചക്കുള്ളില്‍ വലിയ രീതിയില്‍ വൈറസ് വ്യാപനം നടക്കാന്‍ സാധ്യതയുണ്ടെന്നും റിപ്പോര്‍ട്ട് വ്യക്തമാക്കുന്നു.
