പൊലീസ് ഉദ്യോഗസ്ഥന്‍റെ മകൻ കോൺഗ്രസ് നേതാവിനെ വെടിവച്ച് കൊന്നു

ഉന്നാവോയില്‍ പൊലീസ് ഉദ്യോഗസ്ഥനായ യശ്വന്ത് യാദവിന്‍റെ മകന്‍ രവി യാദവാണ് കോണ്‍ഗ്രസ് നേതാവിനെ വെടിവച്ചുകൊന്നത്

ലക്‌നൗ: ഉത്തർപ്രദേശിലെ കാൺപൂർ ജില്ലയിൽ കോൺഗ്രസ് പ്രവർത്തകനെ പൊലീസുകാരന്‍റെ മകൻ വെടിവച്ചു കൊന്നു. ചക്കേരി പോലീസ് സ്റ്റേഷൻ പരിധിയിൽ ഗ്രേറ്റർ കൈലാഷ് നഗറിലാണ് സംഭവം.രവി യാദവാണ് കോണ്‍ഗ്രസ് സിറ്റി സെക്രട്ടറി ഷൂബ് ഖാനെ വെടിവച്ചുകൊന്നത്.

പണമിടപാടിനെത്തുടർന്ന് കരാറുകാരൻ രന്ധീർ സിംഗ് യാദവെന്നയാളെ തട്ടിക്കൊണ്ടുപോയി വീട്ടിൽ പാർപ്പിച്ചിരിക്കുകയായിരുന്നു പ്രതി രവി യാദവ്. പിതാവിന്‍റെ മോചനം ഉറപ്പാക്കാൻ രന്ധീർ സിംഗിന്‍റെ മകൻ കോൺഗ്രസ് സിറ്റി സെക്രട്ടറി ഷൂബ് ഖാൻ ഉൾപ്പെടെയുള്ള സുഹൃത്തുക്കളെ വിളിച്ചുവരുത്തി.ഷൂബ് ഖാനും സംഘവും രവി യാദവിന്‍റെ വീട്ടിലെത്തിയപ്പോള്‍ ലൈസൻസുള്ള റൈഫിൾ പുറത്തെടുത്ത് രവി യാദവ് അവർക്ക് നേരെ വെടിയുതിർത്തു. പരിക്കേറ്റ ഷൂബ് ഖാനെ അടുത്തുള്ള സരാൽ ആശുപത്രിയിൽ എത്തിച്ചെങ്കിലും മരണം സംഭവിച്ചതായി ഉദ്യോഗസ്ഥർ പറഞ്ഞു.

രവി യാദവ് ഒളിവിലാണെന്നും കണ്ടെത്താൻ തെരച്ചിൽ ഊർജിതമാക്കിയതായും ഉദ്യോഗസ്ഥർ അറിയിച്ചു. രവി യാദവിന്‍റെ പിതാവ് യശ്വന്ത് യാദവ് ഉന്നാവോയിൽ പൊലീസ് ഉദ്യോഗസ്ഥനാണ്.