യഥാര്‍ഥ നിയന്ത്രണ രേഖയില്‍ (എല്‍എസി) കിഴക്കന്‍ ലഡാക്കിലെ പാന്‍ഗോങ് ട്സൊ തടാകത്തിനരികിലെ ഇന്ത്യന്‍ ഭൂപ്രദേശത്തേക്ക് കടന്നു കയറുവാന്‍ ചൈനയുടെ പീപ്പിള്‍സ് ലിബറേഷന്‍ ആര്‍മി (പിഎല്‍എ) നടത്തിയ പുതിയ ശ്രമം തടയുന്നതിന് എടുത്ത മുന്‍കൂർ നടപടികളെ കുറിച്ച് തിങ്കളാഴ്ച ഉണ്ടായ ഇന്ത്യന്‍ സൈന്യത്തിന്‍റെ പ്രസ്‌താവനക്കെതിരെ ചൈന കടുത്ത രീതിയില്‍ പ്രതികരിച്ചപ്പോൾ ബെയ്‌ജിങ്ങിന്‍റെ നടപടികള്‍ ഉഭയകക്ഷി കരാറുകളെയും പ്രോട്ടോക്കോളുകളെയും നിരന്തരം ലംഘിക്കുന്നവയാണ് എന്ന് ചൊവ്വാഴ്‌ച വിദേശ കാര്യ മന്ത്രാലയം ആവര്‍ത്തിച്ച് വ്യക്തമാക്കി. ഏഷ്യയിലെ രണ്ട് വമ്പന്‍ രാജ്യങ്ങള്‍ തമ്മിലുള്ള അതിര്‍ത്തി തര്‍ക്കത്തില്‍ സമാധാനവും ശാന്തിയും പുനസ്ഥാപിക്കുന്നതിനായി ഇരു ഭാഗങ്ങള്‍ക്കിടയിലും ചര്‍ച്ച ചെയ്‌ത് പൂര്‍ത്തിയാക്കിയ തീരുമാനങ്ങളെയാണ് ചൈന ലംഘിക്കാന്‍ ശ്രമിക്കുന്നതെന്നാണ് ഇന്ത്യ വ്യക്തമാക്കിയത്.
വിദേശ മന്ത്രാലയത്തിലെ വക്താവ് അനുരാഗ് ശ്രീവാസ്തവ ഒരു പ്രസ്താവനയിലൂടെ പറഞ്ഞത് ഓഗസ്റ്റ് 29, 30 തീയതികളിലെ രാത്രി വൈകിയുള്ള വേളകളില്‍ “ചൈന പ്രകോപനപരമായ സൈനിക നടപടികളില്‍'' ഏര്‍പ്പെട്ടു എന്നാണ്. പാന്‍ഗോങ് തടാകത്തിന്‍റെ മേഖലയില്‍ തെക്കന്‍ കരയില്‍ തല്‍സ്ഥിതി മാറ്റി മറിക്കുന്നതിനാണ് ചൈന ശ്രമം നടത്തിയത് എന്നും പ്രസ്‌താവനയില്‍ പറയുന്നു.
“ഇന്ത്യന്‍ സൈന്യം ഇന്നലെ പ്രസ്‌താവിച്ചതു പോലെ ഈ പ്രകോപനപരമായ നടപടികളോട് ഇന്ത്യ പ്രതികരിച്ചു കൊണ്ട് യഥാര്‍ഥ നിയന്ത്രണ രേഖയില്‍ ആവശ്യമായ പ്രതിരോധ നടപടികള്‍ എടുക്കുകയും ചെയ്‌തു. നമ്മുടെ താല്‍പര്യങ്ങള്‍ സംരക്ഷിക്കുന്നതിനും അതിര്‍ത്തിയുടെ അഖണ്ഡത പ്രതിരോധിക്കുന്നതിനും വേണ്ടിയുള്ളതായിരുന്നു ഈ നടപടികള്‍,'' ശ്രീവാസ്തവ പറഞ്ഞു.
“സ്ഥിതി ഗതികള്‍ സംഘര്‍ഷരഹിതമാക്കുന്നതിനു വേണ്ടിയുള്ള ഇരു വിഭാഗങ്ങളിലേയും കമാന്‍ഡര്‍മാര്‍ തമ്മിലുള്ള ചര്‍ച്ചകള്‍ ഓഗസ്റ്റ് 31ന് നടന്നു കൊണ്ടിരിക്കെ തന്നെ ചൈനയുടെ സൈന്യം പ്രകോപനപരമായ നടപടികളില്‍ ഏര്‍പ്പെടുകയായിരുന്നു. എന്നാല്‍ കൃത്യമായ സമയത്തുള്ള പ്രതിരോധ നടപടിയിലൂടെ ഈ ശ്രമങ്ങള്‍ തടയുന്നതിന് ഇന്ത്യന്‍ സൈന്യത്തിന് കഴിഞ്ഞു. തല്‍സ്ഥിതി അട്ടിമറിക്കുവാനുള്ള ഏകപക്ഷീയമായ ശ്രമമാണ് ചൈന നടത്തിയത്.'' പ്രസ്‌താവനയില്‍ പറയുന്നു.
ന്യൂഡല്‍ഹിയിലെ ചൈനയുടെ എംബസിയില്‍ വക്താവായി പ്രവര്‍ത്തിക്കുന്ന ജി റോങ് “ഇന്ത്യന്‍ സൈന്യം മുന്‍പ് നടന്ന ബഹുതല കൂടികാഴ്‌ചകളിലും ചര്‍ച്ചകളിലും എത്തിച്ചേര്‍ന്ന അഭിപ്രായ സമന്വയത്തെ ലംഘിച്ചിരിക്കുന്നു,'' എന്ന് ആരോപിച്ചതോടെയാണ് വിദേശ കാര്യ മന്ത്രാലയത്തിന്‍റെ മേല്‍ പറഞ്ഞ പരാമര്‍ശങ്ങളുണ്ടായത്. ഇന്ത്യയും ചൈനയും തമ്മില്‍ നടന്ന ചര്‍ച്ചകള്‍ക്ക് ശേഷവും പാന്‍ഗോങ് ട്സൊ തടാകത്തിന്‍റെ തെക്കന്‍ കരയിലും, ചൈന-ഇന്ത്യ അതിര്‍ത്തിയുടെ പടിഞ്ഞാറന്‍ മേഖലയായ റക്കിം മലമ്പാതക്കരികിലും ഇന്ത്യ നിയമ വിരുദ്ധമായി യഥാര്‍ഥ നിയന്ത്രണ രേഖ മുറിച്ചു കടന്നു എന്നും, അതിര്‍ത്തി മേഖലകളില്‍ വീണ്ടും സംഘര്‍ഷം പൊട്ടി പുറപ്പെടുവാന്‍ കാരണമാക്കി കൊണ്ട് നിരന്തരമായ പ്രകോപനങ്ങള്‍ നടത്തി കൊണ്ടിരിക്കുകയാണ് ഇന്ത്യ എന്നും റോങ് ആരോപിക്കുകയുണ്ടായി.
“ഇന്ത്യയുടെ നീക്കത്തിലൂടെ ചൈനയുടെ അതിര്‍ത്തിയുടെ അഖണ്ഡതയും, നിലവിലുള്ള കരാറുകളും പ്രോട്ടോക്കോളുകളും എല്ലാം തന്നെ ഗുരുതരമായി ലംഘിക്കപ്പെട്ടിരിക്കയാണ്. ഇരു രാജ്യങ്ങളും എത്തി ചേര്‍ന്നിട്ടുള്ള പ്രധാനപ്പെട്ട അഭിപ്രായ സമന്വയങ്ങളും ലംഘിക്കപ്പെട്ടിരിക്കുന്നു. ചൈന-ഇന്ത്യ അതിര്‍ത്തി മേഖലയിലെ സമാധാനവും ശാന്തിയും ഇതുമൂലം ഗുരുതരമാം വിധം തകരാറിലായിരിക്കുന്നു. ഇരു വിഭാഗങ്ങളും സംഘര്‍ഷ മേഖലയിലെ സമാധാനം തിരിച്ചു കൊണ്ടു വരുന്നതിനും സ്ഥിതി ഗതികള്‍ ശാന്തമാക്കുന്നതിനും വേണ്ടി നടത്തിയ ശ്രമങ്ങള്‍ക്കെല്ലാം എതിരായുള്ള പ്രവര്‍ത്തനങ്ങളാണ് ഇപ്പോള്‍ ഇന്ത്യ നടത്തിയിരിക്കുന്നത്. അത് അതിശക്തമാം വിധം ചൈന എതിര്‍ക്കുന്നു.'' പ്രസ്‌താവനയില്‍ പറയുന്നു.
കിഴക്കന്‍ ലഡാക്കില്‍ നില നിന്നു പോരുന്ന സംഘര്‍ഷത്തിന്‍റെ പശ്ചാത്തലത്തില്‍ സൈനിക തലത്തിലും, നയതന്ത്ര തലത്തിലും നടന്ന കൂടി കാഴ്‌ചകളിലൂടെ മുന്‍പ് എത്തിചേര്‍ന്ന അഭിപ്രായ സമന്വയങ്ങള്‍ എല്ലാം തന്നെ പിഎല്‍എ സൈന്യം ലംഘിച്ചിരിക്കയാണെന്നും തല്‍സ്ഥിതി മാറ്റി മറിക്കുന്നതിനായി പ്രകോപനപരമായ സൈനിക നീക്കങ്ങള്‍ നടത്തുകയാണെന്നും ഇന്ത്യന്‍ സൈന്യം തിങ്കളാഴ്ച പുറത്തിറക്കിയ പ്രസ്‌താവനയില്‍ പറഞ്ഞിരുന്നു.
“പാന്‍ഗോങ് ട്സൊ തടാകത്തിന്‍റെ തെക്കന്‍ കരയില്‍ പിഎല്‍എ നടത്തിയ ഈ ശ്രമങ്ങള്‍ മുന്‍ കൂട്ടി കണ്ട് തടയുവാന്‍ ഇന്ത്യന്‍ സൈന്യത്തിന് സാധിച്ചു. മാത്രമല്ല, നമ്മുടെ താവളങ്ങള്‍ കൂടുതല്‍ ശക്തിപ്പെടുത്തുവാനുള്ള നടപടികള്‍ എടുക്കുകയും, നിലവില്‍ ഈ പ്രദേശത്ത് നില നില്‍ക്കുന്ന വസ്‌തുതകളെ ഏകപക്ഷീയമായി മാറ്റുവാനുള്ള ചൈനയുടെ ശ്രമങ്ങളെ തടയുകയും ചെയ്‌തു,'' എന്ന് ഇന്ത്യന്‍ സൈന്യത്തിന്‍റെ പ്രസ്‌താവനയില്‍ പറയുന്നു. “ചര്‍ച്ചകളിലൂടെ സമാധാനവും ശാന്തിയും നില നിര്‍ത്തി പോരുന്നതിന് ഇന്ത്യന്‍ സൈന്യം എപ്പോഴും പ്രതിജ്ഞാബദ്ധമാണ്. അതോടൊപ്പം തന്നെ അതിര്‍ത്തിയുടെ അഖണ്ഡത സംരക്ഷിക്കുന്നതിനും തുല്യമാം വിധം നിശ്ചയ ദാര്‍ഢ്യത്തോടെ നില കൊള്ളും ഇന്ത്യ.'' പ്രസ്‌താവന പറഞ്ഞു.
ഈ വര്‍ഷം ജൂണില്‍ ഗല്‍വാന്‍ താഴ്‌വരയിലെ രക്ത രൂക്ഷിതമായ പോരാട്ടങ്ങളെ തുടര്‍ന്ന് കഴിഞ്ഞ 45 വര്‍ഷത്തിനിടയില്‍ ആദ്യമായി എല്‍എസിയില്‍ ഇരു വിഭാഗങ്ങള്‍ക്കും ഇടയില്‍ ഒട്ടേറെ സൈനികരുടെ മരണത്തിനിടയാക്കി കൊണ്ട് ലഡാക്കില്‍ പുകഞ്ഞു കൊണ്ടിരുന്ന സംഘര്‍ഷം കുറയ്ക്കുന്നതിനു വേണ്ടി എത്തി ചേര്‍ന്ന അഭിപ്രായ സമന്വയങ്ങള്‍ പിഎല്‍എ സൈനികര്‍ ലംഘിച്ചതോടു കൂടി ഇന്ത്യക്കും ചൈനക്കും ഇടയിലുള്ള പുതിയ സംഘര്‍ഷങ്ങള്‍ ഉടലെടുത്തിരിക്കയാണ്.
ചൊവാഴ്ച ബെയ്‌ജിങ്ങില്‍ നടത്തിയ പതിവ് മാധ്യമ സമ്മേളനത്തില്‍ ചൈനയുടെ വിദേശ കാര്യ മന്ത്രാലയത്തിലെ വക്താവായ ഹുവാ ചുന്‍ യിന്‍ ആരോപിച്ചത് പാന്‍ഗോങ് ട്സൊ തടാകത്തിന്‍റെ തെക്കന്‍ കരയിലും റെക്കിന്‍ മലയിലും ഇന്ത്യന്‍ സൈന്യം അനധികൃതമായി എല്‍എസി മുറിച്ചു കടന്നു എന്നാണ്.
“ഇന്ത്യന്‍ വിഭാഗം തങ്ങളുടെ പ്രകോപനങ്ങള്‍ നിര്‍ത്തണമെന്നും എല്‍എസിയില്‍ അനധികൃതമായി മുറിച്ചു കടന്ന തങ്ങളുടെ അതിര്‍ത്തി സേനകളെ ഉടനടി പിന്‍ വലിക്കണമെന്നും ചൈന ആവശ്യപ്പെടുന്നു. അതോടൊപ്പം തന്നെ സ്ഥിതിഗതികള്‍ സംഘര്‍ഷ ഭരിതമാക്കുന്നതിലേക്ക് നയിക്കുകയും, സങ്കീര്‍ണതകള്‍ കുത്തനെ ഉയര്‍ത്താന്‍ ഇടയാക്കുകയും ചെയ്യുന്ന ഏത് തരത്തിലുള്ള നടപടികളില്‍ നിന്നും ഉടനടി ഇന്ത്യ പിന്‍ വാങ്ങണമെന്നും ഞങ്ങള്‍ ആവശ്യപ്പെടുന്നു,'' ഹുവാ പറഞ്ഞു.
അതോടൊപ്പം തന്നെ ചൈനയിലെ സര്‍ക്കാരിന്‍റെ മുഖപത്രം കൂടിയായ ഏറെ സ്വാധീനമുള്ള ഇംഗ്ലീഷ് ദിനപത്രം ഗ്ലോബല്‍ ടൈംസിന്‍റെ മുഖപ്രസംഗത്തിന്‍റെ തലക്കെട്ട് ഇങ്ങനെയായിരുന്നു: “ഇന്ത്യയുടെ അവസരവാദപരമായ നീക്കത്തിനെതിരെ ശക്തിയുക്തം തിരിച്ചടിക്കണം ചൈന''. അതോടൊപ്പം തന്നെ ചൈനയുടെ അതിര്‍ത്തിയുടെ അഖണ്ഡത ഗുരുതരമാം വിധം ലംഘിക്കുന്നതും, ചൈന-ഇന്ത്യ അതിര്‍ത്തി മേഖലയിലെ സമാധാനത്തെയും സുസ്ഥിരതയെയും വില കുറച്ചു കാട്ടുന്നതുമായ തുറന്ന പ്രകോപനമാണ് ഇന്ത്യ നടത്തിയിരിക്കുന്നത് എന്നും പത്രത്തിന്‍റെ മുഖപ്രസംഗം അവകാശപ്പെട്ടു.
ചൈന-ഇന്ത്യ അതിര്‍ത്തി മേഖലയില്‍ ഒരു സൈനിക പോരാട്ടം നടത്തുന്നതിനു വേണ്ടി ചൈന തയ്യാറെടുക്കേണ്ടതുണ്ട് എന്ന് പ്രസ്താവിച്ച പത്രം അതോടൊപ്പം തന്നെ ഇരു രാജ്യങ്ങളും തമ്മിലുള്ള സംഘര്‍ഷം സമാധാനപരമായ മാര്‍ഗങ്ങളിലൂടെ പരിഹരിക്കുവാനും ആഹ്വാനം ചെയ്‌തു.
“പക്ഷെ ഇന്ത്യ മുന്‍പിന്‍ നോക്കാതെ ചൈനയുടെ ക്ഷമയുടെ നെല്ലിപ്പടിയെ വെല്ലുവിളിക്കുമ്പോള്‍ ചൈനയും മൃദുല സമീപനം കൈകൊണ്ടാല്‍ പോരാ. ആവശ്യമായി വന്നാല്‍ ചൈന സൈനിക നടപടികള്‍ തന്നെ സ്വീകരിക്കുകയും അത് വിജയിക്കുന്നു എന്ന് ഉറപ്പ് വരുത്തുകയും വേണം,'' മുഖപ്രസംഗം പ്രസ്താവിച്ചു.
“ഇന്ത്യയേക്കാള്‍ എത്രയോ മടങ്ങ് ശക്തമാണ് ചൈന. ചൈനയ്ക്ക് ഒട്ടും തുല്യരല്ല ഇന്ത്യ''. എന്ന് പ്രസ്താവിച്ചു കൊണ്ട് മുഖപ്രസംഗം ഇങ്ങനെ കൂട്ടി ചേര്‍ത്തു: “യുഎസ് പോലുള്ള മറ്റ് ശക്തികളുമായി കൂടി ചേര്‍ന്നു കൊണ്ട് ചൈനയെ കൈകാര്യം ചെയ്യാന്‍ കഴിയും എന്ന ഒരു മിഥ്യാബോധം ഇന്ത്യക്കുണ്ടെങ്കില്‍ അത് നമ്മള്‍ തകര്‍ക്കണം. ഏഷ്യയുടെയും ലോകത്തിന്‍റെ തന്നെയും ചരിത്രം നമ്മളോട് പറയുന്നത് അവസരവാദപരമായ സമീപനം സ്വീകരിക്കുന്ന ഏത് ശക്തിയും ദുര്‍ബലരെ ഭീഷണിപ്പെടുത്തുന്നവരും ശക്തരെ ഭയക്കുന്നവരും ആണെന്നാണ്. ചൈന-ഇന്ത്യ അതിര്‍ത്തി പ്രശ്‌നങ്ങളുടെ കാര്യം വരുമ്പോള്‍ തികഞ്ഞ അവസരവാദികളായി മാറുകയാണ് ഇന്ത്യ എപ്പോഴും ചെയ്യുന്നത്.''
സ്ഥിതിഗതികളെ ഉത്തരവാദിത്തമുള്ള രീതിയില്‍ കൈകാര്യം ചെയ്യണമെന്നും ഇരു വിഭാഗങ്ങളും പ്രകോപനപരമായ നടപടികള്‍ സ്വീകരിക്കുകയോ സ്ഥിതി ഗതികള്‍ വഷളാക്കുകയോ ചെയ്യാതെ ഉഭയകക്ഷി കരാറുകളും പ്രോട്ടോക്കോളുകളും പ്രകാരം സമാധാനവും ശാന്തിയും ഉറപ്പു വരുത്തണമെന്നും ഇന്ത്യൻ വിദേശ കാര്യ മന്ത്രി എസ് ജയശങ്കറും ചൈനീസ് വിദേശകാര്യമന്ത്രി വാങ് യിയും എന്ന് വക്താവ് ശ്രീവാസ്തവ തന്‍റെ പ്രസ്‌താവനയില്‍ പറയുന്നു.
“ഈ വര്‍ഷം തുടക്കം മുതല്‍ യഥാര്‍ഥ നിയന്ത്രണ രേഖയിലെ ചൈനയുടെ നടപടികളും പെരുമാറ്റങ്ങളും ഉഭയകക്ഷി കരാറുകളുടെയും പ്രോട്ടോക്കോളുകളുടെയും നഗ്നമായ ലംഘനമാണ് കാട്ടി തരുന്നത്. അതിര്‍ത്തിയില്‍ സമാധാനവും ശാന്തിയും ഉറപ്പ് വരുത്തുന്നതിനു വേണ്ടി ഇരു രാജ്യങ്ങളും ഉഭയകക്ഷി തലത്തിലെടുത്ത തീരുമാനങ്ങളാണ് ലംഘിക്കപ്പെടുന്നത്,'' അദ്ദേഹം പ്രസ്താവിച്ചു. “പ്രത്യേക പ്രതിനിധികള്‍ കൂടി ആയ രണ്ട് വിദേശ കാര്യ മന്ത്രിമാരും എത്തി ചേര്‍ന്ന ധാരണകളെ പൂര്‍ണമായും അവഗണിക്കുന്ന നടപടികളാണ് അത്തരത്തിലുള്ളവയെല്ലാം.'' അദ്ദേഹം പറഞ്ഞു.
ഈയിടെ ഉണ്ടായ പ്രകോപനപരവും ആക്രമണോത്സുകവുമായ നടപടികള്‍ ഇന്ത്യ നയ തന്ത്ര, സൈനിക വഴികളിലൂടെ ചൈനക്കു മുന്നിൽ ഉയർത്തിയിട്ടുണ്ടെന്നും ശ്രീവാസ്തവ പറഞ്ഞു. അതിനാല്‍ തങ്ങളുടെ മുന്നണി സേനകളെ അത്തരത്തിലുള്ള പ്രകോപനപരമായ നടപടികള്‍ കൈകൊള്ളുന്നതില്‍ നിന്നും നിയന്ത്രിച്ച് അച്ചടക്കത്തോടെ നില നിര്‍ത്തണമെന്ന് ഇന്ത്യ ചൈനയോട് ആഹ്വാനം ചെയ്‌തിട്ടുണ്ട് എന്നും ശ്രീവാസ്തവ പറഞ്ഞു.
“യഥാര്‍ഥ നിയന്ത്രണ രേഖയില്‍ പടിഞ്ഞാറന്‍ മേഖലയില്‍ നില നില്‍ക്കുന്ന എല്ലാ പ്രശ്‌നങ്ങളും പരിഹരിക്കുവാന്‍ ഇന്ത്യ ശക്തമാം വിധം പ്രതിജ്ഞാബദ്ധമാണ്. സമാധാനപരമായ ചര്‍ച്ചകളിലൂടെ വേണം അവ പരിഹരിക്കുവാന്‍,'' അദ്ദേഹം പ്രസ്താവിച്ചു.
“ഈ പശ്ചാത്തലത്തില്‍ മുന്‍പ് എത്തിയ ധാരണകളെ ചൈന ആത്മാര്‍ത്ഥതയോടെ പാലിക്കും എന്ന് ഞങ്ങള്‍ പ്രതീക്ഷിക്കുന്നു. അതോടൊപ്പം തന്നെ സ്ഥിതി ഗതികള്‍ പരിഹരിക്കുന്നതിനും അതിര്‍ത്തി മേഖലയില്‍ സമാധാനവും ശാന്തിയും തിരിച്ചു കൊണ്ടു വരുന്നതിനും ചൈന ഇന്ത്യക്കൊപ്പം ചേര്‍ന്ന് ആത്മാര്‍ഥമായി ശ്രമിക്കുമെന്നും പ്രതീക്ഷിക്കുന്നു.'' അദ്ദേഹം വ്യക്തമാക്കി.
