ന്യൂഡൽഹി: ലോക്ക് ഡൗൺ മൂലമുണ്ടായ സാമ്പത്തിക തകർച്ച നേരിടാൻ സംസ്ഥാനത്തിന് 30,000 കോടി രൂപയുടെ ധനസഹായം നൽകണമെന്ന് ഛത്തീസ്‌ഗഡ് മുഖ്യമന്ത്രി പ്രധാനമന്ത്രിയോട് ആവശ്യപ്പെട്ടു. വ്യവസായം, സേവനം, കാർഷിക മേഖല എന്നിവയെ പിന്താങ്ങുന്നതിനായി 10,000 കോടി രൂപ ഉടൻ നൽകണമെന്നും പ്രധാനമന്ത്രിക്കയച്ച കത്തിൽ ഭൂപേഷ് ബാഗേൽ വ്യക്തമാക്കി. അടുത്ത മൂന്ന് മാസത്തേക്ക് ദുരിതാശ്വാസ, ക്ഷേമപദ്ധതികൾ നടപ്പാക്കുന്നതിനാണ് ധനസഹായം അനിവാര്യമായുള്ളതെന്നും സംസ്ഥാനത്തെ വരുമാനവുമായി ബന്ധപ്പെട്ട പ്രവർത്തനങ്ങൾക്ക് ഇത് വലിയ ആശ്വാസമാകുമെന്നും അദ്ദേഹം പറഞ്ഞു.
രാജ്യത്തെ മറ്റ് സംസ്ഥാനങ്ങളെ അപേക്ഷിച്ച് ഛത്തീസ്‌ഗഡിൽ കൊവിഡ് ഭീഷണി കുറവാണ്. അതിനാൽ ഏതാനും മേഖലകളെ ലോക്ക് ഡൗൺ നിയന്ത്രണങ്ങളിൽ നിന്ന് ഒഴിവാക്കണമെന്ന് മുഖ്യമന്ത്രി ആവശ്യപ്പെട്ടു. ഖനന പ്രവർത്തനങ്ങൾ, എക്സൈസ്, ജിഎസ്‌ടി, വസ്‌തുവകകളുടെ രജിസ്ട്രേഷൻ, വാഹനങ്ങളുടെ രജിസ്ട്രേഷൻ, വന സമ്പത്ത് എന്നിവയാണ് സംസ്ഥാനത്തിന്‍റെ പ്രധാന വരുമാന മാർഗങ്ങൾ. ആവശ്യവസ്‌തുക്കൾ വിറ്റഴിക്കുന്നതിൽ നിന്ന് ഛത്തീസ്‌ഗഡിന് വരുമാനമൊന്നും ലഭിക്കുന്നില്ല. അതിനാൽ നഗരങ്ങളിലെ നിർമാണ പ്രവർത്തനങ്ങളും വേനൽക്കാലം കണക്കിലെടുത്ത് എയർകണ്ടീഷണറുകൾ, കൂളറുകൾ, ഫ്രിഡ്‌ജുകൾ എന്നിവയുടെ കടകൾ തുറന്നുപ്രവർത്തിക്കാനും അനുമതി നൽകണം.
അടുത്ത മാസം മൂന്ന് വരെ പ്രഖ്യാപിച്ച ലോക്ക് ഡൗണിൽ നിന്നും വാഹനങ്ങളുടെ ഷോറൂമുകളുടെ പ്രവർത്തനങ്ങൾക്കും വസ്‌തുവകകളുടെ രജിസ്ട്രേഷനും വിൽപനക്കും ഇളവ് നൽകണമെന്നും അദ്ദേഹം പ്രധാനമന്ത്രിയോട് ആവശ്യപ്പെട്ടു. ക്ഷീര കർഷകർക്ക് നഷ്‌ടമുണ്ടാകാതിരിക്കാൻ മധുരപലഹാരങ്ങൾ വിൽക്കുന്ന കടകൾ പ്രവർത്തിപ്പിക്കേണ്ടത് അത്യാവശ്യമാണെന്നും ഭൂപേഷ് ബാഗേൽ കൂട്ടിച്ചേർത്തു.
ലോക്ക് ഡൗൺ നീട്ടിയത് വഴി മൊത്തം വരുമാനം പൂജ്യത്തിലെത്തിയ സ്ഥിതിവിശേഷമാണുള്ളത്. ഈ സാഹചര്യത്തിൽ കേന്ദ്രനികുതിയിൽ നിന്ന് സംസ്ഥാനത്തിന് ലഭിക്കുന്ന തുകയിൽ വലിയ കുറവുണ്ട്. യാതൊരു വരുമാന മാർഗവുമില്ലാത്ത 56 ലക്ഷം ദരിദ്ര കുടുംബങ്ങൾക്ക് ഉപജീവനത്തിനുള്ള സഹായങ്ങളും നൽകണം. അതിനാൽ, തന്നെ അടിയന്തിരമായി കേന്ദ്രം ധനസഹായം നൽകി സഹായിക്കണമെന്ന് മുഖ്യമന്ത്രി അഭ്യർഥിച്ചു.
ഇളവ് അനുവദിച്ചാവും കൊവിഡ് പ്രതിരോധ പ്രവർത്തനങ്ങളിൽ വിട്ടുവീഴ്‌ച ചെയ്യില്ലെന്ന് മുഖ്യമന്ത്രി അറിയിച്ചു. സംസ്ഥാനത്തെ എല്ലാ പൗരന്മാരും മാസ്‌ക് ധരിക്കുന്നുവെന്നും സാമൂഹിക അകലം പാലിക്കുന്നുണ്ടെന്നും സർക്കാർ ഉറപ്പുവരുത്തുന്നുണ്ട്. സംസ്ഥാനത്ത് സ്ഥിരീകരിച്ച 36 കൊവിഡ് കേസുകളിൽ 25 പേർ സുഖം പ്രാപിച്ചു. ബാക്കി 11 പേർ ചികിത്സയിൽ തുടരുന്നു. ദിവസേന 400ഓളം സാമ്പിളുകൾ വൈറസ് പരിശോധനക്കായും അയക്കുന്നുണ്ട്.
