ദിസ്‌പൂർ : അസം-മിസോറാം അതിർത്തി പ്രശ്‌നത്തിൽ തർക്ക പരിഹാരത്തിനായി അസം നിയമസഭയില്‍ നിന്ന് 19അംഗ സംഘം ഡൽഹിക്ക് തിരിക്കും. വിഷയത്തിൽ കേന്ദ്രസർക്കാർ ഇടപെടൽ ആവശ്യപ്പെട്ടാണ് സന്ദർശനം.
സ്‌പീക്കർ ബിശ്വജിത്‌ ദയ്‌മാരിയുടെ നേതൃത്വത്തിലുള്ള സംഘമാണ് കേന്ദ്രസര്‍ക്കാരുമായി ചര്‍ച്ച നടത്തുക. അസം സർക്കാരിനെ പൂർണമായി പിന്തുണയ്ക്കുന്ന സമീപനമാണ് സംഘം സ്വീകരിക്കുകയെന്നും വേഗത്തിൽ തന്നെ പ്രശ്‌നത്തിന് പരിഹാരം കണ്ടെത്താനായി ശ്രമിക്കുമെന്നും സംഘാംഗങ്ങൾ അറിയിച്ചു.
അസമിനായി നമ്മൾ ഒന്നിക്കണമെന്ന് ദയ്‌മാരി
അസം ഭൂമിയെയും സംസ്ഥാനത്തെ ജനങ്ങളെയും സംരക്ഷിക്കുന്നതിനായി എല്ലാവരും ഒന്നിക്കണമെന്ന് ദയ്‌മാരി പറഞ്ഞു. സംസ്ഥാനങ്ങൾ തമ്മിലുള്ള അതിർത്തികൾ സുരക്ഷിതമാക്കുന്നതിന് പുതിയ പോളിസികൾ നിർമിക്കണമെന്നും അദ്ദേഹം കൂട്ടിച്ചേർത്തു.
ഡെപ്യൂട്ടി സ്‌പീക്കർ, ബിജെപി എംഎൽഎമാർ, കോൺഗ്രസ് നേതാക്കൾ തുടങ്ങിയവരും സംഘത്തിലുണ്ട്. അതിനിടെ ജൂലൈ 26ന് സംഘർഷമുണ്ടായ അതിർത്തി പ്രദേശമായ ലൈലാപൂരിൽ പ്രതിനിധി സംഘം സന്ദർശിച്ചു.
സംഘർഷത്തിൽ ആറ് അസം പൊലീസ് ഉദ്യോഗസ്ഥരും ഒരു പ്രദേശവാസിയുമാണ് കൊല്ലപ്പെട്ടത്. സന്ദർശനത്തിന് ശേഷം സംഘം സിൽചറിൽ യോഗം ചേർന്നിരുന്നു.
അസം-നാഗാലാന്‍ഡ് സംഘർഷം
അതേസമയം അസം നാഗാലാൻഡ് സംഘർഷങ്ങൾക്ക് അയവ് വന്നു. പ്രശ്‌ന ബാധിത പ്രദേശങ്ങളിൽ നിന്ന് ഇരു സംസ്ഥാനങ്ങളും സേനകളെ പിന്‍വലിച്ചു. ഇത് സംബന്ധിക്കുന്ന കരാറിൽ ഇരു സംസ്ഥാനങ്ങളിലെയും ജനപ്രതിനിധികൾ ഒപ്പുവച്ചു.
READ MORE: അസം - മിസോറാം അതിർത്തി സംഘര്‍ഷം : 6 പൊലീസുകാര്‍ കൊല്ലപ്പെട്ടു
