ന്യൂഡല്‍ഹി: തെരഞ്ഞെടുപ്പ് പ്രചാരണ റാലികള്‍ക്ക് ഫെബ്രുവരി 11വരെ തെരഞ്ഞെടുപ്പ് കമ്മീഷന്‍ നിരോധനം പ്രഖ്യാപിച്ച സാഹചര്യത്തില്‍ വെര്‍ച്വല്‍ റാലികള്‍ക്ക് തയ്യാറെടുപ്പുകള്‍ നടത്താന്‍ തയ്യാറെടുത്ത് കോണ്‍ഗ്രസ് ദേശീയ നേതൃത്വം. ഈ കാര്യം ചൂണ്ടികാട്ടി കോണ്‍ഗ്രസ് ജനറല്‍ സെക്രട്ടറി കെ.സി വേണുഗോപാല്‍ സ്ഥാനാര്‍ഥികള്‍ക്ക് കത്തയച്ചു.
രാഹുല്‍ ഗാന്ധി പഞ്ചാബിലെ ജലന്തറില്‍ നടത്തിയ ഓണ്‍ലൈന്‍ റാലിക്ക് സമാനമായ മാതൃക പിന്തുടരണമെന്നാണ് കത്തില്‍ സ്ഥാനാര്‍ഥികളോട് ആവശ്യപ്പെട്ടിരിക്കുന്നത്. ഈ റാലി രണ്ട് മണിക്കൂര്‍ കൊണ്ട് ഒമ്പത് ലക്ഷം ആളുകള്‍ കണ്ടതായാണ് കോണ്‍ഗ്രസ് അവകാശപ്പെടുന്നത്.
വെര്‍ച്വല്‍ റാലിക്ക് ആവശ്യമായ അനുമതി അധികൃതരില്‍ നിന്നും നേടിയെടുക്കുക, ആവശ്യമായ എല്‍ഇഡി സ്ക്രീനുകള്‍ സംഘടിപ്പിക്കുക തുടങ്ങിയ കാര്യങ്ങള്‍ ചെയ്യണമെന്ന് കോണ്‍ഗ്രസ് സംസ്ഥാന അധ്യക്ഷന്‍മാര്‍ക്കും നിര്‍ദേശം നല്‍കിയിട്ടുണ്ട്.
കോണ്‍ഗ്രസ് ദേശീയ നേതാക്കന്‍മാരുടെ പ്രസംഗം എല്ലാ വോട്ടര്‍മാരിലും എത്താന്‍ വേണ്ടി എല്ലാ അസംബ്ലി നിയോജക മണ്ഡലത്തിലും കോര്‍ഡിനേറ്റര്‍മാരെയും കോണ്‍ഗ്രസ് നിയോഗിച്ചിട്ടുണ്ട്. വെര്‍ച്വല്‍ റാലിയെ സംബന്ധിക്കുന്ന റിപ്പോര്‍ട്ടുകള്‍ ഫോട്ടോ സഹിതം കോണ്‍ഗ്രസ് ദേശീയ ആസ്ഥാനത്തേക്ക് അയക്കണമെന്നും പ്രാദേശിക നേതൃത്വത്തോട് നിര്‍ദേശിച്ചിട്ടുണ്ട്.
രാഹുല്‍ ഗാന്ധി ഫെബ്രുവരി രണ്ടിന് ഗോവയിലും അതെദിവസം തന്നെ തെരഞ്ഞെടുപ്പ് പ്രകടന പത്രിക പുറത്തിറക്കി കൊണ്ട് ഉത്തരാഖണ്ഡിലെ ഡെറാഡൂണില്‍ പ്രിയങ്കാഗാന്ധിയും വെര്‍ച്വല്‍ റാലികള്‍ നടത്തുന്നുണ്ട്.
ALSO READ: കര്‍ഷകരുടെ രോഷം തണുപ്പിക്കാൻ ബജറ്റിനാവുമോ… പ്രതീക്ഷയോടെ രാജ്യം
